ފުލުހުންގެ ފްލެޓްތައް މުއްދަތަކަށް ނުނިންމުނު، އަނެއްކާވެސް އިތުރު މުއްދަތެއް ދީފި

ފުލުހުންގެ "ޕޮލްކޯ" ފްލެޓްތައް، 8 މަސްދުވަހުގެ މުއްދަތުގައި ނިންމުމަށް އަމިން ކޮންސްޓަރަކްޝަނާއި ހަވާލުކުރިނަމަވެސް، އެއްބަސްވެފައިވާ ތާރީޚަށް ނުނިންމި، އަނެއްކާވެސްއައު ތާރީޚެއް ދީފިއެވެ.

އަމީން ކޮންސްޓްރަކްޝަނާ ހަވާލުކޮށްފައިވަނީ ފުލުހުންގެ 361 ހައުސިންގ ޔުނިޓްގެ ފިނިޝިންގ މަސައްކަތް 8 މަސްދުވަހުގެ ތެރޭގައި ނިންމުމަށެވެ. މިޔުނިޓްތަކަކީ 1100 އަކަފޫޓުގެ ޔުނިޓްތަކެކެވެ. މިއީ މުޅިންވެސް 3 ކޮޓަރީގެ އެޕާޓްމަންޓްތަކެވެ. މިމަސައްކަތްތައް ނިންމުމަށް އަމީން ކޮންސްޓްރަކްޝަންއާ ހަވާލުކޮށްފައިވަނީ 274.5 މިލިއަން ރުފިޔާއަށެވެ.

ފްލެޓްތައް ނިންމުމަށްޓަކައި ކަނޑައި އެޅިފައިވާ ތާރީހަށް ނިންމުމަށްޓަކައި ހުރި ގޮންޖެހުންތަކާއިއެކުވެސް އަމީން ކޮންސްޓްރެކްޓަރުން މަސައްކަތް ކުރަމުންދާކަމަށް ޕްލޭނިން މިނިސްޓަރ މީގެ ކުރިން ވިދާޅުވެފައިވެއެވެ.

އެއްބަސްވުމުގައިވާ ގޮތުން އިއްޔެއަށް މަސައްކަތް ނިންމަން ޖެހެއެވެ. ނަމަވެސް މަސައްކަތް އެއްކޮށް ނިންމާލެވިފައިނުވާތީ އަނެއްކާ ވެސް މުއްދަތު އިތުރުކުރުމަށް ނިންމާފައިވާ ޕްލޭނިން މިނިސްޓްރީން މިއަދު ވަނީ ބުނެފައެވެ. ނަމަވެސް އެކުންފުންނަށް އެ ފްލެޓްތައް ނިންމަން ދިނީ ކިހާ މުއްދަތެއްކަމަށް ސާފެއް ނުވެއެވެ.

ފުލުހުންނާއި ސިފައިންނަށް ޚާއްސަކޮށްގެން 691 އެޕަރޓްމަންޓްގެ 3 ޓަވަރު އެޅުމަށް ހަވާލުކުރީ 2013ވަނަ އަހަރުއެވެ. މީގެ ޢަމަލީ މަސައްކަތް އޭގެ އަނެއް އަހަރުވަނީ ފަށާފައެވެ. ފްލެޓްތަކުގެ ކޮންކްރީޓް މަސައްކަތްތައް ނިމިފައިވަނިކޮށް، މި މަސައްކަތުގެ ކޮންޓްރެކްޓަރ "ނޫމަޑި"އާއެކު ވެފައިވާ އެއްބަސްވުން އޭރުގެ ސަރުކާރުން އުވާލީ މާލީ ދަތިކަމުގެ ސަބަބުން ކަމަށް ބުނެ 2016ވަނަ އަހަރުއެވެ. ފްލެޓް ލިބޭ ސިފައިންނާ ފުލުހުންގެ ލިސްޓުވެސް އޭރު އޮތީ އާއްމުކޮށްފައެވެ.

އޭގެ ފަހުން ފާއިތުވި 5 އަހަރުވެސް އެ ފްލެޓްތަކުގެ އެއްވެސް މަސައްކަތެއް ކުރިއަށް ގެންގޮސްފައެއް ނުވެއެވެ.

ހައުސިިން ޔުނިޓްތައް އެޅުމަށް ނޫމަޑިއާއެކު 2013 ވަނަ އަހަރު ހެދި އެއްބަސްވުން، ކުރީގެ ރައީސް އަބްދުﷲ ޔާމީންގެ ސަރުކާރުގައި ބާތިލްކޮށްފައިވަނީ، އެއްބަސްވުމާ ޚިލާފުކަމަށްބުނެ ނޫމަޑި އިން މައްސަލަ އަރބިޓްރޭޝަނަށްވެސް ހުށައެޅިއެވެ. 155 މިލިއަން ޑޮލަރު ހޯދަން ނޫމަޑިން އާބިޓްރޭޝަނަށް ހުށަހެޅުމުން ސަރުކާރުން ވަނީ އާބިޓްރޭޝަނުން ބޭރުގައި މަޝްވަރާކޮށް، ބަދަލުގެ ގޮތުގައި 55 މިލިއަން ޑޮލަރު ނޫމަޑިއަށް ދީފައެވެ. އެ ފައިސާ ދެ ކުންފުންޏަށް ސަރުކާރުންވަނީ ދައްކާފައެވެ.