"ޕުޝްޕާ"ގެ ބޮޑު ކާމިޔާބީއާ އެކުގައި ބޮލީވުޑުން ފުރުސަތުތައް އޮހެމުން އަންނަ ކަމަށް މީގެ ކުރިން ޒުވާން ބަތަލާ ރަޝްމިކާ މަންދަނާ ވަނީ ބުނެފައެވެ.
އަދި ވަރަށް ވިސްނައިގެން އޭނާ ވަނީ ފިލްމަކަށް ސޮއިކޮށް، މިހާރު ފިލްމުގެ މަސައްކަތް ނިމި ސިނަމާ ތަކުގައި އަޅުވަން ވަނީ ތައްޔާރު ވެފައެވެ. އެ ފިލްމު ރަޝްމިކާ ކުޅެފައިވަނީ ބޮލީވުޑްގެ ލެޖެންޑް އަމިތާބް ބައްޗަން އާއި އެކުގައެވެ. އެ ފިލްމަކީ އަންނަ މަހުގެ 7 ވަނަ ދުވަހުގައި ރިލީޒް ކުރުމަށް ތާވަލް ކޮށްފައިވާ "ގުޑް ބާއި" އެވެ.
ރަޝްމިކާ މީގެ ކުރިން ބުނެފައިވަނީ އޭނާއަށް ބޮލިވުޑުން ފިލްމު ކުޅުމުގެ ފުރުސަތު ލިބުނީ "ޕުޝްޕާ" ހިޓް ވުމުން ކަމަށެވެ. ޕުޝްޕާ އަކީ މިދިއަ އަހަރުގެ ޑިސެމްބަރު މަހުގައި ރިލީޒް ކުރި އަދި މިއަހަރުގެ މިހާތަނަށް އެންމެ ކާމިޔާބު އެއް އިންޑިއާ ފިލްމު ވެސް މެއެވެ.
ރަޝްމިކާގެ ފިލްމު ރިލީޒް ވުމަށް ތައްޔާރުވެފައި ވާއިރުގައި އޭނާ ބުނެފައިވަނީ ބޮލީވުޑްގެ ފިލްމެއް ކުޅުމަށް އެއްބަސްވީ އަޖުމަ ބަލާލުމަށް ކަމަށެވެ.
ސައުތުގެ މަގުބޫލު ތަރި ބުނީ ބޮލީވުޑްގެ ފިލްމެއް ކުޅުމަށް އެއްބަސްވީ ބޮލީވުޑްގައި ހުރި ވަރެއް ބަލައިލަން ކަމަށެވެ. އަދި އޭނާ ފިލްމީ ދާއިރާގައި މަސައްކަތްކުރާތާ ފަސް އަހަރުވެފައިވާ ކަމަށާއި މިވަގުތު އޭނާ އެ އުޅެނީ އަޖުމަ ބެލުމުގެ މަރުހަލާއެއްގައި ކަމަށެވެ.
އޭނާ އަންނަނީ ވަރަށް ވިސްނައިގެން ސްކްރިޕްޓްތައް ކިޔަމުން ކަމުދާ ފިލްމެއް ކަމަށްވަންޏާ ސޮއި ކުރަމުން ކަަމަށް ވެސް ބުނެފައިވެއެވެ. އަދި މިހާރު އޭނާގެ ޑިމާންޑް ވަރަށް ބޮޑުވެފައިވުމުން ފިލްމަކަށް އެއްބަސް ވުމުގެ ކުރިން ވަރަށް ވިސްނަން ޖެހޭ ކަމަށްވެސް ރަޝްމިކާ ވަނީ ބުނެފައެވެ.
"ގުޑްބާއި"ގެ އިތުރުން ބޮލީވުޑްގެ އެހެން ފިލްމެއް ކަމުގައިވާ "މިޝަން މަޖުނޫ" އިން ވެސް ރަޝްމިކާ ފެނިގެން ދާނެއެވެ. މިޝަން މަޖުނޫގައި ރަޝްމިކާ އާއެކުގައި ފެނިގެންދާނީ ސިދާތު މަލްހޮތުރާ އެވެ.
