ފްރެންޗް ލީގުގައި ރޭ ކީލިއަން އެމްބާޕޭގެ ދެ ގޯލާ އެކު އުޖާކްސިއޯ އަތުން 3-0 އިން މޮޅުވެ، ޕީއެސްޖީ ލީގުގެ އެއް ވަނައިގައި ހަަމަޖެހިލައިފިއެވެ.
ޕީއެސްޖީ އިން ރޭގެ މެޗުގައި ލީޑު ނެގީ 24 ވަނަ މިނިޓުގައިއެވެ. މެސީ ދިން ތުރޫ ޕާހަކުން މި ލަނޑު ޖެހީ އެމްބާޕޭއެވެ. ފުރަތަމަ ހާފުގައި ޕީއެސްޖީ އަށް ލީޑު ފުޅާކުރަން އިތުރު ފުރުސަތުތައް ލިބުނު ނަމަވެސް ކާމިޔާބެއް ނުވިއެވެ. އެމްބާޕޭ އަށް ހުސްކޮށް ލިބުނު އިތުރު ފުރުސަތެއްގައި އޭނާ ފޮނުވާލި ހަމަލާ ވެސް ދިޔައީ ގޯލު މަތިން ބޭރަށެވެ.
ޕީއެސްޖީން ލީޑުފުޅާކުރީ މެޗުގެ 78 ވަނަ މިނިޓްގައި މެސީ ޖެހި ގޯލުންނެވެ. އެމްބާޕޭ ދިން ބޯޅަ އޭރިއާތެރެއިން ކޮންޓްރޯލް ކުރުމަށް ފަހު މެސީ ވަނީ ކީޕަރު ބެންޖަމިން ކައިރިން ނައްޓާފައި ގޯލަށް ބޯޅަ ފޮނުވާލައިފައެވެ. އޭގެ ތިން މިނިޓް ފަހުން، މެސީ ދިން ބޯޅަ އަކުން އެމްބާޕޭ ވަނީ ޕީއެސްޖީގެ ތިން ވަނަ ގޯލު ޖަހައިފައެވެ.
ރޭގެ މެޗާ އެކު އެމްބާޕޭ ވަނީ ލީގުގައި މިހާތަނަށް 10 ގޯލު ހަމަކޮށް، ނުވަ ގޯލު ޖަހައިފައިވާ އެޓީމުގެ ނޭމާ އާއި، ލިލް އަށް ކުޅޭ ކެނެޑާގެ ޒުވާން ފޯވާޑް ޖޮނަތަން ޑޭވިޑް، ލަނޑު ލިސްޓުގެ ފަހަތަށް ޖައްސާލައިފައެވެ.
ޕީއެސްޖީ އެއް ވަނައިގައި އޮތީ 12 މެޗުން 32 ޕޮއިންޓާ އެކުއެވެ. ދެ ވަނައިގައި އޮތް ލޮރިއެންޓަށް 11 މެޗުން ލިބިފައިވަނީ 26 ޕޮއިންޓެވެ. ތިން ވަނައިގައި އޮތް ލެންސަށް 11 މެޗުން ވަނީ 24 ޕޮއިންޓް ލިބިފައެވެ.
