އިސްރާއީލުގެ ބޮޑުވަޒީރު ނަތަންޔާހޫ އަލަށް އުފެއްދެވި ކޯލިޝަން ސަރުކާރުގެ، ކަނާތުފިޔައިގެ ހައްދުފަހަނަ އެޅި ސިޔާސަތުތަކަށް ތާއީދުކުރާ، ނޭޝަނަލް ސެކިއުރިޓީ މިނިސްޓަރ އިޓަމާރު ބެން ގްވިރް، އިރުމަތީ ޖެރޫސެލަމްގައި ހުންނަ އަލް އަޤްސާ މިސްކިތުގެ އިމާރާތުގެ ތެރެއަށް ވަދެގަތުން ކުށްވެރިކުރުމަށް ޔޫއެންގެ ސެކިއުރިޓީ ކައުންސިލްގެ ޚާއްސަ ބައްދަލުވުމަކަށް ޗައިނާއާއި ޔޫއޭއީން ގޮވާލައިފިއެވެ.
ބައެއް ޑިޕްލޮމެޓިކް ފަރާތްތަކާއި ހަވާލާދީ ރޮއިޓާސްއިން ރިޕޯޓު ކޮށްފައިވާ ގޮތުގައި، ޔޫއެން ސެކިއުރިޓީ ކައުންސިލްގެ ބައްދަލުވުމެއް މިމައްސަލާއާއި ގުޅިގެން، މިހާރުވަނީ މިހަފްތާގެ ބުރާސްފަދުވަހު ބޭއްވުމަށް ހަމަޖެހިފައެވެ.
އިސްރާއީލުގެ ކުބިނެޓްގައި ހިމެނޭ ހައްދުފަހަނަ އަޅާފައިވާ މިނިސްޓަރެއް ކަމުގައވާި ނޭޝަނަލް ސެކިއުރިޓީ މިނިސްޓަރ އިޓަމާރު ބެން ގްވިރް މާތްވެގެންވާ އަޤްސާ މިސްކިތުގެ އިމާރާތުގެ ތެރެއަށް ވަދެގަތުން ދުނިޔޭގެ އެކި ކަންކޮޅުތަކުން ވަނީ ކުށްވެރި ކޮށްފައެވެ.
އޭގެ ތެރޭގައި ފަލަސްތީނު ސަރުކާރުގެ އިތުރުން، މިސްރު، އުރުދުން، ސައުދީ އަރަބިއާ، ތުރުކީ އަދި ޔޫއޭއީ ހިމެނެއެވެ.
ފަލަސްތީނގެ ސަރުކާރުން ބުނެފައިވަނީ އިޓަމާރު ބެން ގްވިރްގެ މި އަމަކީ ފަސްތީނުގެ ރައްޔިތުން ރުޅިއެރުވުމަށް ހިންގި އަމަލެއް ކަމަށާއި، އަދި މިއީ ބޮޑު ހަމަނުޖެހުމަކަށް ހިގައިދާނެ ފަދަ އަމަލެއް ކަމަށެވެ. އޭގެ އިތުރުން ފަލަސްތީބުގެ ބޮޑުވަޒީރު މުހައްމަދު ޝަޓޭއި ވަނީ، އިޓަމާރު ބެން ގްވިރްގެ މި ދަތުރަކީ އަލް މަސްޖިދުން އަގްސާ ހުރި ބިމުގައި ޔަހޫދީންގެ ޓެމްޕަލްއެއް އެޅުމަށް ރާވަމުންދާ ރޭވުންތަކުގެ ބައެއް ކަމުގައެވެ.
ފަލަސްތީނުގެ ގާޒާގައި އަމިއްލަ ވެރިކަމެއް ކުރަމުންދާ ހަމާސް ޖަމާއަތުން ބުނެފައިވަނީ އިޓަމާރު ބެން ގްވިރް މަސްޖިދުން އަގްސާއަށް ވަދެގަތުމަކީ "ރަތް ރޮނގު" ހުރަސްވުން ކަމުގައި އެ ޖަމާއަތުން ދެކޭނެ ކަމުގައެވެ.
އިޓަމާރު ބެން ގްވިރް އަޤްސާ މިސްކިތުގެ އިމާރާތުގެ ތެރެއަށް ވަދެގަތުމާއެކު، އެ ދުވަހުގެ ހަވީރުގެ ވަގުތެއްގައި ނަތަންޔާހޫވަނީ ބަޔާނެއްވެސް ނެރުއްވާފައެވެ. އެ ބަޔާނުގައި ނަތްންޔާހޫ ވިދާޅުވެފައިވަނީ، އަލް އަޤްސާ މިސްކިތުގެ މިނިވަންކަން ދެމެއްޓުމަށް އިސްރާއީލުން އޮތީ ތައްޔާރަށް ކަމުގައެވެ.
މިމައްސަލައާއި ގުޅިގެން އިސްރާއީލިގެ އެންމެ ގާތް އެކުވެރިޔާ އެމެރިކާއިންވެސް ވަނީ ކަންބޮޑުވުން ފާޅު ކޮށްފައެވެ.
އިޓަމާރު ބެން ގްވިރުއަކީ، މުސްލިމުން މާތްވެގެންވާ އަލް އަޤްސާ މިސްކިތަށް ޔަހޫދީންނަށް ވަނުމުގެ މިނިވަންކަން ލިބެންޖެހޭނެކަމަށް ވަކާލާތު ކުރަމުން އަންނަ މީހެކެވެ. އެހެންނަމަވެސް ފަލަސްތީނުން ދެކެނީ މިއީ ފަލަސްތީނުގެ ރައްޔިތުން ރުޅިއަރުވާ، އަދި އަލްއަޤްސާ މިސްކިތް އަމިއްލަ ކުރުމަށް ޔަހޫދީން ރާވަމުންދާ ހީލަތްތެރި ރޭވުންތަކުގެ ބައެއްގެ ގޮތުގައެވެ.
ޔަހޫދީ ދީނުގެ އިސް ރައްބީންވަނީ ޔަހޫދީން އަލް އަޤްސާ މިސްކިތްތެރޭގައި ޔަހޫދީން އަޅުކަން ކުރުން މަނާ ކޮށްފައެވެ.
އަލް އަޤްސާ މިސްކިތަކީ އިސްލާމުންގެ ތިންވަނައަށް އެންމެ މުޤައްދަސް ބިނާއެވެ. މި ބިނާގެ މިނިވަންކަން ދެމެހެއްޓުމަށް ވެވިފައިވާ އެއްބަސްވުމުގެ ދަށުން، މިސްކިތުގައި އަޅުކަން ކުރުމުގެ ފުރުސަތު އޮންނަގޮތަށް ހަމަޖެހިފައި އޮންނަނީ މުސްލިމުންނަށް އެކަންޏެވެ. އެހެންނަމަވެސް އިސްރާއީލުގެ ހައްދުފަހަނަ އަޅާފައިވާ ޔަހޫދީން މަސައްކަތް ކުރަމުންދަނީ މި އުސޫލު ބަދަލުކޮށް، މިސްކިތުގައި ޔަހޫދީންނަށްވެސް އަޅުކަން ކުރުމުގެ ފުރުސަތު ހޯދުމަށެވެ.
އެހެންނަމަވެސް އަލްޓްރާ އޯތޮޑޮކްސް ޔަހޫދީންގެ އިސް ރައްބީންވެސް ވަނީ މިސްކިތުގައި ޔަހޫދީން އަޅުކަން ކުރުމާއި ދެކޮޅު ހަދާފައެވެ.
ފަލަސްތީނުން ބުނަމުންދަނީ، މުސްލިން ނޫން މީހުންނަށް މިސްކިތުގައި އަޅުކަން ކުރުމުގެ ފުރުސަތު ދީފިނަމަ، މި މިސްކިތުގެ މިނިވަކަން ދެމެހެއްޓުމަށް ވެފައިވާ އުސޫލުތައް ބަދަލުވެ، އޭގެ ނަތީޖާއެއްގެ ގޮތުން ހައްދު ފަހަނައަޅާއި ކަނާތުފިޔައި ޔަހޫދީން މިސްކިތް ހުރި ތަނުގައި ޔަހޫދީންގެ ޓެމްޕްލްއެއް ބިނާކުރުމަށް ގޮވަމުންދާ ގޮވާލުންތަކަށް ބާރު ލިބިގެން ހިގައިދާނެއެވެ.
އިސްރައީލުގެ ކުރީގެ ބޮޑުވަޒީރު އެރިއެލް ޝެރޯން 2000 ވަނައަހަރު މިސްކިތް ހިމެނޭ ސަރަހައްދަށް ވަނުމާއެކު އުފެދުނު ހަމަނުޖެހުންތަކުގައި ފަލަސްތީނުގެ ދެވަނަ އިންތިފާޟާ ފެށިގެން ދިޔައެވެ.
