ވެރިކަން ކުރާ މައި ޕާޓީ، އެމްޑީޕީގައި މިއަހަރުގެ ރިޔާސީ އިންތިހާބު ކާމިޔާބު ކުރެވިދާނެ އެހެން މީހަކު ނެތް ކަމަށާއި، އަދި އެހެން ޕާޓީތަކާއިއެކު ކޯލިޝަން ހަދައިގެން ވެރިކަމަށް އާދެވޭނެ ހަމައެކަނި ކެނޑިޑޭޓަކީ އެމަނިކުފާނު ކަމުގައި ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެއެވެ.
މަހުގެ 28 ގައި ބާއްވާ އެމްޑީޕީގެ ރިޔާސީ ޕްރައިމަރީގެ ކެމްޕެއިނަށް އައްޑޫ މަރަދޫފޭދޫގެ އެ ޕާޓީގެ ބައެއް މެމްބަރުންނާ ވާހަކަފުޅު ދައްކަވަމުން ރައީސް އިބްރާހިމް މުހައްމަދު ސޯލިހު ވިދާޅުވީ ޕާޓީގެ އެތެރޭގެ އިންތިހާބާ ޕްރައިމަރީ ވަރަށް ބޮޑަށް ތަފާތު ކަމަށެވެ. ނަމަވެސް މިއިންތިޚާބު ކާމިޔާބު ކުރާ މީހަކަށް އެމްޑީޕީގެ ޓިކެޓްގައި ވާދަކުރުމުގެ ފުރުސަތު ލިބިދޭއިރު، ބޮޑު އިންތިޚާބު ކާމިޔާބު ކުރެވޭނެ އެމްޑީޕީގެ ހަމައެކަނި ކެނޑިޑޭޓަކީ އެމަނިކުފާނުކަމަށް ރައީސް ވިދާޅުވިއެވެ.
ވަރަށް ފަސޭހަ އެއް ދައުރު ނިންމާފައި އަޅުގަނޑު ގޭގައި ހުންނަން. އެއްވެސް ކަމެއް ނޫން. އަޅުގަނޑު މަޖިލިހުގައި 25 އަހަރު އުޅެފިން. ރިޔާސީ ދައުރެއް ނިމުނީ. ދެން ކީއްކުރަންތޯ؟ އެހެން ނަމަވެސް ޕާޓީއަށްޓަކައި، އަޅުގަނޑުމެން ވީ ވައުދު ފުއްދުމަށްޓަކައި މި ކަން ކުރަން އެބަޖެހޭ.
– ރައީސް ވިދާޅުވިއެވެ.
ރައީސް އިބްރާހިމް މުހައްމަދު ސޯލިހު އަބަދުވެސް ގަބޫލުފުޅު ކުރައްވަނީ އެމްޑީޕީ އަށް ރިޔާސީ އިންތިހާބު ކާމިޔާބު ކުރެވެން އޮތީ އެހެން ބަޔަކާއެކު ކޯލިޝަނެއް ހަދައިގެން ކަމަށެވެ. އެ މަނިކުފާނުގެ މި ދައުރަށް 2018 ގައި ހެދި ކޯލިޝަން އަދިވެސް ދެމިއޮތުމުން ރައީސް ވިދާޅުވަނީ ކޯލިޝަން ގޮވައިގެން އުޅުއްވުމުގެ ގާބިލްކަން ހުރި ބޭފުޅަކީ އެއީ ކަމަށެވެ.
ހެނދުނު އައްޑޫސިޓީ ފޭދޫ ، މިވަގުތު ރައީސް މަރަދޫފޭދޫގަ 💪
މަރަދޫފޭދޫ އަށް ވަޑައިގެން މަރަދޫފޭ #MDPKuriah ކެމްޕޭން ޓީމާ ރައީސް އިބޫ ބައްދަލުކުރެއްވުން #MDPKuriah #Ibu2023 pic.twitter.com/Gje2nEBX5f
— Hussain Shafiu (@charly_thuthu) January 15, 2023
އެމްޑީޕީގެ އެންމެ އިސް ލީޑަރު ވިދާޅުވީ، އެމްޑީޕީން ވައުދުވި އެއް ކަމަކީ ރާއްޖެ އަށް ސުލްހަ ގެނައުން ކަމަށާއި އެކަމަކު 2018 ހިސާބުން ކަން ވީ ގޮތް ސާފުވާނެ ކަމަށެވެ. މަސައްކަތްތަކެއް ކުރެވޭތޯ އުޅުނަސް ދުރުވިސްނުމާއި ޕްލޭނެއް ނެތް ކަމަށް ރައީސް ވިދާޅުވިއެވެ.
ވެރިކަމަށް އާދެވޭނީ ކޯލިޝަނަކަށް ކަމަށް ވިދާޅުވާ ވާހަކަ ތަކުރާރު ކުރައްވައި ރައީސް ވިދާޅުވީ ހަމައެކަނި އެމްޑީޕީ މެންބަރުންގެ ވޯޓުން ރިޔާސީ އިންތިހާބު ކާމިޔާބު ނުކުރެވޭނެ ކަމަށާއި އެކަން ކުރެވޭނީ ރައްޔިތުންގެ ވޯޓާ ވެސް ލައިގެން ކަމަށެވެ.
އެހެންވީމާ ރިޔާސީ އިންތިހާބު ކާމިޔާބު ކުރުުމަށް އެމްޑީޕީއާއެކު އެހެން ބައެއްގެ ތާއީދު ހޯދަން އެބަ ޖެހޭ، އެކަން ކުރެވޭނެ އެހެން މީހަކު އެމްޑީޕީގައި މިވަގުތު ނެތް.
– ރައީސް ވިދާޅުވިއެވެ.
އެ މަނިކުފާނު ވިދާޅުވީ، ސުލްހަ އާއި ހަމަޖެހުން ބޭނުންވަނީ ތަރައްގީ އަދި އާންމުންގެ ވިޔަފާރި އާއިގެން އުޅެވޭނެ ގޮތެއް ހޯދަން ކަމަށެވެ. އެ މަނިކުފާނު ވިދާޅުވިގޮތުގައި އެ މަގު ދޫކޮށްލާފައި އެމްޑީޕީ އަށް ވެރިކަން ހޯދޭނެ ގޮތްތައް އެބަހުއްޓެވެ. ވެރިކަމުގައި ތިބެގެން ކަންކަން ކުރެވޭ ތަން ފެނެއެވެ.
ރައީސް ވިދާޅުވިގޮތުގައި މަރަދޫފޭދޫ އޮތީ އެމްޑީޕީގެ ރިޔާސީ ޕްރައިމަރީ އަށް ފައްކާވެފައެވެ. އެހެންވެ، ޕްރައިމަރީގައި އެ ދާއިރާގެ އަޣުލަބިއްޔަތު ނަގަންވީ ބޮޑުކޮށް ކަމަށް ވިދާޅުވިއެވެ. އެމްޑީޕީގެ ޕްރައިމަރީގެ ކެމްޕެއިނަށް މިދިޔަ ހުކުރު ދުވަހު ރައީސް އައްޑު އަށް ފެއްޓެވި ދަތުރުފުޅުގެ ފަހު މަންޒިލަކަށް މިއަދު ދެން ވަޑައިގަންނަވާނީ ހުޅުމީދު އަށެވެ. ދަތުރުފުޅު ނިންމަވާލައްވަނީ މިރޭގައެވެ.
