ރައްޔިތުންގެ ޓެކްސް ފައިސާއިން ސިޔާސީ ޕާޓީތަކަށް ޚަރަދު ކުރުމަކީ އެ ރައްޔިތުންނަށް ދެވޭ ވަރަށް ބޮޑު އަނިޔާއެއް ކަމަށާއި ސިޔާސީ ޕާޓީތަކަށް ދޭ ފައިސާ އެ ޕާޓީތަކުގެ ބޮޑުން ކަނީ ރައްޔިތުންނަށް އެއްވެސް ޚިދުމަތެއް ނުދީ ކަމުގައި، ޓްރޭޑް ޔޫނިއަންގެ ނައިބް ރައީސް އަދި ކުރީގެ ގްރޭޓަރ މާލޭ އިންޑަސްޓްރިއަލް ޒޯން ލިމިޓެޑް ކުންފުނީގެ ބޯޑުގެ ޗެއަރމަން ސައުދުﷲ އަހުމަދު ވިދާޅުވެއްޖެއެވެ.
ސައުދު މިއަދު ކުރެއްވި ޓުވީޓެއްގައި ވިދާޅުވީ މިގައުމުގެ މާލީ ހާލަތަށް ބަލާއިރުވެސް، ސިޔާސީ ޕާޓީތަކަށް ފައިސާ ދޫކުރެވިގެން ނުވާނެ ކަމުގައެވެ.
Rahyithunge Tax faisaaing Siyaasee party thakah 1B rf haradhu eba kurey.Mee seedhaa rahyithunah dhevey aniyaa eh.mikan kuteveigen nuvaane.mi faisaa party thakuge ulhey bodun mikanee ehves hidhumatheh Rahyithunah nukohdhee.Miqaumuge maalee haalathah balaa iruves mee kohegen vaane
— Saudulla Ahmed (@saudullaahmed1) July 11, 2022
ސައުދުގެ ޓުވީޓުގައި ވިދާޅުވެފައިވަނީ، ރާއްޖޭގެ އެތައް ރަށެއްގައި އަދިވެސް ވަނީ އަސާސީ ޚިދުމަތްތައް ގާއިމް ނުކުރެވި ކަމަށާއި، އަދި ނިކަމެތި ރައްޔިތުން ބޮޑެތި ބަލިތަކަށް ބޭސް ކުރަމުންދަނީ ސަލާންޖަހައިގެން ކަމުގައެވެ. މިގޮތުން ސިޔާސީ ޕާޓީތަކަށް ޚަރަދު ކުރުމުގެ ބަދަލުގައި މި ފައިސާއިން ބޮޑެތި ބަލިތަކަށް ޚަރަދު ކުރުންވެސް މާ އައުލާކަން ބޮޑުކަމުގައިވެސް ސައުދު ވިދާޅުވެފައި ވެއެވެ.
ސިޔާސީ ޕާޓީތަކަށް ދައުލަތުގެ މާލިއްޔަރުން ޚަރަދު ކުރުމަކީ ރައްޔިތުންނަށް ދެވޭ އަނިޔާއެއް ކަމުގައި ސައުދު ވިދާޅުވެފައި ވާއިރު، ސިޔާސީ ޕާޓީތަކުން އަމިއްލައަށް ފައިސާ ރެއިސްކޮށްގެން ޕާޓީތައް ހިންގެންޖެހޭކަމަށް ގަބޫލު ކުރައްވާ ކަމުގައި މޯލްޑިވްސް ނޭޝަނަލް ޕާޓީ އެމްއެންޕީގެ ނައިބް ރައީސް އަބުދުﷲ ރިޔާޒު މިއަދު ވަނީ ވިދާޅުވެފައެވެ.
ރިޔާޒު މިހެން ވިދާޅުވީ ސިޔާސީ ޕާޓީތަކުގެ މެމްބަރުންގެ ދަފްތަރަށް ބަލައިގެން ދައުލަތުގެ ބަޖެޓުން ޕާޓީތަކަށް ފައިސާ ދޫކުރުމުގެ އުސޫލަށް ބަދަލު ގެނައުމަށްޓަކައި ޤާނޫނަށް އިސްލާހު ގެނައުމުގެ މަސައްކަތް އިލެކްޝަންސް ކޮމިޝަނުން ކުރަމުންދާ ދަނޑިވަޅެއްގައެވެ.
ސިޔާސީ ޕާޓީތަކުގެ ޤާނޫނުގައިވާ ގޮތުން ސިޔާސީ ޕާޓީތަކުގެ ތެރެއިން ދައުލަތުގެ ބަޖެޓުގެ 0.01 އިންސައްތަ ފައިސާ ސިޔާސީ ޕާޓީތަކަށް ދޫކުރަންޖެހެއެވެ. އިލެކްޝަންސް ކޮމިޝަނުގެ ދަފްތަރުގައި ހިމެނޭ ސިޔާސީ ޕާޓީތަކުގެ ތެރެއިން ދައުލަތުގެ ބަޖެޓުން ފައިސާ ދޫކުރާ އަދަދަށް މެމްބަރުން ތިބި 4 ސިޔާސީ ޕާޓީއަށް މިހާރު ވަނީ ފައިސާ ދޫކޮށްފައެވެ.
އިލެކްޝަންސް ކޮމިޝަނުން މަސައްކަތް ކުރަމުންދަނީ ޤާނޫނަށް ގެންނަންޖެހޭ އިސްލާހު ގެނައުމަށްޓަކައި، މިހާރު ކުރެވިފައިވާ މަސައްކަތްތަކާއެކު މިފެށޭ ދައުރަށް އިސްލާހު ހުށަހެޅުމަށެވެ. ސިޔާސީ ޕާޓީތަކުގެ ދަފްތަރުގައި 11 ސިޔާސީ ޕާޓީއެއް އޮތްއިރު، އޭގެ ތެރެއިން ގިނައީ 10،000 މެމްބަރުން ހަމަނުވާ ސިޔާސީ ޕާޓީތަކެވެ. އަދި ޕާޓީތަކުގެ ގޮތުގައި ހަރަކާތްތެރިވެވޭނީ 3،000 މެމްބަރުން ކަމަށް ޤާނޫނުގައި ވަނީ ކަނޑައަޅާފައެވެ. މިއަދަދަށް މެމްބަރުން ހަމަނުވުމުގެ ސަބަނުން ދާދިފަހުން ވަނީ ލޭބާ ޕާޓީގެ ނަމުގައި އުފެއްދި ޕާޓީ އުވާލާފައެވެ.
