އެކްތާ ކަޕޫރް ޕްރޮޑިއުސްކޮށް، މިލަން ލުތުރިއާ ޑައިރެކްޓްކޮށް މީގެ 11 އަހަރު ކުރިން ގެނެސްދިން ކާމިޔާބު ފިލްމް "ދަ ޑާޓީ ޕިކްޗާ"ގެ ސީކްވެލްއެއް ހަދަން ތައްޔާރު ވަމުން އަންނަ ކަމަށް ރިޕޯޓްތައް ބުނެފިއެވެ.
މި ފިލްމުގެ ލީޑުން ފެނިގެންދިޔައީ ވިދްޔާ ބާލަން އެވެ. މީގެ އިތުރުން ފިލްމްގެ ކާސްޓުގައި ނަސީރުއްދީން ޝާހާއި އިމްރާން ހާޝިމީގެ އިތުރުން އެކްތާގެ ކޮއްކޮ ތުޝާރް ކަޕޫރް މައިގަނޑު ރޯލުތަކުން ފެނިގެން ދިއައެވެ.
މިއީ އިންޑިއާގެ ދެކުނުގައި "ސިލްކް ސުމީތާ"ގެ ނަމުން މަޝްހޫރުވި ބަތަލާ ވިޖަޔާލަކްޝްމީ ވަޅްލަޕަޓީގެ ވާހަކަ ކިޔައިދިން ބަޔޮގްރަފިކަލް މިއުޒިކަލް ޑްރާމާއެކެވެ.
ރިޕޯޓްތައް ބުނާގޮތުގައި މި ފިލްމުގެ ދެވަނަ ބައެއްގެ ސްކްރީން ޕްލޭ ލިއުމުގެ މަސައްކަތް މިހާރު ދަނީ ކުރިއަށެވެ. އަދި ފިލްމުގެ ލީޑު ކަންގަނާ ރަނާވަތަށް ހުށައެޅިނަމަވެސް އޭނާ އެ ރޯލު ދޫކޮށްލާފައިވާކަމަށް ވެސް ޚަބަރުތައް ބުނެއެވެ. ކަންގަނާ އާއި އެކްތާއަކީ ވަރަށް ގާތް ދެމީހުންނެވެ. ފަހަރުގައި ކަންގަނާ އަލުން އެރޯލު ކުޅެއް އެބަސް ވުމަކީވެސް އެކަށީގެންވާ ކަމެކެވެ.
މި ރޯލު ކަންގަނާ ދޫކޮށްލުމުން ކްރިތީ ނުވަތަ ތާޕްސީ އެރޯލަށް ގެނައުމަށް ހުށައަޅާފައިވާ ކަމަށް ވެސް ބައެއް ރިޕޯޓްތައް ބުނެއެވެ.
ނަމަވެސް ފިލްމުގެ ޕްރޮޑަކްޝަން ޓީމުގެ ފަރާތުން އެއްވެސް މީހަކު އަދި މިހާތަނަށް ރަސްމީކޮށް މި ވާހަކަތަކަށް ކޮމެންޓް ކޮށްފައެއް ނުވެއެެވެ. "ޑާޓީ ޕިކްޗާ" ގައި ވިދްޔާ ފެނިގެން ގޮސްފައިވަނީ ވަރަށް ބޯލްޑް ރޯލަކުންނެވެ.
