އެމެރިކާގެ ރައީސްކަމާއި ހަވާލުވެ ވަޑައިގަތުމަށްފަހު، މެދިއިރުމައްޗަށް ކުރައްވާ ފުރަތަމަ ދަތުރުފުޅުގައި އެމެރިކާގެ ރައީސް ޖޯ ބައިޑްން އިސްރާއީލަށް ވަޑައިގެންފިއެވެ. އަދި ކުޑަ ވަގުތުކޮޅެއްގެ ތެރޭގައި އިސްރާއީލުގެ އޮފިޝަލުންނާއެކު ބައިޑްން އިސްރާއީލުގެ ބެން ގުރިއޮން އެއަރޕޯޓުގައި ނޫސްވެރިންނާއި ބައްދަލު ކުރެއްވުމަށް ވަނީ ހަމަޖެހިފައެވެ.
ބައިޑްން އިސްރާއީލަށް ވަޑައިގަތުމުން އޭނާއަށް މަރުހަބާ ވިދާޅުވެފައިވަނީ އިސްރާއީލުގެ ރައީސް އައިސާކު ހާރޒޮގްއާއި އިސްރާއީލުގެ ވަގުތީ ބޮޑުވަޒީރު ޔައިރު ލަޕިޑްއެވެ.
ބައިޑްން މެދެއިރުމައްޗަށް ކުރައްވާ 4 ދުވަހުގެ މި ދަތުރުފުޅުގައި އިސްރާއީލުގެ އޮފިޝަލުންގެ އިތުރުން ފަލަސްތީނާއި ސައުދީ އަރަބިއާއާއެކީވެސް ވާހަކަތައް ބޭއްވުމަށް ވަނީ ހަމަޖެހިފައެވެ.
މި ދަތުރުފުޅުގައި ބުދަދުވަހު، ބައިޑްންއަށް މަރުހަބާ ދެންނެވުމުގެ ގޮތުން ޓެލްއަވީވްގެ ބެން ގުރިއޮން އެއަރޕޯޓުގައި ބޭއްވޭ ރަސްމިއްޔާތަށްފަހު، ފަލަސްތީނުގެ ރޮކެޓް ހަމަލާތަކުން ރައްކާތެރިވުމަށް އެމެރިކާގެ އެހީގައި ގާއިމް ކޮށްފައިވާ އަޔަން ޑޯމްއާއި ބީމް އެއަރ ޑިފެންސް ސިސްޓަމާއި ގުޅޭ ތައާރަފެއް ބައިޑްންއަށް އެރުވުމަށް ވަނީ ހަމަޖެހިފައެވެ.
އެއަށްފަހު ބައިޑްން ޖެރޫސެލަމްއަށް ޒިޔާރަތް ކުރައްވާ، ދުނިޔޭގެ ދެވަނަ ބޮޑު ހަނގުރާމާއިގެ ހޮލޯކޯސްޓް ހަދާނީ ބިނާގައި މާ ބޮނޑިއެއް ބޭއްވުމަށް ވަނީ ހަމަޖެހިފައެވެ.
ބައިޑްން ޖެރޫސެލަމްގައި ހޭދަކުރައްވާ ދެ ދުވަހުގައި އިސްރާއީލުގެ ލީޑަރުންނާއި ބައްދަލު ކުރެއްވުމަށްފަހު، ހުކުރު ދުވަހު ހުޅަނގު އައްސޭރީގައި ފަލަސްތީނުގެ ރައީސް މަހުމޫދު އައްބާސްއާއި ބައްދަލު ކުރެއްވުމަށް ވަނީ ހަމަޖެހިފައެވެ.
