އިންޑިއާގެ ޓީވީ އިންޑަސްޓްރީގައި އެންމެ ނަން ހިގާ އެއް ޕްރޮޑިއުސަރު އެކްތާ ކަޕުރާއި އޭނާގެ މަންމަ ޝޯބާ ކަޕޫރް ހައްޔަރުކުރަން ބިހާރުގެ ކޯޓަކުން އަމުރެއް ނެރެފި އެވެ.
އެކްތާއާއި އޭނާގެ މަންމަ ކޯޓަށް ހާޒިރުވުމަށް އަންގާފައިވަނީ ވެބް ސީރީޒެއްގައި ސިފައިންގެ ބަޔަކާއި، އެ މީހުންގެ އާއިލާއަށް ހުތުރުވާ ގޮތަށް މަންޒަރުތަކެއް ގެނެސްދިން ކަމަށް ބުނެ ކޯޓަށް ހުށަހެޅި މައްސަލައަކާ ގުޅިގެންނެވެ.
އެ މީހުންގެ ސްޓްރީމިން ޕްލެޓްފޯމް އޯލްޓް ބާލާޖީގެ 2020 ގެ "ޓްރިޕް އެކްސް" ގައި ގެނެސްދިން މަންޒަރުތަކެއްގެ މައްސަލަ ކޯޓަށް ހުށަހެޅީ ކުރިން ސިފައިންގެ މީހެއްގެ ގޮތުގައި މަސައްކަތްކުރި ޝުމްބާ ކުމާރެވެ.
ކުމާރު ހުށަހެޅި މައްސަލާގައި ބުނެފައިވަނީ ސީރީޒެއްގެ ދެވަނަ ސީޒަންގައި ސިފައިންގެ މީހާގެ އަންހެނުންނަށް ހުތުރުވާ ގޮތަށާއި ދެރަވާ ގޮތަށް ގިނަ ސީންތަކެއް ގެނެސްދީފައިވާ ކަމަށެވެ.
މި މައްސަލަ ކޯޓުން ބަލައި ގަނެ، އެކްތާ އާއި ޝޯބާ ހައްޔަރުކުރަން ކޯޓް އަމުރެއް ނެރުނީ ބިހާރު ކޯޓްގެ ފަނޑިޔާރު ވިކާސް ކުމާރެވެ.
މި މައްސަލައިގައި އެކްތާ ހައްޔަރު ކުރުމަށް ނިންމާފައިވަނީ ސީރީޒަކީ "ބާލާޖީ ޓެލެފިލުމުސް" ގެ ސީރީޒަކަށް ވާތީއެވެ. އަދި އެކްތާގެ މަންމަ ޝޯބާއަކީ ވެސް "ބާލާޖީ ޓެލެފިލުމުސް" ގެ ހިއްސާ އޮންނަ ފަރާތެކެވެ.
އަމުރު ނެރެފައި ވަނީ މި މައްސަލާގައި އެ މީހުން ކޯޓަށް ހާޒިރުވާން އެންގުމުން ހާޒިރުވެފައި ނުވާތީ ފުލުހުންްގެ ބަންދުގައި ބައިތިއްބައިގެން ކޯޓަށް ހާޒިރުކުރުމަށެވެ.
ޓެލެވިޒަން އިންޑަސްޓްރީގެ އިތުރުން އެކްތާ އަކީ ބޮލީވުޑްގައި ވެސް ނަން ހިގާ މަޝްހޫރު ޕްރޮޑިއުސަރެކެވެ.
ކޮމެންޓު ފޮނުވާ