އިނގިރޭސިވިލާތުގެ ބޮޑުވަޒީރު ލިޒް ޓްރަސް މަގާމާ ހަވާލުވިތާ މަދު ދުވަސްކޮޅެއްގެ ތެރޭގައި އޭނާގެ އިގުތިސާދީ ސިތާސަތުތަކުގެ ނަތީޖާ ގޯސްވެ، އޭނާގެ އިސްތިއުފާއަށް ގާނޫނުހަދާ މަޖިލިހުގެ މެމްބަރުން ޑިމާންޑް ކުރާން ފެށުމާއި ގުޅިގެން، ބޮޑެތި ޕްރެޝަރތަކާއި ކުރިމަތިލާންޖެހި، މަގާމް ގެއްލިދާނެ ކަމުގެ ބިރު ބޮޑުވެއްޖެއެވެ.
އިނގިރޭސި ގާނޫނުހަދާ މަޖިލިހުގެ އިތުބާރު ނެތިގެން މަގަމާމުން އިސްތިއުފާދެއްވި ކުރީގެ ބޮޑުވަޒީރު ބޮރިސް ޖޯންސަންއަށްފަހު ބޮޑުވަޒީރުކަމާ ހަވާލުވެ ވަޑައިގެންނެނެވި، އެގައުމުގެ ކުރީގެ ފޮރިން ސެކެޓްރީ ބޮޑުވަޒީރުކަމުގެ މަގާމާ ހަވާލުވެވަޑައިގެންނެވީ ފާއިތުވެދިޔަ ސެޕްޓެމްބަރު މަހުގެ 6 ވަނަ ދުވަހުއެވެ. އެއީ 96 އަހަރުގެ އިނގިރޭސި ރާނީ ކުއީން އެލިޒަބަތު އަވަހާރަ ވުމުގެ 2 ދުވަސް ކުރިންނެވެ.
މިހާރު ކުރިމަތިވެވަޑައިގެންފައިވާ ޕްރެޝަރުތަކާއެކު ލިޒް ޓްރަސް މަގާމުން އިސްތިއުފާ ދެއްވައިފިނަމަ އޭނާ ވެވަޑައިގަންނަވާނީ އިނގިރޭސި ތާރީޚުގައި އެންމެ ކުރު މުއްދަތަކަށް ބޮޑުވަޒީރުކަން ކުރައްވާ ބޭފުޅާ ކަމުގައެވެ.
ލިޒް ޓްރަސް އިނގިރޭސި ބޮޑުވަޒީރުކަމާއި ހަވާލުވެވަޑައިގެންނެވީ، އިނދަޖެހެމުންދާ އެގައުމުގެ އިގްތިސާދުން އަލުން ކޮޅަށް ޖައްސަވާނެކަމުގެ ވައުދާ އެކީއެވެ. މި ގޮތުން އާންމު ޚިދުމަތްތަކަށް ކުރާންޖެހުނު ބޮޑެތި ހޭދަތަކަށް ދައުލަތުގެ މާލިއްޔަތަށް އާމްދަނީ އިތުރު ކުރުމަށްޓަކާ، ކުރީގެ ބޮޑުވަޒީރުގެ ވެރިކަމުގައި ޓެކްސް ބޮޑުކޮށް، ގެނެސްފައިވާ ބަދަލުތައް އުވާލާ ޓެކްސް ކުޑަކުރައްވާނެކަމަށް، ބޮޑުވަޒީރުކަމަށް ވަޑައިގަތުމަށް އަމިއްލަފުޅު ޕާޓީގެ އެތެރޭގައި ކުރެއްވި ކެމްޕޭންގައި ލިޒް ޓަރަސް ވަނީ ވިދާޅުވެފައެވެ. އޭގެ އެންމެ ބޮޑު އަމާޒެއްކަމަށް ވިދާޅުވަމުން ގެންދެވީ އިނގިރޭސިވިލާތުގެ އިގްތިސާދުގެ ދުވެލި ބާރު ކުރެއްވުމެވެ.
އެހެންނަމަވެސް ބޮޑުވަޒީރުކަމާއި ހަވާލުވެ ވަޑައިގަތުމަށްފަހު ޓެކްސް ކުޑަކުރެއްވުމުގެ ނަތީޖާއަކަށް ވެގެން ދިޔައީ ޕައުންޑު އަގުވެއްޓި، އިންޓަރނޭޝަނަލް މަނިޓަރީ ފަންޑުންވެސް އިނގިރޭސި ސަރުކާރުގެ މި ސިޔާސަތުތަކަށް ތާއީދު ނުކުރާނޭކަން ހާމަ ކުރުމެވެ. މަނިޓަރީ ފަންޓުން ބުނެފައިވާ ގޮތުގައި މި ބަދަލުތަކުގެ ސަބަބުން އިނގިރޭސިވިލާތުގައި މުއްސަދިންނާއި ފަގީރުންގެ ތަފާތު ދާނީ ބޮޑުވަމުން ކަމުގައެވެ.
ނަތީޖާއެއްގެ ގޮތުން، ޓަރަސްވަނީ ފަހުންވަނީ އޭނާ ގެންނެވި އިގްތިސާދީ ބަދަލުތަކަކީ ހެއްދެވުނު ގޯހެއްކަމަށް ވިދާޅުވެ، ގިނަ ނިންމެވުންތައް އަބުރާ އިއާދަ ކޮށްފައެވެ. އަދި އޭނާވަނީ މި ބަދަލުތައް ގެނެވުނީ "މާ އަވަސްކޮށް، އަދި މާ ބޮޑަށް" ކަމަށް ގަބޫކުރައްވާ ވިދާޅުވެ ރައްޔިތުންގެ ކިބައިން މާފަށްވެސް އެދިފައެވެ.
އެ ބަދަލުތަކާއި ޓްރަސްގެ ސަރުކާރުގެ ޗާންސެލަރ ކަމުގެ މަގާމުގައި ހުންނެވި ޗާންސެލަރ އޭނާވަނީ މަގާމުން ވަކިކޮށްފައެވެ. އެއާއެކު ޓަރަސްގެ އިސްތިއުފާގެ އަޑު ގަދަވާން ފަށާފައިވަނިކޮށް، އިއްޔެގެ ވަގުތެއްގައި އޭނާގެ ސަރުކާރުގެ ހޯމް ސެކެޓްރީ ވަނީ އިސްތިއުފާ ދެއްވާފައެވެ.
އެހެންނަމަވެސް ގާނޫނުހަދާ މަޖިލިހުގައި އޭނާގެ އިސްތިއުފާއަށް ޑިމާންޑް ކުރާ ފަރާތަތަކަށް އޭނާ ދެއްވާފައިވާ ޖަވާބަކީ، "އަހަރެންނަކީ ހަނގުރާމަވެރިއެއް، އިސްތިއުފާ ދީފަ ފިލަން ދުވާ މީހެއް ނޫން،" ކަމުގައެވެ. އޭނާ ވިދާޅުވަމުން ގެންދަވަނީ، ދެން އަންނަ އިންތިޚާބަކާއި ހަމައަށް މަގާމުގައި ދެމިހުންނަވާނެ ކަމުގައެވެ.
