ފާއިތުވެދިޔަ ހަފްތާގައި އަވަހާރަވެފައިވާ، އިނގިރޭސި ރާނީ ކުއީން އެލިޒަބަތުގެ ޖަނާޒާ ރަސްމީ އިއްޒަތުގައި މިމަހުގެ 19ވަނަ ދުވަހު ބޭއްވުމަށް އިނގިރޭސިވިލާތުން ހަމަޖައްސައިފިއެވެ.
ރާނީ އަވަހާރަވެފައިވަނީ، އުމުރުން 96 އަހަރުގައި، އެމަނާގެ ރަނިކަމަށް 10 އަަހަރު ވެފައިވަނިކޮށް، ފާއިތުވެދިޔަ ހަފްތާގެ ބުރާސްފަތި ދުވަހުއެވެ. ރާނީ އަވަހާރަ ވެފައިވަނީ، އިނގިރޭސިވިލާތުގެ ސްކޮޓްލޭންޑުގެ ބަލްމޯރުގައި ހުންނަ އެކަމަނާ އެންމެ ގަޔާވި ގަނޑުވަރުގައެވެ.
އަދި މިއަދުގެ ވަގުތެއްގައި ބަލްމޯރަލް ކާސަލްއިން ވައިގެ މަގުން ރާނީގެ ހަށިގަޑު ގެންދިއުމަށް ހަމަޖެހިފައިވަނީ އެޑިންބާރގްއަށެވެ. އެއަށްފަހު، މިހަފްތާގެ އަންގާރަދުވަހު ރާނީގެ ހަށިގަޑު ގެންދުމަށް ހަމަޖެހިފައިވަނީ އިނގިރޭސިވިލާތުގެ ވެރިރަށް ލަންޑަނަށެވެ.
އެއަށްފަހު ބުދަދުވަހުން ފެށިގެން ޖަނާޒާ ބާއްވާ ދުވަހުގެ ހެނދުނާއި ހަމައަށް ރާނީގެ ހަށިގަޑު ރަސްމީ އިއްޒަރުތުގައި އޮންނާނީ ވެސްޓްމިންސްޓަރ ހޯލުގައެވެ. ޖަނާޒާ ބޭއްވުމަށް ހަމަޖެހިފައިވަނީ އިސާއީ ދީނުގެ ފައްޅިއެއް ކަމުގައިވާ ލަންޑަންގެ ވެސްޓްމިންސްޓަރ އަބޭގައެވެ.
ރާނީގެ ޖަނާޒާއަށް ދުނިޔޭގެ ގައުމުތަކުގެ ރަސްރަސްކަލުންނާއި ވެރީން އިނގިރޭސިވިލާށް ވަޑައިގަންނަވާނެއެވެ.
ރާނީގެ ޖަނާޒާ މިމަހުގެ 19ވަނަ ދުވަހު ބޭއްވުމަށް ހަމަޖެހިފައިވާއިރު، ރާނީގެ ދޮށީ ދަރިކަލުން ޗާރލްސް މިހާރުވަނީ އިނގިރޭސިވިލާތުގެ ރަސްކަމަށް އިސްކޮށްފައެވެ.
ރާނީ އިނގިރޭސި ތަޚުތަށް އިސްވެވަޑައިގެންފައިވަނީ 1952 ވަނައަހަރުއެވެ. އެއަށްފަހު އިނގިރޭސިވިލާތައް އައި ބޮޑެތި ބަދަލުތައް އައިސްފައިވަނީ އެކަމަނާގެ ރަނިކަމުގައެވެ.
ރާނީގެ ރަނިކަމުގައި އިނގިރޭސިވިލާތުގައި ވަނީ 15 ބޮޑުވަޒީރުން ވެރިކަން ކުރައްވާފައެވެ. ރާނީގެ ރަނިކަމުގައި އެންމެ ފުރަތަމަ ބޮޑުވަޒީރުކަން ކުރައްވާފައިވަނީ ވިސްޓަން ޗާރޗިލްއެވެ. ވިންސްޓަން ޗާޗިލް އުފަންވެ ވަޑައިގަތީ 1874 ވަނަ އަަހަރުއެވެ. ރާނީގެ ރަނިކަމުގައި އެންމެ ފަހުން ބޮޑުވަޒީރުކަމުގައި ހުންނެވީ، ފާއިތުވެދިޔަ ހަފްތާގައި އިނގިރޭސިވިލާތުގެ ބޮޑުވަޒީރުކަމަށް އައްޔަން ކުރެވުނު ލިޒް ޓްރަސްއެވެ.
ލިޒް ޓްރަސް އުފަންވެ ވަޑައިގަތީ ވިންސްޓަން ޗާޗިލް އުފަންވެވަޑަތްތާ 101 އަހަރު ފަހުން 1975 ވަނަ އަހަރުއެވެ.
ކުއީން އެލިޒަބަދު ދުނިޔޭގެ އަލިކަން ދެކެވަޑައިގަތީ 1926 ވަނަ އަހަރުގެ އެޕްރިލްމަހުގެ 21 ވަނަ ދުވަހުއެވެ.
