ދިވެހި ރާއްޖޭގެ ޓުވަރިޒަމަށް އެންމެ ބޮޑު ގެއްލުމެއް ދިން ބަޔަކީ އެމްޑީޕީކަން މާޒީގެ ސަފުހާތަކަށް ބަލައިމުން ފެންނަން ހުންނާނެކަމަށް ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވެއްޖެއެވެ.
ރާއްޖޭގެ ފަތުރުވެރިކަމަށް 50 އަހަރު ފުރުން ފާހަގަ ކުރަމުންދާއިރު، ވެރިކަމުގައި އިސްކޮށް ތިއްބެވި އެމްޑީޕީން މާޒީގައި ފަތުރުވެރިކަން ބޮއިކޮޓް ކުރުމަށް ކުރި ކަންކަން ފާހަގަކޮށް ޝިޔާމް ކުރެއްވި ޓުވީޓެއްގައި ވިދާޅުވީ ރާއްޖޭގެ ފަތުރުވެރިކަމަށް 50 އަހަރު ފާހަގަކުރާއިރު އެންމެ ބޮޑު ގެއްލުމެއް ރާއްޖޭގެ ތާރީހުގައިވެސް ފަތުރުވެރިކަމަށް ދިން ބަޔަކީ މިއަދު ވެރިކަން ކުރާ މައި ޕާޓީ އެމްޑީޕީކަމަށެވެ.
ރާއްޖޭގެ ޓުވަރިޒަމަށް 50 އަހަރު ފުރިގެން އެމްޑީޕީ ސަރުކާރުން އެކަން މިއަދު ފާހަގަ ކުރާއިރު މާޒީގެ ސަފުހާތައް ބަލާލީމާ އެނގޭ އެންމެބޮޑު ހަގީގަތަކީ ދިވެހި ރާއްޖޭގެ ޓުވަރިޒަމަށް އެންމެ ބޮޑު ގެއްލުމެއް ދިން ބަޔަކީ އެމްޑީޕީކަން.
– ޝިޔާމް ވިދާޅުވިއެވެ.
ރައީސް ޔާމީންގެ ސަރުކާރުގައިވެސް އޭރު އިދިކޮޅުގައި ތިއްބެވި ފަރާތްތަކުން އިސްވެ ވަނީ ރާއްޖެއަށް ޓޫރިސްޓުން ނައުމަށް ގޮވާލާ ކެމްޕެއިން ކުރައްވާފައެވެ. އަދި ރާއްޖެ ބޮއިކޮޓްކުރުމަށް އެކި ފޯރަމްތަކުގައި ވާހަކަ ދައްކާފައިވެސްވެއެވެ.
މީނޫނަސް ރައީސް ވަހީދުގެ ވެރިކަމުގައިވެސް އެމްޑީޕީން ވަނީ ދުނިޔޭގެ ބޮޑެތި ގައުމުތަކުގައި ރާއްޖެއާއި ދެކޮޅަށް އަޑުއުފުލައި ރާއްޖެއަށް ފަތުރުވެރިން ނުފޮނުވުމަށް ގޮވާލަމުންނެވެ. މިގޮތުން އިނގިރޭސި ވިލާތާއި، ސްރީލަންކާއާއި، އިޓަލީ ވިލާތްފަދަ ގައުމުތައްވެސް ހިމެނެއެވެ.
