1989 ވަނަ އަހަރު ގެނެސްދިން ކާމިޔާބު ފިލްމް "ތުރިދޭވް" ގެ ރިމޭކެއް ބޮލީވުޑްގެ މަޝްހޫރު އެކްޓަރު ސަލްމާން ޚާން ހަދަން އުޅޭކަމަށް ބޮލީވުޑްގެ ޚަބަރުތަށް ގެެނެސްދޭ ނޫސްތަކުން ބުނެފިއެވެ.
ސަލްމާން ބޮލީވުޑަށް ނުކުތް ފިލްމު ކަމުގައިވާ ކާމިޔާބު ފިލްމް "މޭނޭ ޕިޔާރް ކިޔާ" ވެސް ރިލީޒް ކޮށްފައިވަނީ ހަމަ އެ އަހަރުއެވެ. އެކްޝަން ތުރިލާއެއްގެ ގޮތުގައި ގެނެސްދިން "ތުރިދޭވް" ގެ މައިގަނޑު ކާސްޓުންގެ ތެރޭގައި ސަނީ ޑިއޯލް، ޖެކީ ޝްރޮފް، ނަސީރުއްދީން ޝާހް، މާދުރީ ޑިކްސިޓް، ސަންގީތާ ބިޖްލާނީ ސޯނަމް، އަނޫޕަމް ކޭރް އަދި އަމްރިޝް ޕޫރީ ހިމެނެއެވެ.
ރަޖީވް ރާއީ ޑައިރެކްޓް ކޮށްފައިވާ މި ފިލްމުގެ ރިމޭކެއް ހަދަން އުޅޭ ކަމަށާއި މި ރިމޭކް ހަދަނީ މިހާރަށް ފައްތައިގެން ކަމަށް ރިޕޯޓްތައް ބުނެއެވެ. އަދި މި ފިލްމުގެ ރޯލަކުން ސަލްމާން ޚާން ވެސް ފެނިގެންދާނެ ކަމަށް ވަނީ ރިޕޯޓްކޮށްފައެވެ.
"މޮހްރާ" އާއި "ގުޕްތު" އަދި "ވިޝްވާތުމާ'" ފަދަ ކާމިޔާބު ފިލްމުތަކެއް ގެނެސްދިން ރަޖީވްގެ އެންމެ ފަހުގެ ޑައިރެކްޝަނަކީ ޕްރިޔަންކާ ޗޯޕްޅާ އާއި އަރުޖުން ރާމްޕާލް ކުޅުނު 2004 ގެ "އަސަމްބަވް" އެވެ.
18 އަހަރުގެ ދިގު މެދެކެނޑުމަކަށް ފަހު މިހާރު އޭނާ އަންނަނީ އަނެއްކާވެސް ފިލްމެއް ހެދުމުގެ މަސައްކަތް ކުރަމުންނެވެ. މިހާރު ތަރިންނާއި އެކުގައި މަސައްކަތް ކުރިއަށްދާ މިފިލްމާ ބެހޭގޮތުން އަދި އެއްވެސް މައުލުމާތެއް ހާމައެއް ނުކުރެއެވެ.
ސަލްމާން މިހާރު އަންނަނީ ޑިސެމްބަރު 30 ގައި ރިލީޒްކުރަން ހަމަޖެހިފައިވާ "ކަބީ އީދު ކަބީ ދިވާލީ" ގެ މަސައްކަތްކުރަމުންނެވެ. ބޮޑު ކާސްޓެއް ހިމެނޭ މި ފިލްމަކީ ފެމެލީ ޑްރާމާއެކެެވެ.
