އެމްޑީޕީގެ ދަފްތަރުން ފާއިތުވެދިޔަ އަހަރު 36 ހާސް މެމްބަރުން ވަކިކޮށްފައިވާކަމުގެ ތުހުމަތު ޕާޓީގެ އިސް ލީޑަރު، އަދި ރައީސުލްޖުމްހޫރިއްޔާ އިބުރާހިމް މުހައްމަދު ސާލިހަށް ނަޝީދު ކުރައްވައިފިއެވެ.
ނަޝީދު މިއަދު ކުރެއްވި ޓުވީޓެއްގައި ވިދާޅުވެފައިވަނީ، އެމްޑީޕީގައި މިހާރު އޮތް ލިސްޓު ސާފުކުރަން ޖެހޭއިރު، ރައީސް ސާލިހުވަނީ އެޕާޓީއަށް ކުރިން ވަދެފައިވާ، އެހެންނަމަވެސް ރައީސް ސާލިހަށް ވޯޓު ނުލާނެކަމަށް ބެލެވޭ މެމްބަރުން ޕާޓީގެ ދަފްތަރުން އުނިކޮށްފައި ކަމުގައެވެ.
MDP is about free and fair elections. Integral to this is a pre-decided voter list. But Pres Solih has expelled over 39k members from MDP in the past year. While the list needed cleaning up, he has removed all the original party members less likely to vote for him.
— Mohamed Nasheed (@MohamedNasheed) December 21, 2022
ނަޝީދުގެ ޓުވީޓުގައި ވިދާޅުވެފައިވަނީ އެމްޑީޕީން ގަބޫލުކުރާ އުސޫލަކީ މިނިވަން އިންސާފުވެރި އިންތިޚާބުތައް ބޭއްވުން ކަމަށާއި، މިނިވަން އިންސާފުވެރި އިންތިޚާބެއް ބޭއްވުމުގައި އެންމެ މުހިންމު ދައުރެއް އަދާކުރަނީ ސައްޙަ ވޯޓާރ ލިސްޓުކަމުގައެވެ.
ކުރިޔަށްއޮތް އެމްޑީޕީގެ ޕްރައިމަރީގައި ވާދަ ކުރެއްވުމަށް ރައީސް ސާލިހާއި ނަޝީދާ ދެބޭފުޅުންވެސް ތާއީދު ފޯމަށް ސޮއި ހޯއްދަވަމުން ގެންދަވާއިރު، ނަޝީދު ތުހުމަތު ކުރަަމުންދަނީ ޕާޓީގެ ދަފްތަރު ގަޑުބަޑު ކޮށްފައިވާ ކަމަށެވެ. އަދި ވިދާޅުވެފައިވަނީ ކުރިޔަށް އޮތް އެޕާޓީގެ ޕްރައިމަރީ ސައްޙަ ނުވާނެ ކަމަށެވެ.
އެހެންނަމަވެސް އެމްޑީޕީގެ ސެކެޓްރިއޭޓުން ނެރެފައިވާ ބަޔާނެއްގައި ބުނެފައިވަނީ އެޕާޓީގެ ދަފްތަރު ގަޑުބަޑު ކޮށްފައިވަނީ ކުރިން ކަމަށާއި، ޕާޓީގެ ދަފްތަރައި ގުޅޭގޮތުން ޕާޓީގެ ރައީސް ސުވާލު އުފެއްދުމުން ހިތާމަ ކުރާކަމަށެވެ.
އެމްޑީޕީގެ ޑެޕިއުޓީ ޗެއާ ޕާސަން އިބްރާހިމް ވަހީދު (އިބުރޭ) މިއަދު ވިދާޅުވެފައިވަނީ މެންބަރ ޝިޕް ސައްހަ ކުރުމަށް ތިން މަސް ދެވުނު ކަމަށާއި އެމްޑީޕީގެ 39،000 މީހުންގެ ތެރޭގައި އީސީގައި އެހެން ޕާޓީތަކުގެ ރަޖިސްޓަރީގައި އޮތް 17،156 މީހުން ތިބި ކަމަށެވެ.
އެގޮތުން އެމްޑީޕީގެ ވެބްސައިޓްގައިވާ ލިސްޓްގައި އީސީގެ ދަފްތަރުގައި އަދާލަތު ޕާޓީގެ މެމްބަރުންގެ ގޮތުގައި ހިމެނޭ 1211، ޑީއާރްޕީ 389، ޖޭޕީ 3788، އެމްޑީއޭ 1761، އެމްއެސްއެލްޑީޕީ 875، އެމްއާރްއެމް 1029، އެމްޓީޑީ 1048، ޕީއެންސީ 698، ޕީޕީއެމް 6357، އަދިި އީސީގެ ދަފްތަރުގައު އެއްވެސް ޕާޓީއެއްގައި ރަޖިސްޓްރީ ނުވާ 24،033 މީހުން ހިމެނޭ ކަމަށް އިބުރޭ ވިދާޅުވިއެވެ.
އިބުރޭ ވިދާޅުވީ އެހެން ޕާޓީ ތަކާއި އަމިއްލަ ގޮތުން އެމްޑީޕީ ކެންޑިޑޭޓުންނާ ވާފަކޮށް އިންތިހާބުވެފައިވާ 124 ކަންސިލަރުންނާ 101 ޑަބްލިޔު ޑީ ސީ މެންބަރުން ތިބި ކަމަށެވެ. އަދި އަސާސީ ގަވާއިދު ބުނާގޮތުން މި މީހުންގެ މެންބަރޝިްޕް ސައްހަ އެއް ނުވާނެ ކަމަށާއި، އަދި ނިޔާވެފައިވާ 800 އަށް ވުރެ ގިނަ މީހުންގެ ނަންވެސް އޮތް ކަމަށް އިބުރޭ ވިދާޅުވިއެވެ.
އެމްޑީޕީގެ ދަފްތަރުގެ މައްސަލަ ފެންމަތިވެފައި މި ވަނީ ވޯޓުލާ ދަފުތަރުން ސާޅީސްހާހާ ގާތަށް މެމްބަރުން އެންގުމަކާއިނުލައި ކުއްލިއަކަށް އުނިކުރުމުންނެވެ. އަދި މި މައްސަލަ ރައްޔިތުން މަޖިލީހުގެ ރައީސް މުހައްމަދު ނަޝީދު އެމްޑީޕީއަށް ހުށަހެޅުމުންނެވެ.
މިކަމާއި ގުޅިގެން އެމްޑީޕީން ބުނީ ޕާޓީގެ އަސާސީ ގަވާއިދާއި ގާނޫނީ ނިޒާމުގެ ތެރޭގައި ސިޔާސީ ޕާޓީތަކުގެ ގާނޫނުގައި ބުނާ ހަމަތަކާއި އުސޫލްތަކާ އެއްގޮތަށް ޕާޓީ ހިންގުމާއި މެމްބަޝިޕް ކަންތައް ބެލެހެއްޓުމަށް އެމްޑީޕީން އިސްކަންދޭ ކަމަށެވެ.
