ކުރިޔަށްދާ އެމްޑީޕީގެ ކޮންގްރެސްގެ ދެވަނަ ދުވަހަށް މިއަދު އަލި ވިލިގެން ދާއިރު، މިއަދު ވެގެން ދާނީ، މި ކޮންގްރެސްގައި އެންމެ ޙާއްސާސް ދުވަސް ކަމުގައެވެ. ސަބަބަކީ، އެޖެންޑާގައި މާ ޚާއްސަ ކަންތަތަކެއް ނުހިނަމާ ކުރިޔަށްދާ މި ކޮންގްރެސްގެ މިއަދު ހަވީރުގެ ދަންފަޅީގައި، އެ ޕާޓީގެ ރައީސް މުހައްމަދު ނަޝީދު، ނިޒާމީ ވޯޓަކަށް ދިއުމަށް ކޮންގްރެސްގެ ތާއީދު ހޯއްދެވުމަށް ހުށަހަޅުއްވާފައިވާ ގަރާރަށް ބަހުސް ކުރުން އެޖެންޑާ ކުރެވިފައި ވާތީއެވެ.
ދެ ދުވަހަށް ކުރިޔަށްދާ މި ކޮންގްރެެސްގެ އެޖެންޑާއި ރިޔާސީ ޕްރައިމަރީގެ އިތުރުން އަސާސީ ގައިވާއިދަށް ގެންނަ އިސާލާހެއްވެސް އެޖެންޑާގައި ހިމެނިފައެއް ނުވެއެވެ. ފާހަކޮށްލެވޭ އައިޓަމެއްގެ ގޮތުން އެޖެންޑާގައި ހިމަނާފައިވަނީ ނަޝީދު ހުށަހަޅުއްވާފައިވާ ބަރުލަމާނީ އިސްލާހު އެކަންޏެވެ. މިއައިޓަމް އެޖެންޑާ ކޮށްފައިވަނީ ކޮންގްރެސްގެ ފަހު ދުވަހުގެ އެންމެ ފަހުގެ އައިޓަމެއްގެ ގޮތުގައެވެ.
މީގެ އިތުރުން މި ކޮންގްރެސްއަށް އެޖެންޑާ ކޮށްފައިވަނީ ފާޓީގެ ރައީސް ކޮންގްރެސްގެ މެމްބަރުންނާއި މުޚާތަބަކޮށް ވާހަކަ ދެއްކެވުމުގެ އިތުރުން، ގައުމީ މަޖިލިހުގެ ރިޕޯޓު އިއްވުމާއި، މުވައްސަސާތަކުން ކޮންގްރެސްގެ ބައިވެރިނަށް މައުލޫމާތު ދިނުމެވެ.
އެމްޑީޕީގެ ކޮންގްރެސް ފެށުމުގެ ކުރިންވެސް، އަދި ކޮންގްރެސްގެ ތެރޭގައިވެސް، އެމްޑީޕީގެ ރައީސް މުހައްމަދު ނަޝީދުވަނީ، ނިޒާމު ބަދަލު ކުރުމަށް ތާއީދު ކޮށްދިނުމަށް ކޮންގްރެސްގެ މެމްބަރުންގެ ކިބައިން ތަކުރާރުކޮށް އެދިވަޑައިންފައެވެ.
އަދި މި ކޮންގްރެސްގައި ނިޒާމު ބަދަލު ކުރުމަށް ޕާޓީގެ ތާއީދު ނުލިބިއްޖެނަމަ، ކުރިޔަށް އޮތް ރިޔާސީ އިންތިޚާބުގައި ޕާޓީއާއެކު ނުހުންނަވާނޭ ކަމުގެ އިންޒާރުވެސް ނަޝީދުވަނީ ދެެއްވާފައެވެ.
ބަހުސް ކުރުން މިއަދު!
މިހާރު ކުރިޔަށްދާ އެމްޑީޕީގެ 4 ވަނަ ކޮންގްރެސްގެ އެޖެންޑާގައި ވާގޮތުން، ނަޝީދު ހުށަހަޅުއްވާފައިވާ ގަރާރަށް ބަހުސް ކޮށް އަދި ވޯޓަށް އެހުމަށް އެޖެންޑާ ކޮށްފައިވަނީ މިއަދު ހަވީރު ދަންފަޅިއަށެވެ. މި އައިޓަމް އެޖެންޑާގައި ހިމަނާފައިވަނީ ކޮންގްރެސްގެ އެންމެ ފަހުގެ އައިޓަމެއްގެ ގޮތުގައެވެ.
މިގޮތުން، ނަޝީދުގެ މި ހުށަހެޅުއްވުމާއި ގުޅޭގޮތުން ކޮންގްރެސްއިން ނިންމާ ނިންމުމަކަށް ގިނަބެއްގެ ނަޒަރު ހުއްޓިފައި ވާއިރު، ކޮންގްރެސް ފެށުމުގެ ގޮތުން ބޭއްވި ޖަލްސާގައި ވާހަކަ ދައްކެވި ގިނަ ބޭފުޅުން ވަނީ، އެމްޑީޕީއަކީ ވާހަކަ ދައްކައިގެން ކަންކަމުގެ ހައްލު ހޯދާ ޕާޓީއެއް ކަމުގައި ވިދާޅުވެ، އަދި އެޕާޓީއަކީ ތަފާތު ޚިޔާލުތަކާއެކީވެސް ކުރިޔަށްދާ ޕާޓީއެއްކަމުގައި ވިދާޅުވެފައެވެ.
އަދި މި ޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވެފައިވަނީ، ކިތަންމެ ތަފާތު ޚިޔާލުތަކެއް ހުރިކަމުގައި ވިނަމަވެސް، ތަފާތު ޚިޔާލުތަކާއެކު އެޕާޓީ ދާންޖެހޭނީ ކުރިޔަށް ކަމުގައެވެ. މި ކޮންގްރެސްގެ ހަވާސާގައި ދެއްކެވި ވާހަކަ ތަކުގައި ރައީސް ސާލިހު ވިދާޅުވެފައިވަނީ، ހުރި ޚިޔާލު ތަފާތުވުންތަކަށް ކޮންގްރެސްގެ ތެރެއިން ހައްލު ލިބިގެން ދާނޭކަމަށް އެކަނިކްފާނު އުއްމީދު ކުރައްވާ ކަމުގައެވެ.
އެހެންނަަމަވެސް، ކޮންގްރެސްގެ އެކި އިވެޓްތަކުގައާއި އަދި ފެށުމުގެ ޖަލްސާގައިވެސް އެމްޑީޕީގެ ރައީސް މުހައްމަދު ނަޝީދު ދެއްކެވި ވާހަކަތަކަށް ބަލާއިރު، ބަރުލަމާނީއަކަށް ތާއީދުކުރުން ނޫން ހައްލެއް ގަބޫލު ނުކުރައްވާނޭކަމަށް ވަނީ ވިދާޅުވެފައެވެ.
ފަހުން ނަޝީދު ވިދާޅުވެފައިވަނީ، ކޮންގްރެސްއަށް ހުށަހަޅާފައިވާ ގަރާރަކީ ބަރުލަމާނީ ނިޒާމަކަށް އެއްބަސްވުމަށް އެދި ހުށަހަޅާފައިވާ ގަރާރެއް ނޫންކަމަށާއި އެކަމާއި ގުޅެގޮތުން ގޮތެއް ނިންމުމަށް ކޮންގްރެސްމަނުންގެ ފަރާތުން ނުވެސް އެދޭ ކަމަށެވެ.
ނަޝީދު ވިދާޅުވީ ކޮންގްރެސްގައި އެދެމުންދަނީ ރައްޔިތުންގެ ގާތުގައި ނިޒާމު ބަދަލުކުރާންވީތޯ އެހުމަށް ކަމަށާއި، އެކަމަށް ކޮންގްރެސްއިން ނޫނެކޭ ބުނާންވީ ސަބަބެއް ނެތްކަމުގައެވެ.
އަޅުގަޑު ހުށަހެޅި ގަރާރުގައިވާނީ މި ޕާޓީއިން ބަރުލަމާނީ ނިޒާމަކަށް އެއްބަސް ވުމަކަށް ނޫން، އަޅުގަޑު ނުވެސް އެދެން އެކަމާ ގުޅޭގޮތުން ތިޔަ ބޭފުޅުން ގޮތެއް ނިންމާކަށް..، އަޅުގަޑު މި އެދެނީ ރައްޔިތުންގެ ގާތުގައި އެހުމަށް، މިކަމަށް ނޫނެނެކާ ބުނާންވީ ސަބަބެއް ނެތް.
ކޮންގްރެސްގައި އިއްޔެ ވާހަކަ ދައްކަވަމުން ނަޝީދު ވިދާޅުވެފައި ވެއެވެ.
ތާއީދު ކުރާ އެއްވެސް ބަޔަކު ނެތް!
މިހާތަނަށް ކޮންގްރެސްގައި، ކޮންގްރެސްގެ މަންދޫބުންގެ ތާއީދު ނަޝީދު ހުށަހަޅުއްވާފައިވާ ގަރާރަށް ލިބިގެން ހިގައިދާނެކަމާމެދު ޚުދު ނަޝީދުވެސް ޝައްކު ކުރައްވާކަން، ކޮންގްރެސްގައި ދައްކަވާފައި ވާހަކަތަކުން ވަނީ މޭރުން ކުރެވިގެން ގޮސްފައެވެ.
ކޮންގްރެސް ފެށުމުގެ ރަސްމިއްޔާތުގައި ވާހަކަ ދައްކަވަމުން ނަޝީދު ވިދާޅުވެފައިވަނީ "މިއަދާއި މާދަމާއަކީ އެމްޑީޕީ އަށް ފަސޭހަ ދުވަސްތަކަކަށް ނުވާނެ" ކަމުގައެވެ. އަދި އިއްޔެ ހެނދުނުގެ ދަންފަޅީގައި ވާހަކަ ދައްކަވަމުން ވިދާޅުވެފައި ވަނީ ހުށަހަޅުއްވާފައިވާ ގަރާރަށް ވޯޓަށް އެހީމާ ވާނެގޮތް އެނގިވަޑައިގަންނަވާ ކަމަށެވެ.
އަޅުގަޑަށް އެނގޭ ވޯޓު މި ކޮންގްރެސްގައި ނެގީމަ އޭގެ ނަތީޖާ އޮންނާނެ ގޮތް. އަޅުގަޑު ނޭދެން އެ ހައިޖާނުގެ މަންޒަރެއް.
އަމިއްލަފުޅަށް ހުށަހަޅުއްވާގައިވާ ގަރާރު ކޮންގްރެސްގައި ފާސްނުވާނެކަން އެނގިވަޑައިގަންނަވާކަމަށް އިޝާރާތް ކުރައްވަމުން ނަޝީދު ވިދާޅުވެފައި ވެއެވެ.
އަދި މީގެ އިތުރުން ރައީސް ސާލިހުވެސް ކޮންގްރެސްގެ ހަވާސާގައި ވާހަކަ ދައްކަވަމުންވެސް، ވަރަށް ސަރީހަ އިބާރާތުން ނަޝީދުގެ ގަރާރަށް ތާއީދު ނުކުރައްވާނޭކަން ވަނީ ހާމަ ކުރައްވާފައެވެ.
ހަމައެއާއެކު، އެމްޑީޕީގެ ސިޔާސީ އިސްފަރާތްތަކުންގެ އިތުރުން ރާއްޖޭގެ އެހެން ހުރިހާ ސިޔާސީ ޕާޓީތަކުންނާއި، ސިޔާސީ ލީޑަރުންގެ އިތުރުން އެމްޑީޕީގެ އާންމު މެމްބަރުންގެ ތާއީދުވެސް ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލު ކުރުމަށް ތާއީދު ނެތްކަން ސާފުކޮށް އެގެން އޮތުމާއެކު، އޮޔާއި ވަޔާއި ދެކޮޅަށް ގިނިކަންޏާ ނަޝީދު ކުރައްވަމުން ގެންދަވާ މި މަސައްކަތުގެ ނަތީޖާ ކޮންގްރެސްއިން ނުކުމެގެންދާނޭ ގޮތަކަށް ގިނަ ބައެއްގެ ނަޒަރު ވަނީ ހުއްޓިފައެވެ. އެއީ މިހާރު ކުރިޔަށްދާ ކޮންގްރެސްއާއި ގުޅޭގޮތުން ގިނަބަޔަކު ކުރަމުންދާ ހަމައެކަނި އިންތިޒާރެވެ.
މިއިންތިޒާރުގެ ނިމުން އިތީ ވަރަށްވެސް ކައިރީގައެވެ.
