ރައީސް ޔާމީން މިނިވަން ކުރުމަށް ގޮވާލައި އިދިކޮޅު ކޯލިޝަނުން ކުރަމުންދާ ސިލްސިލާ މުޒާހަރާތައް ހުއްޓާލާނީ ރައީސް ޔާމީން މިނިވަން ކުރުމަށް ފަހުގައި ކަމަށް މާލެ ސިޓީ ކައުންސިލްގެ މޭޔަރު ޑރ.މުހައްމަދު މުއިއްޒު ވިދާޅުވެއްޖެއެވެ.
މޭޔަރު މުއިއްޒު ހައްޔަރު ކޮށްފައިވަނީ ކުރީގެ ރައީސް ޔާމީން ޖަލަށްލުމާ ގުޅިގެން ރައީސް ޔާމީން މިނިވަން ކުރުމަށް ގޮވާލާ އިދިކޮޅުން މާލޭގެ މަގުތަކުގައި ކުރިއަށް ގެންދިޔަ މުޒާހަރާގެ ތެރެއިންނެވެ. ހައްޔަރުކުރުމަށްފަހު ދޫކޮށްލުމުން ނޫސްވެރިންނާ ވާހަކަ ދައްކަވަމުން މުއިއްޒު ވިދާޅުވީ ކުރިއަށް އޮތް ތަނުގައި މުޒާހަރާތައް އިތުރަށް ވަރުގަދަވާނެ ކަމަށާއި މީހުން ހައްޔަރުކޮށް ބިރު ދައްކަން އުޅުނަސް ކަންބޮޑުނުވާ ކަމަށެވެ.
މުއިއްޒު ވިދާޅުވީ މުޒާހަރާގެ ބައިވެރިން އަބަދުވެސް އަމަލުތައް ބަހައްޓަނީ ގާނޫނީ އިމުގެ ތެރެއިން ކަމަށެވެ. އަދި ކުރިއަށް އޮތް ތަނުގައި މި އިހްތިޖާޖު މިއަށް ވުރެ ވަރުގަދަ ވެގެން ދާނެ ކަމަށް މުއިއްޒު ވިދާޅުވިއެވެ.
ރައީސް ޔާމީން މިނިވަން ކުރުމުގައި އަޅުގަނޑުމެން އެންމެން މި ކުރާ މަސައްކަތް ކުރިއަށް ދާނެ. އިރާދަކުރެއްވިއްޔާ އަޅުގަނޑުމެން މަސައްކަތް ހުއްޓާލާނީ އެމަނިކުފާނު މިނިވަންކޮށްފަ.
– މުއިއްޒު ވިދާޅުވިއެވެ.
މި ސަރުކާރު ގޮތް ހުސްވެފައިވާ ކަން ފާހަގަ ކުރައްވައި މުއިއްޒު ވިދާޅުވީ އިދިކޮޅުން މަގުމައްޗަށް ނުކުންނަން ޖެހުނީ ޔާމީންގެ މައްޗަށް ހަރާމް ހުކުމެއްކޮށް އެމަނިކުފާނު އެކަހެރިކޮށްފައިވުމުން ކަމަށެވެ. އިދިކޮޅު ފަރާތްތަކުގެ އަޒުމް ވަރުގަދަވަނީ މިކަހަލަ ނާތަހުޒީބު ފިނޑި އަމަލުތަކުގެ ސަބަބުން ކަމަށް ވިދާޅުވިއެވެ.
ޑރ. މުއިއްޒު ވިދާޅުވީ މިހާރު އިދިކޮޅުން ކުރިއަށް ގެންދާ މުޒާހަރާތަކަކީ ގާނޫނު އަސާސީގައިވާ ހިޔާލުފާޅުކުރުމުގެ މިނިވަންކަމާއި، ސުލުހަވެރިކަމާ އެކީ އެއްވެ އުޅުމުގެ މިނިވަންކަމުގެ ތެރެއިން ކުރިއަށްގެންދާ މުޒާހަރާތަކެއް ކަމަށެވެ. އެމްޑީޕީއަކީ މުޒާހަރާކުރުމަށާއި ހިޔާލުފާޅުކުރަން ޖާގަ ދޭނެ ކަމަށް ބުނާ ޕާޓީއަކަށް ވެފައި، އެ ޕާޓީގެ ވެރިކަމުގައި އިދިކޮޅަށް އެ ފުރުސަތު ލިބިގެން ނުދާތީ ޑރ. މުއިއްޒު ކަންބޮޑުވުން ފާޅުކުރެއްވެވިއެވެ. އޭނާ ތުހުމަތު ކުރެއްވި ގޮތުގައި މުޒާހަރާތައް ހުއްޓުވައި މީހުން ހައްޔަރުކުރަނީ ސަރުކާރުން އަންގައިގެންނެވެ.
