ބޮޑެތި މަސް ބޯޓުފަހަރު ތަކާއި ދާ ޖަހައިގެން އިންޑިއާ ކަނޑުގައި މަސްވެރިކަން ކުރަމުން ދިއުމުގެ ސަބަބުން އިންޑިއާ ކަނޑުގައި ހުރި މަހުގެ ސްޓޮކް ހުސްވަމުންދާ މައްސަލައަކީ ކަންބޮޑުވާންޖެހޭ މައްސަލައެއް ކަމަށާއި، އިންޑިއާ ކަނޑުގައި އިންޑަސްޓަރއަލް މަސްވެރިކަމުން އެކީއެކަށް ރައްކާތެރި ކުރެވިފައިވާ ހަމައެކަނި ސަރަހައްދަކީ ދިވެހިރާއްޖެއާއި ޗާގޮސް އާކިޕެލާގޯކަމަށާއި، މިގޮތުން ޗާގޮސް އާކިޕެލާގޯއަކީ ހިމާޔަތްކޮށްފައިވާ ސަރަހައްދެއްގެ ގޮތުގައި ނުވަތަ މެރިން ޕްރޮޓެކްޓެޑް އޭރިއާއެއްގެ ގޮތުގައި ބޭއްވުމަށް އިގިރޭސިވިލާތުން ދިވެހިރާއްޖެއާއި މަޝްވަރާ ކުރުމަށް ނަޝީދު ގޮވާލައިވައިފިއެވެ.
ނަޝީދުގެ އޮފީހުން މިއަދު އާންމު ކުރި ބަޔާނެއްގައި ވިދާޅުވެފައިވަނީ، ދިވެހިރާއްޖޭގައި ކުރެވެމުންދަނީ ދޮށީގެ މަސްވެރިކަމެއް ކަމުން، ރާއްޖޭގެ މަސްވެރިކަމަކީ ދެމެހެއްޓެނިވި މަސްވެރިކަމަކަށް ވެފައިވާ ކަމުގައެވެ.
މިބަޔާބުގައި އިތުރަށް ނަޝީދު ވިދާޅުވެފައިވަނީ މުޅި ޗާގޮސް ސަރަހައްދަކީ ހިމާޔަތް ކޮށްފައިވަ ސަރަހައްދެއްގެ ގޮތުގައި ބޭއްވުމަށް އިނގިރޭސިވިލާތުން ނިންމާފައިވާ ނިންމުމަށް މަރުހަބާ ވިދާޅުވާކަމަށެވެ. އަދި މިހާރު އިނގިރޭސިވިލާތުގެ ބައެއްގެ ގޮތުގައި އޮތް ޗާގޮސްއަކީ ފަހުން އިސްތިއުމާރީ ވެރިކަން ހިނގާ ތަނެއްގެ ގޮތުގައި ހިމެނިގެން ނުދިޔަ ނަމަވެސް، މުޅި ޗާގޮސް ހިމެނޭ ސަރަހައްދަކީ ވަކި މުއްދަތެއް ނެތްގޮތަށް ހިމާޔަތް ކޮށްފައިވާ ސަރަހައްދެއްގެ ގޮތުގައި ބޭއްވޭނެ ގޮތްތަކާއި ގުޅޭގޮތުން އިނގިރޭސިވިލާތުން ދިވެހިރާއްޖެއާއި ވާހަކަ ދެއްކުމަށްވެސް ނަޝީދުގެ ބަޔާނުގައި ވަނީ ގޮވާލައްވާފައެވެ.
ނަޝީދު ވިދާޅުވެފައިވަނީ މި ސަރަހައްދަކީ ހިމާޔަތް ކުރެވިފައިވާ ސަރަހައްދެއްގައި ބޭއްވުމުގެ މަސައްކަތް ކުރިޔަށް ދާންވާނީ ދިވެހިރާއްޖެއާއި، މޮރިޝަސްއާއި، ސީޝެލްއާއި، ސްރީ ލަންކާ އަދި އިންޑިއާއިންވެސް އެއްބަސްވާ އުސޫލަކުން ކަމަށެވެ.
މިގޮތުން މި ސަބަބަށްޓަކާ، ދެމެހެއްޓެނިވި އުސޫލުތަކާއި ޚިލާފަށް މަސްވެރިކަން ކުރާ އެއްވެސް ފަރާތަކަށް އެއްވެސް ސަރަހައްދެއް ލިބިގެން ދިއުމަށް ދިވެހިރާއްޖެއިން އެއްބަސް ނުވުމަކީ ކޮންމެހެން މިހުންމުކަމެއް ކަމުގައިވެސް ނަޝީދު ވިދާޅުވެފައި ވެއެވެ.
