އިނގިރޭސި ޕްރިމިއާ ލީގުގެ ޗެލްސީގެ ކޯޗުގެ މަގާމުން ޖަރުމަނުގެ ތޯމަސް ޓުކެލް ވަކިކޮށްފިއެވެ.
އޭނާ މަގާމުން ވަކިކުރީ ޔުއެފާ ޗެމްޕިއަންސް ލީގުގެ ގްރޫޕް އީގައި ރަށުން ބޭރުގައި ޑީނަމޯ ޒަގްރެބް އަތުން 1-0 ގެ ނަތީޖާއަކުން ޗެލްސީ ބަލިވިތާ އެއް ދުވަސް ފަހުންނެވެ. ޗެލްސީގެ ކޯޗުކަމުގެ މަގާމުން ޓުކެލް ވަކިކޮށްފައި ވަނީ އެ ކުލަބުގެ އައު ވެރިޔާ ޓޮޑް ބޮއެލީ ހަވާލުވިތާ 100 ދުވަސް ފުރުނު ދުވަހެވެ. އަދި ޓުކެލް މަގާމުން ވަކިކޮށްފައި ވަނީ އޭނާ މަގާމުގައި ހުންނަތާ 20 މަސް ވީތަނާއެވެ.
ޓުކެލް މަގާމުން ވަކިކޮށް ވަގުތީ ގޮތުން ޓީމުގެ ކޯޗިންގެ ކަންތައްތައް ހަވާލުކޮށްފައިވަނީ ޓުކެލްގެ ދަށުން މަސައްކަތް ކުރި ކޯޗިން ސްޓާފުންނަށެވެ. ޗެލްސީން ނެރުނު ބަޔާނެއްގައިވާ ގޮތުން ކުލަބުގެ ވެރިން ގަބޫލުކުރާގޮތުގައި މިއީ ޓީމުގެ ކޯޗުކަމުގެ މަގާމަށް ބަދަލެއް ގެންނަން އެންމެ ރަނގަޅު ވަގުތު ކަމަށެވެ. ޓުކެލް މަގާމުން ވަކިކުރިއިރު، ޗެލްސީ މި ވަގުތު އުޅެނީ ޕްރިމިއާ ލީގުގައި ކުޅުނު ހަ މެޗުގެ ތެރެއިން ތިން މެޗުން މޮޅުވެ, އެއް މެޗު އެއްވަރުވެ އަދި ދެ މެޗުން ބަލިވެ، ލިބިފައިވާ 10 ޕޮއިންޓާއެކު ތާވަލުގެ ހަވަނައިގައެވެ.
ޓުކެލް ވަނީ ޗެލްސީއާ ހަވާލުވި ފުރަތަމަ ސީޒަނުގައި އެ ޓީމަށް ޗެމްޕިއަންސް ލީގު ކާމިޔާބުކޮށްދީ، އަދި ކުލަބު ވޯލްޑް ކަޕާއި ޔުއެފާ ސުޕަ ކަޕުވެސް ކާމިޔާބުކޮށްދީފައެވެ. ޓުކެލް ޗެލްސީގެ މަގާމާއި ހަވާލުވެފައިވަނީ 2021 ވަނަ އަހަރުގެ ޖެނުއަރީ މަހުގެ 26 ވަނަ ދުވަހު، އޭރުގެ ކޯޗު ފްރޭންކް ލަމްޕާޑް މަގާމުން ދުރުކުރުމަށްފަހުއެވެ.
ޗެލްސީން އައު ކޯޗެއް ހޯދުމުގެ މަސައްކަތް މިހާރު ފަށާފައިވާއިރު، އެ ލިސްޓުގެ އެންމެ ކުރީގައި އުޅެނީ ބްރައިޓަން އާއެކު މިފަހަރު ކާމިޔާބު ސީޒަނެއް ފަށާފައިވާ ގްރަހަމް ޕޮޓާއެވެ. މީގެއިތުރުން ޓޮޓްނަމް ހޮޓްސްޕާއަށް ކުރިން ކޯޗުކޮށްދިން އަދި މި ސީޒަނުގައި ޕީއެސްޖީގެ ކޯޗުކަމުން ވަކިކުރި މައުރީސިއޯ ޕޮޗެޓީނޯ އާއި ރެއާލް މެޑްރިޑުގެ ކުރީގެ ކޯޗް ޒިނެދީން ޒިދާންވެސް ހިމެނެއެވެ.
