ފީފާ ވޯލްޑް ކަޕް 2022 ގެ ގްރޫޕް އޭގައި މުބާރާތް ބާއްވާ ގައުމު ކަމަށްވާ ގަތަރު އަތުން މޮޅުވެ ސެނެގާލުން ދެވަނަ ބުރަށް ދިޔުމުގެ އުންމީދު އާކޮށްފިއެވެ.
ހުކުރު ދުވަހުގެރޭ ކުޅުނު މި މެޗު ސެނެގާލުން ކާމިޔާބުކުރީ 1-3 ގެ ނަތީޖާއަކުންނެވެ. މި މެޗުގެ ފުރަތަމަ ހާފުގައި ސެނެގާލަށް ލީޑުނަގައިދިނީ ބުލާއޭ ޑިޔާއެވެ. މިއީ ގަތަރުގެ ޑިފެންޑަރު ބޫލެމް ކޫކީއަށް ހެދުނު ގޯހެއްގެ ފައިދާ ނަގާ ޑިއޭ ކާމިޔާބުކުރި ލަނޑެކެވެ.
ދެވަނަ ހާފު ފަށައިގެން ތިންވަނަ މިނެޓުގައި ސެނެގާލަށް ލީޑުފުޅާކޮށްދިނީ ފަމަރާ ދިއޭދޫއެވެ. މިއީ ލިބުނު ކޯނަރެއްގެ ބޭނުން ހިފާ އޭނާ ބޮލުން ކާމިޔާބުކުރި ލަނޑެކެވެ.
ސެނެގާލުގެ ދެ ލަނޑާއެކު ގަތަރު ޓީމުން ބަދަލުތަކެއް ގެނަސް ލަނޑެއް ޖެހޭތޯކުރި މަސައްކަތް އެ ޓީމަށް ކާމިޔާބުވީ މެޗުގެ 78 ވަނަ މިނެޓުގައެވެ. މި ލަނޑު އެޓީމަށް ޖަހާދިނީ ބަދަލު ކުޅުންތެރިއެއްގެ ގޮތުގައި ކުޅެންއެރި މުޙައްމަދު މުންތާރީއެވެ. މި ލަނޑާއެކު ގަތަރުން ކުރިއަށްޖެހި އިތުރު ލަނޑެއް ޖެހޭތޯ މަސައްކަތްކުރި ނަމަވެސް މެޗުގެ 84 ވަނަ މިނެޓުގައި ސެނެގާލުން ވަނީ އިތުރު ލަނޑެއް ޖަހާ ލީޑުފުޅާކޮށްފައެވެ. މި ލަނޑު އެޓީމަށް ކާމިޔާބު ކޮށްދިނީ ބަމްބާ ޑިއެންގްއެވެ.
މި މުބާރާތުގެ ފުރަތަމަ މެޗުން ސެނެގާލް ވަނީ ނެދަލަންޑްސް އަތުން ބަލިވެފައެވެ. އެކަމަކު ގަތަރު އަތުން ހޯދި މޮޅާއެކު ދެވަނަ ބުރުން ޖާގަ ހޯދުމުގެ އަމިއްލަ ބާރު ސެނެގާލަށް އެބައޮތެވެ.
