ސިޔާސީ ބައެއް ބޭފުޅުންގެ އަމިއްލަ މަންފާއަށްޓަކައި، ރާއްޖޭގެ ފަތުރުވެރިކަމުގެ އެންމެބޮޑު އެއްބައިވެރިޔާ ޗައިނާއާއި ދިމާކޮށް، އެއްޗެހި ކިޔުން ހުއްޓާލަންޖެހޭ ކަމުގައި ރައްޔިތުންގެ މަޖިލީހުގެ އައްޑޫ މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވެއްޖެއެވެ.
އެމްޑީޕީގެ ކޯލިޝަން ވެރިކަން 2018 ވަނަ އަހަރު ވެރިކަމާއި ހަވާލުވިފަހުން، ޗައިނާއާއި އޮތް ގުޅުން ވަރަށް ބޮޑަށް ހީނަރުވެ، އިންޑިއާއާއި ގުޅުންވަނީ ބަދަހިކޮށްފައެވެ. މިއާއިއެކު ސަރުކާރުގެ ގިނަ މަޝްރޫޢުތަކާއި އެނޫންވެސް ގިނަ ކަންކަމުގައި ބަރޯސާ ވެފައިވަނީ އިންޑިއާއަށެވެ.
ރާއްޖެއާއި ޗައިނާއާއި ގާތްގުޅުމެއް އޮތީ ރައީސް ޔާމީންގެ ވެރިކަމުގެ ތެރޭގައެވެ. އެވެރިކަމުގައި ރާއްޖޭގައި ހިންގި ތަރައްޤީގެ ގިނަ މަސައްކަތަކުގެ ހިއްސާ އޮތީ ޗައިނާގައެވެ. އެެދުވަސްވަރު ރާއްޖެއިން ވަނީ ޗައިނާއިން ބޮޑެތި އަދަދުތަކުން ލޯނުވެސް ނަގާފައެވެ. މިދަރަންޏާއި ގުޅޭގޮތުން އެންމެބޮޑަށް ވާހަކަދައްކަވަމުންދަނީ މިސަރުކާރުގެ އިސްބޭފުޅުންނެވެ. ޚާއްސަކޮށް އެމްޑީޕީގެ ރައީސް މުހައްމަދު ނަޝީދެވެ.
ޗައިނާއާއި ރާއްޖެއާއި އޮތް ގުޅުމާއި ރާއްޖޭގެ ފަތުރުވެރިކަމުގައި އަދާކުރާ ދައުރާއި ގުޅޭގޮތުން ޝަރީފް ވިދާޅުވީ ރާއްޖޭގެ ފަތުރުވެރިކަމުގައި ބޮޑު ހިއްސާއެއް އަދާކުރާ ޗައިނާއިން މިމަހުގެ 18 ވަނަ ދުވަހު އަނެއްކާވެސް ފަތުރުވެރިން އަންނަން ފަށާއިރު، ޗައިނާއާއި ދިމާކޮށް އެއްޗެހި ގޮވުން ހުއްޓާލަން ޖެހޭކަމަށެވެ. ޝަރީފް މިހެން މިވިދާޅުވީ ރައީސް ނަޝީދު ޗައިނާއާއި ގުޅޭގޮތުން ދައްކަވަމުންދާ ވާހަތަކަށް އިޝާރާތް ކުރައްވާކަމަށް ބެލެވެއެވެ.
ޗައިނާ މާކެޓް ހުޅުވި މިމަހުގެ 18ގައި އަލުން ޓޫރިސްޓުން އަންނަންފެށީމާ ރާއްޖޭގެ އިޤްތިޞާދަށް އާ ދިރުމެއް އަންނާނެ. އަދި އިޤްތިޞާދީ ކުރިއެރުން ހުޅުވިގެންދާނެ. ބައެއް ސިޔާސީ ލީޑަރުން ޗައިނާ އާއި ދިމާކޮށް، ސިޔާސީ ބޭނުމަށް އެއްޗިހި ގޮތުން ހުއްޓާލަންޖެހޭ.
– ޝަރީފް ވިދާޅުވިއެވެ.
ކޮވިޑާއި ގުޅިގެން އަޅާފައިވާ ހަރުކަށި ފިޔަވަޅުތަކަށް ޗައިނާއިން މިހާރު އަންނަނީ ލުއިދެމުންނެވެ. ޗައިނާގައި ކޯވިޑް-19 ފެތުރުން ކޮންޓްރޯލް ކުރުމަށް އަޅާފައިވާ ފިޔަވަޅުތަކުގެ ތެރެއިން އެ ޤައުމަށް އެތެރެވުމުގެ ކުރިން ފުރިހަމަ ކުރަންޖެހޭ ކަރަންޓީނު މިމަހުގެ 8 ވަނަ ދުވަހުން ފެށިގެން އުވާލަން އެ ޤައުމުން މިހާރު ވަނީ ނިންމާފައެވެ.
މިއާއިއެކު ޗައިނާގެ ފަތުރުވެރިން މިހާރު އަންނަނީ ދަތުރުކުރުމަށް ތައްޔާރުވަމުންނެވެ. ޗައިނާއަކީ ކޯވިޑްގެ ކުރިން ރާއްޖެއަށް އެންމެ ގިނަ ފަތުރުވެރިން އަންނަ ޤައުމެވެ. ނަމަވެސް ކޯވިޑާއިއެކު ޗައިނާގައި ދަތުރުކުރުމަށް އެޅި ފިޔަވަޅުތަކާއިއެކު މިވީ 3 އަހަރުގެ ތެރޭގައި ރާއްޖެއަށް ޗައިނާއިން އެއްވެސް ވަރަކަށް ފަތުރުވެރިން އައިސްފައެއް ނުވެއެވެ. ޗައިނާގެ 3 އެއަރލައިނަކުން މިމަހުގެ ތެރޭގައި ރާއްޖެއަށް ދަތުރުފެށުމަށް ހަމަޖެހިފައިވާކަމަށް މޯލްޑިވްސް އެއަރޕޯޓްސް ކޮންޕެނީ ލިމިޑެޓް، އެމްއޭސީއެލްއިން ބުނެއެވެ. ޗައިނާއިން ރާއްޖެއަށް ދަތުރުފެށުމަށް ހަމަޖެހިފައިވާ އެއަރލައިންތަކުގެ ތެރޭގައި ހިމެނެނީ ބެއިޖިންގ ކެޕިޓަލް އެއަރލައިން، ޗައިނާ އީސްޓަން އެއަރލައިން އަދި ހޮންގްކޮންގ އެއަރލައިންއެެވެ.
ބެއިޖިންގ ކެޕިޓަލް އެއަރލައިނުން ރާއްޖެއަށް ދަތުރުކުރުމަށް ހަމަޖެހިފައިވަނީ މިމަހުގެ 18 އިން އަންނަ މަހުގެ 22 ވަނަ ދުވަހުގެ ނިޔަލަށެވެ. މި ދަތުރުތައް ކުރާނީ ބެއިޖިންގ ޑެކްސިން އިންޓަނޭޝަނަލް އެއަރޕޯޓުން ވެލާނާ އިންޓަނޭޝަނަލް އެއަރޕޯޓަށެވެ. މި ދަތުރުތަކުގައި އެ އެއަރލައިނުން ބޭނުންކުރާނީ 306 މީހުންގެ ޖާގައިގެ ބޯޓުތަކެކެވެ. މި އެއަރލައިނުން ހަފްތާއަކު 4 ދަތުރުކުރުމަށް ވަނީ ހަމަޖެހިފައެވެ. ޗައިނާ އީސްޓަން އެއަރލައިނުން ދަތުރުފެށުމަށް ހަމަޖެހިފައިވަނީ 28 ޖަނަވަރީން މާރޗް މަހުގެ 25 ވަނަ ދުވަހުގެ ނިޔަލަށެވެ. މި ދަތުރުތައް ކުރާނީ ޝަންހާއީ ޕުޑޮންގ އިންޓަނޭޝަނަލް އެއަރޕޯޓުން ވެލާނާ އިންޓަނޭޝަނަލް އެއަރޕޯޓަށެވެ. މި ދަތުރުތަކުގައި އެ އެއަރލައިނުން ބޭނުންކުރާނީ 232 މީހުންގެ ޖާގައިގެ ބޯޓުތަކެކެވެ. މި އެއަރލައިނުން ހަފްތާއަކު 1 ދަތުރުކުރާނެއެވެ.
މިމަހު ހޮންގކޮންގ އެއަރލައިނުން ރާއްޖެއަށް ދަތުރުފަށާއިރު މި ދަތުރުތަައް އަންނަ މާރޗް މަހުގެ 23 ވަނަ ދުވަހުގެ ނިޔަލަށް ކުރުމަށް ވަނީ ހަމަޖެހިފައެވެ. މި އެއަރލައިނުން ހަފްތާއަކު 3 ދަތުރު ރާއްޖެއަށް ކުރުމަށް ވަނީ ހަމަޖެހިފައެވެ. މި ދަތުރުތައް ކުރާނީ ހޮންގކޮންގ އިންޓަނޭޝަނަލް އެއަރޕޯޓުން ވެލާނާ އިންޓަނޭޝަނަލް އެއަރޕޯޓަށެވެ. މި ދަތުރުތަކުގައި އެ އެއަރލައިނުން ބޭނުންކުރާނީ 292 މީހުންގެ ޖާގައިގެ ބޯޓުތަކެކެވެ.
ޗައިނާގައި އެންމެ ފުޅާ ދާއިރާއެއްގައި އޮންލައިން ޓްރެވަލް އެޖެންޓުކަމުގެ ޙިދުމަތްދޭ، ސީ-ޓްރިޕުން، ޗައިނާ އައުޓްބައުންޑު ޓޫރިޒަމް ރިސަރޗު އިންސްޓިޓިއުޓް އާއި ގުޅިގެން މިއަހަރު ވަނީ ޗައިނާ ފަތުރުވެރިންގެ މެދުގައި އެންމެ މަޤްބޫލު މަންޒިލްތައް ހިމަނައިގެން ރިޕޯޓެއް ނެރެފައެވެ. ޗައިނީސް ހައި- އެންޑު އައުޓްބައުންޑް ކަސްޓަމައިޒްޑު ޓްރެވަލް ރިޕޯޓުގައިވާގޮތުން ރާއްޖެއަކީ ޗައިނާ ފަތުރުވެރިންގެ މެދުގައި 4 ވަނަ އަށް އެންމެ މަޤްބޫލް މަންޒިލެވެ
