ފިލްމު "ލީނާ" އާއި "އަނދިރިކަން" އަދި "ވީބޭވަފާ" ފަދަ ފިލްމުތަކުގެ ސްކްރީން ޕްލޭ ލިޔެދީފައިވާ މަޝްހޫރު ސްކްރީން ރައިޓަރު އަހުމަދު ޒަރީޒުގެ ފުރަތަމަ ޑައިރެކްޝަން "ބީވީމާ" ގެ ޓްރެއިލާ އާއި ޕޯސްޓަރު ދައްކާލައިފި އެވެ.
ޕޯސްޓަރާއި ޓްރެއިލާ ދައްކާލާފައި ވަނީ އެކަމަށްޓަކައި ރޭ "އެމްއެސްއީ ހަބް" ގައި ބޭއްވި ރަސްމިއްޔާތެއްގައެވެ. މި ރަސްމިއްޔާތުގައި ޑާކްރެއިންގެ ބާނީ، އަދި ޕްރޮޑިއުސަރު މުހަންމަދު އަލީ (މޮގާ) ބުނީ ފިލްމު މިހާރު އޮތީ ވަރަށް ފުރިހަމަކޮށް ކަމަށެވެ. އަދި ބެލުންތެރިން މާޔޫސްވާވަރު ނުވާނެކަމުގެ ޔަގީންކަން މޮގާ ދިނެވެ.
އަންނަ ފެބްރުއަރީ މަހު އޮލިމްޕަސް ސިނަމާ އަށް ގެންނަން ނިންމާފައިވާ މި ފިލްްމަކީ ކޯވިޑްގެ ވަބާއަށް ފަހު އޮލިމްޕަސް މަރާމާތު ކުރުމަށްފަހު ހުޅުވާލާ ފިލްމްވެސްމެއެވެ. ޑާކް ރެއިން އެންޓަޓައިންމަންޓްގެ ކުޑައިގެދަށުން ގެނެސްދޭ މިފިލްމަކީ މަޝްހޫރު ލަވަކިޔުންތެރިޔާ އަޝްފާ އެކްޓިން އަށް ނުކުންނަ ފިލްމެވެ.
ފެބްރުއަރީ މަހުގެ 6 ވަނަ ދުވަހު ސިނަމާތަކަށް ގެންނަން ހަމަޖެހިފައިވާ މި ފިލްމުގެ ޓިކެޓް ބުކިންނަށް ވެސް މިހާރު ވަނީ ހުޅުވާލައިފައެވެ. "ބީވީމާ" އަކީ މުހައްމަދު އަލީ (މޮގާ) އާއި އޭނާގެ އަންހެނުން އައިޝަތު ފުއާދު ތައުފީގް ޕްރޮޑިއުސްކުރާ ފިލްމެކެވެ.
ފިލްމުގެ ކާސްޓްގައި އަޝްފާގެ އިތުރުން އިސްމާއީލް ރަޝީދު (ކޮޕީ އިއްސެ) އާއި އަރަމުން އަންނަ ޒުވާން ބަތަލާ އައިމިނަތު ރަޝްފާ (އާޝާ) އަދިް އާދަމް ޒިދާން (ނާނަ) ހިމެނެ އެވެ.
ކޯވިޑްގެ ބަލިމަޑު ކަމުގެ ތެރޭގައި ދިމާވި އެކި އުނދަގޫތަކާއެކު ވެސް ފިލްމު ވަރަށް ފުރިހަމައަށް ނިންމާލެވިފައި ވާކަން، މި ފިލްމުން ޑައިރެކްޝަނަށް ނުކުއިތް ޒަރީޒު ވެސް ވަނީ ބުނެފައެވެ.
