ބ.ދަރަވަންދޫ ގޮނޑުދޮށް ހިމާޔަތް ކުރުމުގެ މަޝްރޫޢުގެ 56 އިންސައްތަ ނިންމައިފިއެވެ.
އެމްޓީސީސީން ބުނީ، މަޝްރޫޢުގެ މަސައްކަތަށް ބޭނުންވާ ބޮޑުހިލައިގެ ދެވަނަ ޝިޕްމަންޓް ވަނީ ޕްރޮޖެކްޓް ސައިޓަށް ގެންގޮސްފައިވާކަމަށެވެ.
ބ. ދަރަަވަންދޫ ގޮނޑުދޮށް ހިމާޔަތް ކުރުމުގެ މަޝްރޫޢުގެ މަސައްކަތުގެ 56 ޕަސެންޓް ނިމިއްޖެ. މަޝްރޫޢުގެ މަސައްކަތަށް ބޭނުންވާ ބޮޑުހިލައިގެ ދެވަނަ ޝިޕްމަންޓް ވަނީ ޕްރޮޖެކްޓް ސައިޓަށް ގެންދެވިފައި.#MTCCProjects #RayyithungeKunfuni pic.twitter.com/7hFMirnvhp
— MTCC Plc (@MTCCPlc) July 18, 2022
މި މަޝްރޫއުގެ މަސައްކަތަށް ބަލާއިރު ހިމާޔަތްކުރުމަށް ހިލަ ޖައްސާނީ ކަނޑު ތޮށި ޖަހާ އުސޫލުން ބައިބައި ވަކިން މޫދުގައެވެ. އަދި މިއިން ކޮންމެ ދެތޮށްޓެގެ މެދުގައި ރާޅު ވެއްދުމަށާ އޮއެވަރު ދެމުމަށް ޖާގައެއް ބާއްވާނެއެވެ.
ހިލަ ޖެއްސުމުގެ މަސައްކަތް ފަށާފައިވަނީ ރަށުގެ ހުޅަނގު ފަރާތުންކަމަށާ އެއީ މި ދުވަސްވަރަކީ ހުޅަނގު މޫސުމުގެ ގަދަ ދުވަސްތަކަކަށްވުމުން އެސަރަހައްދުގައި އޮތް ވެލި ގަނޑު ހިފެހެއްޓުމުގެ ބޭނުމުގައިކަމަށް އެރަށު ކައުންސިލުން ބުނެއެވެ.
ފަތުރުވެރިކަމުގެ ވިޔަފާރި ފުޅާވަމުން އަންނަ ދަރަވަންދޫގައި ރަށްގިރުމުގެ މައްސަލަ ކުރިމަތިވަމުން އަންނަނީ އެރަށުގެ އުތުރު ފަރާތެވެ.
ދިވެހި ސަރުކާރާއި މޯލްޑިވްސް ގްރީން ފަންޑުން ޚަރަދުކޮށްގެން ކުރިއަށްގެންދާ މި މަޝްރޫއުގެ ދަށުން 10،800 ކިއުބިކް މީޓަރުގެ ވެލި، ގިރާ ސަރަޙައްދަށް އެޅުމާއި، އަދި 490 މީޓަރުގެ ބޭރުތޮށްޓެއް ލުމަށް ވަނީ ހަމަޖެހިފައެވެ. މީގެ އިތުރުން ގިރާ ސަރަޙައްދު ހިމާޔަތް ކުރުމަށް 96 މީޓަރުގެ ރިވެޓްމެންޓް ޖަހާނެ ކަމަށް އެމްޓީސީސީން ބުނެއެވެ.
22.14 މިލިއަން ރުފިޔާ ޚަރަދުވާ މިމަޝްރޫއުގެ އަމަލީ މަސައްކަތް ހަވާލުކޮށްފައިވަނީ އެމްޓީސީސީއާއެވެ.
ކޮމެންޓު ފޮނުވާ