ދިވެހިރާއްޖޭގެ ވެރިކަމުގެ ނިޒާމު ބަދަލު ކުރުމުގެ ވާހަކައަކީ، އެކަމަށް އެމްޑީޕީގެ ރައީސް މުހައްމަދު ނަޝީދު ބޭނުންފުޅު ވާކަން ހާމަ ކުރެއްވުމަށްފަހު ވަރަށް ބޮޑަށް ކުރެވެން ފެށިފައިވާ ބަހުސެކެވެ.
އަދި މި ދައުރުގެ ތެރޭގައި ރާއްޖޭގެ ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލު ކުރައްވަން ބޭނުންފުޅު ވާކަމަށް ވިދާޅުވެ، އެ ބަދަލު ގެނައުމަށްޓަކާ ފާއިތުވެދިޔަ އަހަރުންފެށިގެން ނަޝީދުވަނީ އެމަސައްކަތް ކުރައްވާންވެސް ފައްޓަވާފައެވެ.
މިގޮތުން ނަޝީދު އެންމެ ފުރަތަމަ ހުށަހެޅުއްވީ، ރައްޔިތުންގެ ފެންނަ ނުފެންނަ ވޯޓަކަށްވެސް ނުގޮސް، މަޖިލިހުގައި އޮތް ސުޕަރ މެޖޯރިޓިގެ ބޭނުން ކުރައްވައިގެން ރާއްޖޭގެ ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލު ކޮށްލުމަށެވެ. އެހެންނަމަވެސް، ގާނޫނު އަސާސީގައި ވާ ގޮތުގެ މަތިން ނޫން ގޮތަކަށް އެކަމަށް ތާއީދު ނުކުރައްވާނޭ ކަމުގައި ރައީސް ސާލިހު ވިދާޅުވުމާއި ހަމައިން ނަޝީދު ވަކާލާތު ކުރައްވަން ފައްޓަވާފައިވަނީ، މި ދަައުރު ނިމުމުގެ ކުރިން، ނިޒާމް ބަދަލު ކުރުމުގެ ފެންނަ ނުފެންނަ ވޯޓެއް ނެގުމަށެވެ.
އަދި މިހާރުވަނީ، މާދަމާ ފެށުމަށް ހަމަޖެހިފައިވާ އެމްޑީޕީގެ ކުރިޔަށް އޮތް ކޮންގްރެސްއަށް ވެރިކަމުގެ ނިޒާމު ބަދަލު ކުރުމަށް ގަރާރެއް ހުށަހަޅުއްވާ، ރާއްޖޭގެ ވެރިކަން ކުރުމަށް އެނޫން ވެރިކަމުގެ އެހެން ނިޒާމެއް ކަމުނުދާކަމަށް ވިދާޅުވެ، އެމްޑީޕީގެ ހަރުގޭގައާއި އަދި އެނޫން ޕްލެޓްފޯމްތަކުގައިވެސް އެވާހަކަ ދައްކަވާން ފައްޓަވާފައެވެ.
މީގެ ތެރޭގައިވެސް ނަޝީދު އެންމެ ބޮޑަށް ވަލާލާތު ކުރައްވަމުން ގެންދަވަނީ، މިހާރު ރާއްޖޭގައި ވެރިކަން ކުރާ ނިޒާމުގައި ދައުލަތުގެ ވަޒީރުންގެ ގޮތުގައި ތިއްބަވަނީ ރައްޔިތުންގެ ސީދާ ވޯޓަކުން އިންތިޚާބުކުރާ ބަޔަކަށް ނުވާތީ، އެ ވަޒީރުންނަށް ރައްޔިތުންނަށް އެކަށީގެންވާ ގޮތެއްގައި މަސައްކަތް ނުކުރެވޭކަމަށް ވިދާޅުވެއެވެ.
އޭގެ ބަދަލުގައި ބަރުލަމާނީ ނިޒާމެއްގައި ކެބިނެޓުގައި ތިއްބަވަނީ ރައްޔިތުންގެ މަޖިލީހުގެ މެމްބަރުން ކަމަށްވާތީ އެ ނިޒާމުގައި ވަޒީރުންނަށްވެސް ރައްޔިތުންނަށް ޚިދުމަތް ކުރުމުގެ ފުރުސަތު މާ ބޮޑުތަނުން ފަހިވެފައި އޮންނަކަމަށް ވިދާޅުވެ، ބަރުލަމާނީ ނިޒާމުގެ އެންމެ މުހިންމު ސިފައެއްގެ ގޮތުގައިވެސް ނަޝީދު ސިފަ ކުރައްވަމުން ގެންދަވަނީވެސް މި ސިފަކަން ފާހަގަ ކޮށްލާން ޖެހެއެވެ.
ކެބިނެޓްގެ ވަޒީރުން މަދު މެމްބަރުން ކޮޅެއްގެ ތެރެއިން!
ބަރުލަމާނީ ނިޒާމާއި އަދި ރިޔާސީ ނިޒާމުގައިވެސް، ރަގަޅު ސިފަތަކާއި ގޯސް ސިފަތައް އޭގެ ޒާތުގައި އެކުލެވިގެންވާ ކަމުގައި ދަންނަވާން ޖެހެއެވެ. އެއީ ދުނިޔެވީ ހުރިހާ ކަމެއްގައިވެސް ކަން ހިގަމުންދާ އުސޫލުގެ މަތިންނެވެ.
އަދި ދުނިޔޭގެ ވެރިކަން ކުރަމުންދާ ގައުމުތަކަށް ބަލާއިރު، މި ދެނިޒާމު އޮތް ގައުމުތަކުގައިވެސް މި ދެނިޒާމު ޕްރެކްޓިސް ކުރަމުން އައިސްފައިވަނީ އެ ގައުމަކަށް ނުވަތަ، އެވަގުތަކު ވެރިކަމުގައި ތިއްބަވާ ބަޔަކަށް ރަގަޅުވާ ގޮތަށް ނިޒާމުގެ ސިފަތަކަށް ބަދަލު ގެނެސްގެން ކަމުގައިވެސް ދެނެވިދާނެއެވެ.
އޭގެ އެންމެ ފުރިހަމަ މިސާލެއްގެ ގޮތުގައި ފެންނާން އޮތީ އަވައްޓެރި ސްރީ ލަންކާއެވެ. އެގައުމުގައި މިހާތަނާއި ހަމައަށްވެސް ދެމި އޮވެފައިވަނީ ބަރުލަމާނީ ނިޒާމާއި ރިޔާސީ ނިޒާމް މަސްހުނި ކޮށްގެން ހިންގާ ވެރިކަމުގެ ނިޒާމެކެވެ. މިގޮތުން ސްރީ ލަންކާގައި ވަރަށް ފަހަކާއި ޖެހެންދެން ވެރިކަން ކުރެއްވި ރާޖަޕަކްސަ އާއިލާއިން ވަޑައިގެންނެވި ރައީސުން ވެރިކަމުގެ ބާރުތައް ދޫކޮށްލައްވަން ބޭނުންފުޅު ނުވެގެން، ގައުމުގެ ރައީސަކަށް ހުންނަވާ ބޭފުޅަކަށް ބޮޑެތި ބާރުތަކެއް އޮންނަގޮތަށް އެހެންނަމަވެސް، ގާނޫނުހަދާ މަޖިލިހުގެ ކެބިނެޓެއް އޮވެފައި އަދި ބޮޑުވަޒީރަކުވެސް އެގައުމުގައި ހުންނަވައެވެ.
އެހެންނަމަވެސް ފާހަގަ ކޮށްލާން ޖެހޭ އެއް ހަގީގަތަކީ، ދުނިޔޭގެ އެހެން ގިނަ ގައުމުތަކާއި ޚިލާފަށް، ރާއްޖެއަކީ ސައިޒުން ކުޑަ ގައުމަކަށް ވުމާއެކު، ރައްޔިތުންގެ މަޖިލިހުގައި އެންމެ މަރުހަލާއެއް އޮވެފައި (މަތިގެއާއި ތުރި ގެއެއް ނޯވޭ)، ތިއްބަވާ މެމްބަރުންގެ އަދަދުވެސް އިންތިހާއަށް މަދުކަމެވެ.
ނަތީޖާއެއްގެ ގޮތުން، ރާއްޖެއަށް ގެނެވޭ ބަރުލަމާނީ ނިޒާމެއްގައި، އެހެން ބައެއް ޕާޓީތަކާއި އެކީ ކޯލިޝަން ހަދައިގެން ބޮޑުވަޒީރަކު ވެރިކަމަށް ވަޑައިގެންނެވި ނަމަވެސް، ސަރުކާރުގެ ކެބިނެޓަށް ވަޑައިގަންނަވާން ވަޒީރުން ތިއްބަވާނީ، ރައްޔިތުންގެ މަދު މެމްބަރުން ކޮޅެއްގެ ތެރެއިންކަން މިފުރަތުގައި ފާހަގަ ކޮށްލާން ޖެހެއެވެ.
އަދި ވަކީން ޚާއްސަކޮށް، ރައްޔިތުންގެ ވޯޓުން ރައްޔިތުންގެ މަޖިލީހަށް ރާއްޖޭގައި ހޮވެމުންދާ ބައެއް މެމްބަރުންނަކީ ގިނަފަހަރަށް ކަމަށް ގާބިލް ނޫން، އަދި މިފަދަ ފަންނީ މަގާމެއްގައި ތިއްބެވުމަށް އެންމެ އެކަށީގެންނުވާ ބަޔަކަށް ވެގެންދާކަމީވެސް ދެބަސް ވެވެން ނެތް ހަގީގަތެކެވެ. ރައްޔިތުންގެ މަޖިލިހުގައި އުފެއްދުންތެރިކަމެއް ނެތި، އެއީ އެކަށީގެންވާ ގޮތެއްގައި ހިންގޭ މަޖިލިހަކަށް ވެގެން ނުދާ އެއް ސަބަބަކީވެސް މިއީ ކަމުގައި ދަންނަވާން ޖެހެއެވެ.
އެހެންކަމުން، މި ސިޔާސީ ހަގީގަތުގެ މައްޗަށް ބިނާކޮށް، ކެބިނެޓްފަދަ ފަންނީ މަސައްކަތްތަކެއް ކުރެވި، އިލްމީ ގާބިލްކަމުގެ މައްޗަށް ހިންގާންޖެހޭ ގުނަވަނަކަށް، ނާގާބިލް މީހުންނަށް ރައްޔިތުންގެ މަޖިލީހަށް ވުނުމުގެ ދޮރު ހުޅުވިފައި އޮންނަ ބީދައިން، މިފަރާތްތަކަށް ގައުމުގެ ވަޒީރުންގެ މަޖިލީހަށް އައުމުގެ ދޮރު، ރާއްޖެއަށް ގެނެވޭ ބަރުލަމާނީ ނިޒާމެއްގައި ހުޅުވިގެން ދިއުމަކީ އެންމެ ރަގަޅު އުސޫލުތޯ ނުވަތަ ނޫންތޯ މިއީ އިންސާފުގެ ނަޒަރަކުން ވިސްނާލީމާ ޖަވާބު ވަރަށްވެސް ސާފުކޮށް ލިބޭން އޮތް ސުވާލެކެވެ.
އަދިގާނޫނު ހެދުމުގެ ބާރުވެސް މި ދެންނެވުނު މަދު މެމްބަރުން ކޮޅެއްގެ ތެރޭގައި އޮވެފައި، ވަޒީރުންގެ ހައިސިއްޔަތުން އެ ގާނޫނުތައް ތަންފީޒު ކުރުންވެސް މި ދެންނެވުނު މަދު މެމްބަރުންގެ އަތައް އަރާ، ދައުލަތުގެ ބަޖެޓް ފާސްކޮށް، ތަންފީޒު ކުރުންވެސް މެމްބަރުންނާއި ވަޒީރުންގެ ހައިސިއްޔަތުން އިސްވެ ދެންނެވުނު މަދު މެމްބަރުން ކޮޅެއްގެ މަސްއޫލިއްޔަތުގެ ގޮތުގައި ހިމެނުގެން ދިއުމުން، މިރާއްޖޭގައި ދެން ކަން ވެގެން ދާނޭ ގޮތަކީ، ގިނަބަޔަކަށް އިތުރަށް ސާފުކޮށްދޭން ޖެހޭ ހާލަތުގައި މިއަދު ރާއްޖޭގައި އޮތް ކަމެއް ނޫންކަމުގައި ދަންނަވާން ޖެހެއެވެ.
މިސާލެއްްގެ ގޮތުން، ބަރުލަމާނީ ނިޒާމެއްގައި އިސްލާމިކް މިނިސްޓަރުކަން މަޖިލިސް މެމްބަރަކަށް!
ރާއްޖޭއަކީ އިސްލާމީ ގައުމަކަށް ވެފައި، އަދި ދީނީ ކަންކަމުގައި ރާއްޖެއަށް ކުރިމަތިވަމުންދާ ބޮޑެތި ގޮންޖެހުންތަކަށް ބަލާއިރު، ދައުލަތުގެ ވުޒާރާތަކުގެ ތެރެއިން، ފާއިތުވެދިޔަ ހުރިހާ ވެރިކަމެއްގައިވެސް އިސްލާމިކް މިނިސްޓްރީ ހިންގުން ހަވާލު ކުރެވިފައިވަނީ ދީނީ އިލްމުވެރިންނާއެވެ.
ނަޝީދުގެ ވެރިކަމުގައި އެންމެ ފުރަތަމަ ޑރ. މަޖީދެވެ. އެއަށްފަހުވެސް ޖެހިގެން އައި ވެރިކަންތަކުގައިވެސް އިސްކާމިކް މިނިސްޓްރީ ހިންގެވުން ކޮންމެ ވެރިއަކުވެސް ހަވާލު ކުރައްވާފައިވަނީ ދީނީ އިލްމު އުގެނިވަޑައިގެން ތިއްބެވި ދީނީ އިލްމުވެރީންނާއިކަން މި ފުރުސަތުގައި ފާހަގަ ކޮށްލާން ޖެހެއެވެ.
އެހެންނަމަވެސް، މިހާރުގެ ރައްޔިތުންގެ މަޖިލުހުގެ އެތުރުމަށް ބަލާއިރު، ރާއްޖެއަށް ގެނެވޭ ބަރުލަމާނީ ނިޒާމެއްގައި، އިސްލާމިކް މިނިސްޓްރީ ފަދަ، ދިވެހިންގެ ދީނާއި ގައުމިއްޔަތުގެ ދިފާއުގައި އިންތިހާއަށް ބޮޑަށް މަސައްކަތް ކުރާންޖެހިފައި އޮތް ވުޒާރާއަކާއި ހަވާލުވާން އެކަށީގެންވާ ބޭފުޅުން މަޖިލިސް މެމްބަރުންގެ ތެރޭގައި ނެތްކަމީ ވަންހަނާ ވެވެން ނެތް ވަރަށްވެސް ބޮޑު ހަގީގަތެކެވެ.
އެހެންނަމަވެސް، ބަރުލަމާނީ ނިޒާމެއްގައި، ރައްޔިތުންގެ ވޯޓުން ރައްޔިތުންގެ މަޖިލީހަށް ވަދެވޭ ހިސާބުން، އެއީ އިލްމެ އަދި ހިލްމެ ނެތް މީހަކަށް ވިނަމަވެސް، މަޖިލީހުގެ ތެރޭގައި ޑީލްތައް ހަދައިންގެ، ދައުލަތުގެ ވަޒީރުކަމަށް ވެސް މެމްބަރުން ވަޑައިގަންނަވާން ވީއެއްވެ. މެމްބަރަކަށް ވެވޭ ހިސާބުން އިސްލާމިކް މިނިސްޓަރު ކަމާވެސް މެމްބަރު ހަވާލުވެ ވަޑައިގަންނަވާން ވީއެވެ.
އެހާތަނުން، ރާއްޖޭގެ ދީނީ ސިޔާސަތު ތަންފީޒު ކުރުންވެސް ރައްޔިތުންގެ މަޖިލީހުގެ ފުރިހަމަ ޒިންމާގެ ތެރޭގައި ހިމެނި، "ނަފްރަތުގެ ބިލް"ވެސް ރައްޔިތުން މަޖިލީހުގެ މެމްބަރުން ހިމެނޭ ކެބިނެޓުން ފާސްކޮށްގެން، މެމްބަރުން އެކަނި ބޭނުންވާ ގޮތަށް ބިލްތައް ފާސް ކޮށްލައިގެން، ބޮޑުވަޒީރާއި މަދު މެމްބަރުންކޮޅެއް އެކަނި ބޭނުންވާ ގޮތަށް ގައުމުގެ ވެރިކަންވެސް ކުރަމުން ދާންވީއެވެ.
މިއީ ހަގީގަތުގައިވެސް، ރާއްޖެފަދަ ކުޑަ ގައުމަށް އޮތް ވަރަށްވެސް ބޮޑު ނުރައްކަލަކަށް މެނުވީ ނުވާނެއެވެ. ސަބަބަކީ ވެރިކަމުގެ ހުރިހާ ބާރެއް ރައްޔިތުންގެ މަޖިލީހަށް ޖަމާކޮށް، ވަޒީރުން ކޮޅަކާއި ބޮޑުވަޒީރު އެކަނިވެގެން ވެރިކަން ހިންގާ، ބާރުތައް ރާއްޖޭގައި ގަޑުބަޑު ކޮށްފިނަމަ، ގައުމަށް މިއަދު ކުރިމަތިވަމުންދާ ބޮޑެތި މައްސަލަތަށް ގޯހުން ގޯހަށް ދަތުރު ނުކުރާނޭ އެއްވެސް ހަމައެއް ނޯންނާނެތީއެވެ.
އަދި ދީނީ ވަހުދަތު އޭގެ ސަބަބުން ގެއްލި، ދިވެހިންގެ ދީނަށްވެސް އެފަދަ ހާލަތެއްގައި، ކުރިމަތިވެފައިވާ ގޮންޖެހުންތަކުގެ ނުރައްކާ އޭގެ ނަތީޖާއެއްގެ ގޮތުން އިންތިހާއަށް މަތިވެގެން ދާނޭކަމީވެސް ކަށަވަރުވެ ޔަގީންވާން އޮތް ކަމެކެވެ.
