ޖިންސީ ނިޔަތެއް އޮވެގެން ކުޑަކުއްޖެއްގެ ގައިގާ އަތްލީކަން ސާބވިތުވެ ދިވެހި ފިރިހެނަކު 10 އަހަރަށް ޖަލަށްލާން ޙުކުމްކޮށްފިއެވެ.
މިމައްސަލާގައި ކްރިމިނަލްކޯޓުން ޙުކުމްކުރީ ކ. މާފުށި, ނަސްރީރުގެ، މުޙައްމަދު ޝައިބާންގެ މައްޗަށެވެ. އޭނާގެ މައްޗަށް ތުުމަތުކުރާ ކުށުގެ ޙާދިސާ ހިނގާފައިވަނީ 2020ވަނަ އަހރުގައެވެ. ކުޑަކުއްޖާ ދިރިއުޅުގޭގެ ކޮޓަރިއެއްގެ ތެރޭގައި އޭނާ ޖިންސީ ނިޔަތެއްގައި އެކުއްޖާގެ ގައިގާ އަތްލައި އެކަމަށް މަސައްކަތްކޮށްފައިވާކަން ވަނީ ސާބިތުވެފައެވެ.
ދަށުކޯޓުގައި ކުރިއަށްދިޔަ މިމައްސަލައިގެ ޝަރީޢަތުގައި އޭނާ ވަނީ ދަޢުވާއަށް އިންކާރުކޮށްފައެވެ. އެހެންނަމަވެސް މި ދަޢުވާ އޭނާގެމައްޗަށް ސާބިތުކުރުމަށް ދައުލަތުން ހުށަހެޅި ހެކިންގެ ހެކިބަހާއި ޤަރީނާތަކުންނާއި ކުޑަކުއްޖާގެ ހެކިބަހުން ވަނީ އޭނާގެމައްޗަށް ކުށް ސާބިތުވެފައެވެ.
މިމައްސަލާގައި އޭނާ 10 އަހަރަށް ޖަލަށްލާން ޙުކުމްކުރިޔަސް، މިމައްސަލާގައި އޭނާ ބަންދުގައި ހުރިމުއްދަތު ޙުކުމުގެ މުއްދަތުން ކެނޑުމަށްފަހު ދެން އޭނާ ޖަލުގައި އިތުރަށް ހޭދަކުރަން ޖެހޭނީ 7 އަހަރާއި 4 މަސް ކަމަށް ވަނީ ކަނޑައަޅާފައެވެ.
