މުސްލިމުންގެ މުޅި ހަޔާތުގެ މޮޓޯއަކަށް ވާންވާނީ ހެއުކަންކަން ކުރުމާއި ނުބައި ކަންކަމުން ދުރުހެލިވެ، ރައްކާތެރިވުމުގެ މައްޗަށް ބާރު އެޅުން ކަމުގައި މިއަދުގެ ހުކުރު ޚުޡުބާގައި ވިދާޅުވެއްޖެއެވެ.
"އިސްލާމް ދީނަކީ އެކުވެރިކަމުގެ ދީން" މި މައުޟޫއަށް ޚާއްސަ ކުރެވިގެންދިޔަ މިއަދުގެ ހުކުރު ޚުޡުބާގައި ބަޔާން ކޮށްފައިވާ ގޮތުގައި އާޚިރަތުގެ ބާއްޖެވެރިކަން އޮތީ އެގޮތުގައި ކަމަށާއި، އެ މަގުސަދު ނެތިވެ، އެކުވެރިކަމަކީ ހަމައެކަނި ދުނިޔަވީ ބޭނުންތަކެއް ނުވަތަ ނަފްސުގެ އެދުންތަކެއް ޙާސިލް ކުރުމަށް ބާރުއަޅާ ގުޅުމަކަށް ވެއްޖެނަމަ އެ އެކުވެރިކަން އާޚިރަތުގައި ވާނީ އަބާއްޖަވެރިކަމަކަށެވެ.
އަޅުގަޑުމެން މުސްލިމުންނަކީ، އެއްބަޑު އެއްބަފާ އުޚުއްވަތްތެރި ބަޔަކަށް ވީހިނދު، އެކަކު އަނެކަކަށް ދިމާވާ ކަންކަމުގައި އެހީތެރިވެ ހެއު ފޯރުވުމަކީވެސް އިސްލާމީ އުޚުއްވަތްތެރިކަމުގެ ވަރަށް މުހިންމު ކަމެކެވެ. އެކަކުގެ ބޭނުންތައް ދަނެ، ތިމާގެ އަމިއްލަ ހަޔާތް ބާއްޖަވެރިކުރަން އެދޭ ފަދައިން ތިބާގެ މުސްލިމް އަޚާގެ ޙަޔާތަށް އާރޯކަމާއި ބާއްޖަވެރިކަން ގެނައުމަށް މަސައްކަތް ކުރަން ޖެހެއެވެ. ތިމާގެ މުސްލިމް އަޚާ، ކާނެބޯނެ އެއްޗެއް ނެތިފައި ހުއްޓައި، އޭނާގެ ބޭނުންތައް ފުއްދައިދީފިނަމަ، ޤިޔާމަތްދުވަހު މާތްﷲ ތިބާގެ ބޭނުންތައް ފުއްދަވައި ދެއްވާނެއެވެ.
މިއަދުގެ ހުކުރު ޚުޡުބާގައި ވިދާޅުވެފައި ވެއެވެ.
ހުކުރު ޚުޡުބާގައި ވިދާޅުވެފައިވަނީ، އިސްލާމީ އުޚުއްވަތްތެރިކަމާއި އެކުވެރިކަމަކީ އޭގެ ސަބަބުން ތިމާ ބޭނުންޖެހިފައިވާ ޙާލުގައިވެސް ތިމާގެ އަޚުންނާއި އެކުވެރިންނަށް އިސްކަންދޭން ދަސްކޮށްދޭ ކަމެކެވެ. މިގޮތުން ތިމާގެ އެކުވެރި މުސްލިމް އަޚުންނަށްޓަކާއި ހެޔޮ ދުޢާ ކުރުމަށް ޚުޡުބާގައިވަނީ ގޮވާލައްވާފައެވެ.
މިގޮތުން ކޮންމެ އިންސާނަކީވެސް އެހެން މީހުންގެ އެހީތެރިކަމާއި އަޅައިލުމަށް ބޭނުންވާނެ މީހެއްކަން ހަނދާން ކޮށްދެމުން، މުސީބާތާއި ތަކުލީފުގެ ވަގުތުގައި އެހެން މީހުންގެ ހިތާމަތަކުގައި ބައިވެރިވާން ޖެހޭކަމުގައި ޚުޡުބާގައި ވިދާޅުވެފައި ވެއެވެ.
