މާލޭ ނީލަން ފިހާރަ ސަރަޙައްދުގައި ރޯވެގެން އަނދަމުން އެބަދެއެވެ.
އެސަރަހައްދުން ގަދަޔަށް ރޯވެ އަނދަމުންދާއިރު ބޯކޮށް ދުންއަރަމުންދެއެވެ. އެމްއެންޑީއެފުން ވިދާޅުވީ ނީލަން ފިހާރަ ހުންނަ ސަރަޙައްދުގައި އަލިފާނުގެ ޙާދިސާއެއް ހިނގައިގެން އަލިފާން ނިއްވުމަށް ސިފައިން ޙަރަކާތްތެރިވަމުންދާކަމަށެވެ.
ނީލަން ފިހާރާގައި އަލިފާން ރޯވީ ރޭ މެންދަމުން އަލިވިފަހުންކަމަށް މަޢުލޫމާތު ލިބެއެވެ. އެހެންނަމަވެސް ސީދާ ކޮން ވަގުތެއްގައި ކަމެއް އަދި ނޭނގެއެވެ. އެހެންނަމަވެސް އެދިމާއިން ބާރު އަޑުތަކާއި އެއްޗެހިތަކެއް ގޮވާ އަޑު ބައެއް މީހުންނަށް އިވިފައިވެއެވެ.
ނީލަންފިހާރަ ސަރަޙައްދުގައި ރޯވެފައިވާ އަލިފާންގަނޑު ކޮންޓްރޯލް ކުރުމުގެ މަސައްކަތް ސިފައިން އަދިވެސް އަންނަނީ ކުރަމުންނެވެ. އަދި އަލީފާން ކޮންޓްރޯލްވީކަމުގެ ޚަބަރެއް ނެތެވެ.
ނީލަން ފިހާރައަކީ އެކިފަހަރުމަތިން މިފަދަ އަލިފާނުގެ ޙާދިސާތައް ހިނގާފައިވާ ތަނެކެވެ. ކުރިން އެތަން މާފަންނު ހުޅަނގުދެކުނު ހާބަރު ސަރަޙައްދުގައު ހުރި އިރުވެސް ބޮޑު އަލިފާނުގެ ޙާދިސާއެއް ހިނގިއެވެ. އެޙާދިސާއާ ގުޅިގެން އެތަން މާލޭގެ ދެކުނު ފަރާތު ކުރީގެ ކުނިގޮނޑު ކައިރިއަށް ބަދަލުކުރިއެެވެ. އޭގެފަހުންވެސް ދެ ފަހަރެއްގެ މަތިން ބޮޑު އަލިފާނުގެ ޙާދިސާތަކެއް ހިނގާފައިވެއެވެ.
