ކ. ތުލުސްދޫގެ އަންހެން ކަނބަލުންނަށް ހާއްސަކޮށްގެން ހޭލުންތެރި ކުރުވުމުގެ ޕްރޮގްރާމެއް އެ ރަށުގައި ކުރިއަށް ގެންގޮސްފިއެވެ.
މި ޕްރޮގަރާމަކީ މޮމްސް ޖަމިއްޔާ އާއި ތުލުސްދޫ ކައުންސިލް އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީ ގުޅިގެން ކުރިއަށް ގެންދިޔަ ޕްރޮގްރާމެކެވެ. މި ޕްރޮގްރާމްގެ ބައިވެރިންނަށް މަޢުލޫމާތު ހިއްސާކޮށްދެއްވީ އަންހެނުންގެ ބަލިތަކުގެ ހާއްސަ ޑޮކްޓަރ، ޑރ. އައިމިނަތު ނުސްރާއެވެ. މި މައުލޫމާތު ސެޝަންގައި އެންމެ ބޮޑަށް މަޢުލޫމާތު ފޯރުކޮށްދެވުނީ ސިއްހީ ނިޒާމް ކުރިއަރައިގެން ގޮސްފައިވާ މިޒަމާނުގައި ދޭތެރެ ދުރުކުރުމަށް ބޭނުންކުރާ އެކި ވަސީލަތްތަކާއި އެ ވަސީލަތްތަށް ބޭނުންކުރާނެ އެކަށޭނަ ހާލަތްކާއި އޭގެ ރައްކާތެރި ކާމާއި ގުޅޭގޮތުންނެވެ
މީގެ އިތުރުންވެސް އުފާވެރި ހަމަޖެހޭ ދިރިއުޅުމެއްގައި އާއިލާ ރޭވުމުގެ މުހިންމުކަމާއި ގުޅޭގޮތުން މި ސެޝަންގައި މަޢުލޫމާތު ފޯރުކޮށްދެވިފައި ވެއެވެ. މީގެ އިތުރުން ދިރިއުޅުމުގައި ދަރިންނަށް ވަގުތު ދިނުމާއި ދެމަފިރިން އެކަކު އަނެކަކަށް ވަގުތު ދިނުމުގެ މުހިންމު ކަމާއި ގުޅޭގޮތުން ވާހަކަ ދެކެވުނުވެ.
ޑރ. ނުސްރާ ވިދާޅުވީ މިފަދަ ޕްރޮގްރާމްތައް ރަށްރަށުގައި ކުރިއަށް ގެންދިއުމުން، ރަށްރަށުގައި ދިރިއުޅޭ ފަރާތްތަކަށް، ރަށްރަށުގައި ހުންނަ ވަސީލަތްތަކުގެ އިތުރުން ރާއްޖެއިން ލިބެންހުރި އިތުރު ހިދުމަތްތަކުގެ މަޢުލޫމާތު ލިބިގެންދާކަމަށާއި، އަދި މީގެ އިތުރުން މިފަދަ ކަންކަމުގައި ތަޖުރިބާކާރުންގެ ތަޖުރިބާ ހިއްސާ ކުރުމަކީ މުހިންމު ކަމެއްކަންވެސް ޑރ. ނުސްރާ ފާހަގަކުރައްވާފައި ވެއެވެ. އަދި މޮމްސް ޖަމިއްޔާގެ ފަރާތުން އިސްނަގާގެން މިފަދަ ޕްރޮގްރާމްތަށް ހިންގާތީ އެކަން ޚާއްސަ ގޮތެއްގައި ފާހަގަކުރެއްވިއެވެ.
މޮމްސް ޖަމިއްޔާ އަކީ އަންހެނުންނާއި ކުޑަކުދިންގެ މަންފާއާއި ލާބައަށްޓަކައި މަސައްކަތްކުރުމުގެ ގޮތުން އުފެދިގެން އައި ޖަމިއްޔާއެއެކެވެ. މި ޖަމިއްޔާގެ ފަރާތުން ފާއޮތުވެދިޔަ ތަނުގައިވެސް ރާއްޖޭގެ އެކި ރަށްރަށުގައި މިފަދަ ޕްރޮގްރާމްތައް ކުރިޔަށް ގެންގޮސްފައި ވެއެވެ.
ތުލުސްދޫގައި މިއަދު ބޭއްވުނު މި ޕްރޮގްރާމް ނިންމާލުމަށްފަހު ޑރ.ނުސްރާ ވަނީ ޕްރޮގްރާމްގެ ބައިވެރިންގެ ސުވާލުތަކަށް ޖަވާބު ދެއްވާފައެވެ. މި ޕްރޮގްރާމްގައި ތުލުސްދޫގެ ގިނަ އަންހެން ކަނބަލުން ބައިވެރި ވެފައި ވެއެވެ.
