ރާއްޖޭގެ ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލު ކުރުމަށް ނަޝީދު ކުރައްވަމުން ގެންދަވާ މަސައްކަތްތަކާއި ފޮރިންގ މިނިސްޓަރ ޝާހިދު ދެކޮޅު ހެއްދެވުމުން، ޖުހަގެ ޖޯކަކުން ނަޝީދު ޝާހިދަށް ރައްދު ދެއްވައިފިއެވެ.
ބަރުލަމާނީ ނިޒާމަށް ތާއީދު ހޯއްދެވުމަށް އެމްޑިޕީގެ ހަރުގޭގައި މިހާރު ކޮންމެ ރެއަކުވެސް ބާއްވަމުން ގެންދަވާ ހަރުގޭ ބައްދަލުވުމުގައި ރޭ ވާހަކަ ދައްވަމުން ނަޝީދު ވިދާޅުވީ، އެމްޑީޕީގެ ބައެއް މެމްބަރުން ސިހިގެން ގޮސް، ބައެއް ވަޒީރުން ވަކި ނިޒާމަކަށް ތާއީދު ކުރައްވަ ވާހަކަ ވިދާޅުވާ ކަމަށާއި، އެކަމާ ކަންބޮޑު ވާންޖެހޭ ސަބަބެއް ނެތްކަމުގައެވެ.
ޝާހިދު ރިޔާސީ ނިޒާމަށް ތާއީދުކޮށް ކުރެއްވި ޓުވީޓަށް އިޝާރާތް ކުރައްވާ، ސަބަބެއްކަމުގައި ނަޝީދު ވިދާޅުވީ، ޖުހާ ބުނާފަދައިން އަރާއިން ގޮފިގަޑު ކަނޑާލަން އެއްބަސްވާނީ ވަރަށް މަދު މީހަކު ކަމުގައެވެ.
ތީގެ ތެރެއިން ބައެއް ބޭފުޅުން އަޅުގަޑު ގާތުގައި މިއަދު ސިހުން އައިސް ވިދާޅުވި މިވެނި ވަޒީރެއް އެވެނި ވަޒީރެއް މިވެރި ނިޒާމަކަށް ތާއިދު ކުރައްވާ ވާހަކަ. އާދެ! އަރާއިން ގޮފިގަޑު ކަނޑާލަން ޖުހާ ބުނާހެން ވަރަށް މަދު މީހަކު އެއްބަސް ވާނީ.
ފޮރިންގ މިނިސްޓަރު ޝާހިދަށް ރައްދު ދެއްވަމުން ނަޝީދު ވިދާޅުވެފައި ވެއެވެ.
ނަޝީދު އިތުރަށް ވިދާޅުވީ އެކަމަ ކަންބޮޑު ވާންޖެހޭ ސަބަބެއް ނެތްކަމަށާއި، ރައްޔިތުން މިހާރުވެސް ކަމެއް ދަމެއް ބޮޑުވީމާ އަންނަނީ ރައްޔިތުންގެ މަޖިލިހުގެ މެމްބަރުންގެ ގާރަށް ކަމުގައެވެ. އަދި ވަޒީރު ބޭފުޅުންނަކީ އިންތިޚާބުވެގެން އަންނަ ބައެއް ނޫންކަމަށާއި، އެއީ އައްޔަން ކުރާ ބައެއް ކަމަށް ވިދާޅުވަމުން ނަޝީދު ވިދާޅުވިއެވެ.
ނިޒާމު ބަދަލުކުރުމުގެ މައްސަލަގައި އެމްޑީޕީގެ އެތެރޭގައިވެސް ޚިޔާލު ތަފާތުވެފައި ވަނިކޮށް، ފޮރިންގ މިނިސްޓަރ ޝާހިދު އިއްޔެ ކުރެއްވި ޓުވީޓެއްގައި ވިދާޅުވެފައިވަނީ، ތާއީދުކުރައްވާނީ ރައްޔިތުންގެސީދާ ވޯޓަކުން ދައުލަތާއި ސަރުކާރުގެ ވެރިޔާ ހޮވުމަށް ކަމަށެވެ.
ޝާހިދުގެ ޓުވީޓގައި އިތުރަށް ވިދާޅުވެފައިވަނީ، ތާއީދު ކުރައްވަނީ ޤާނޫނު ހެދުމުގެބާރާއި ސަރުކާރު ޒިންމާދާރުކުރުވުން ރައްޔިތުންގެ މަޖިލީހުގައި އޮތުމަށް ކަމަށާއި، އަދުލުއިންސާފު ގާއިމްކުރުން ފަނޑިޔާރު ގޭގައި އޮތުމަށް ކަމަށެވެ. އަދި ޤާނޫނަށް ބޯލެނބުމުގެ ސިފަ ވެރިންގެ ކިބައިގައި ދެމެހެއްޓޭނީވެސް ވެރިކަން ރިޔާސީ ނިޒާމެއްގައި ދެމިއޮވެގެން ކަމުގައިވެސް ޝާހިދު ވިދާޅުވެފައި ވެއެވެ.
ވެރިކަމުގެ ނިޒާމް ބަދަލު ކުރުމާއި ފޮރިންގ މިނިސްޓަރު ޝާހިދު ދެކޮޅު ހައްދަވާފައި ވާއިރު، ރައީސް ސާލިހު މިއަދުވަނީ، ބަރުލަމާނީ ނިޒާމެއް ގެނައުމަށް އެމްޑީޕީގެ ރައީސް މުހައްމަދު ނަޝީދު އެމްޑީޕީގެ ކޮންގްރެސްއަށް ހުށަހަޅުއްވާފައިވާ ގަރާރު ފާސްނުވާނެ ކަމަށް ވިދާޅުވެ، އެގަރާރު އަބުރާ ގެންދިއުމަށް ނަޝީދަށް ގޮވާލައްވާފައެވެ.
ރައީސް ވިދާޅުވީ ނިޒާމުގެ މައްސަލައެއް ކަމަށް ބުނެ ބަރުލަމާނީ ނިޒާމު ގެނައުމަށް މަސައްކަތް ކުރުމަކީ އެންމެ ރަނގަޅު ގޮތް ނޫންކަމަށެވެ. އެމަނިކުފާނުވަނީ މިކަމުގެ ތަފްސީލް ހާމަކުރައްވާ މިހާރުވެސް ވެރިކަން ކުރާ ރިޔާސީ ނިޒާމުގެ ތެރެއިން ކޯލިޝަންގެ ތެރެއިން ގިނަ ކަންތައްތަކެއް ހާސިލް ކުރަމުންދާކަމަށް ވިދާޅުވެފައެވެ. އަދި ގުޅިގެން ހޯދަމުންދާ ކާމިޔާބީތައް އެމަނިކުފާނު ވަނީ ފާހަގަކޮށްފައެވެ.
ބަރުލަމާނީ ނިޒާމަކަށް ރާއްޖޭގެ ވެރިކަމުގެ ނިޒާމު ބަދަލު ކުުރުމަށް ނަޝީދު ކުރައްވަމުން ގެންދަވާ މަސައްކަތްތަކުގެ ނިޒާމު ބަދަލުކުރުމަށް އެމްޑީޕީގެ ކޮންގްރެސްގެ ތާއީދު ހޯއްދުވުމަށް ނަޝީދުވަނީ ކުރިޔަށް އޮތް ކޮންގްރެސްއަށް ގަރާރެއް ހުށަހަޅުއްވާފައެވެ.
މިގަރާރުގައި ނަޝީދު ހިމަނުއްވާފައިވަނީ، ރާއްޖޭގެ ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލުކުރުމަށް ރައްޔިތުންގެ ފެންނަ ނުފެންނަ ވޯޓަކަށް ދިއުމަށް އެމްޑީޕީގެ ކޮމްގްރެސް އިގުރާރު ވުމަށެވެ.
އެއަށްފަހު އިއްޔެ ބޭއްވެވި ނޫސްވެރިންގެ ބައްދަލު ވުމެއްގައި، ރާއްޖޭގެ ވެރިކަމުގެ ނިޒާމް ބަރުލަމާނީ ނިޒާމަކަށް ބަދަލުކޮށް، ބޮޑުވަޒީރު ސަރުކާރު ހިންގައި، ރައީސުލްޖުމްހޫރިއްޔާ ދައުލަތުގެ އެންމެ އިސް ވެރިއެއްގެ ގޮތުގައި ހުންނެވުމަށް ނަޝީދު ބޭނުންފުޅުވާ އިސްލާހު ވަނީ އާންމު ކުރައްވާފައެވެ.
ނަޝީދު އާންމު ކުރެއްވި އިސްލާހުގައި ވަނީ ރައީސުލްޖުމްހޫރިއްޔާގެ މަޤާމުގައި ހުންނަވާ ބޭފުޅަކަށް ލިބިވަޑައިގަންނަވާނެ ބާރުތައް ތަފްސީލްކޮށް ދެއްވާފައެވެ. އެގޮތުން ރައީސްއަށް ލިބިވަޑައިގަންނަވާ ބާރުތަކުގެ ތެރޭގައި މިނިވަން މުއައްސަސާތަކަށް ބޭފުޅުން އައްޔަން ކުރެއްވުމާއި، އަސްކަރިއްޔާގެ އެންމެ އިސްވެރިޔާގެ މަޤާމު ރައީސްއަށް ދެއްވުން ހިމެނެއެވެ.
One Response
ތިޔާއީ ތެދެއް. އަދި ގޮފިގަނޑުން ފުންމާލާފަ އަނެއް ގޮފިގަނޑަށް އަޜާހިތުން ނުވެސް ނިދިގެންނު ތިޔަތެޅި މަރުވަނީ…