އަކްޝޭ ކުމާރު މިހާރު ޝޫޓް ކުރަމުންދާ، އޭނާގެ ކުރިއަށް އޮތް ފިލްމުގައި ފެނިގެންދާނެ ގޮތުގެ ފޮޓޯތަކެއް އާންމުވެއްޖެއެވެ.
އަކްޝޭގެ ފަސްޓް ލުކް ސޯޝަލް މީޑިއާ ގައި އާންމުވުމާއެކު އޭނާގެ ގިނަ ފޭނުންތަކެއް ވަނީ އޭނާގެ ލުކް ވަރަށް ކަމުދާކަމަށް ބުނެ ފޮޓޯއަށް ކޮމެންޓްކޮށްފައެވެ. އެކަކު ބުނެފައި ވަނީ މިއީ ބްލޮކްބާސްޓާ ފިލްމަކަށް ވާނެ ކަމަށެވެ.
ފޮޓޯއިން އަކްޝޭ ފެންނަނީ ބޮލުގައި ރަތްކުލަ ފަގުޑިއެއް އަޅައިގެން ވަރަށް ކްލެސިކް އައިނެއް އަދި ދިގު ތުނބުޅިއެއްގައެވެ. މި ފިލްމުގައި އަކްޝޭ ސިކެއްގެ ރޯލު ކުޅޭއިރު އޭނާ މީގެ ކުރިންވެސް ވަނީ ކާމިޔާބު ސިކު ކެރެކްޓަރ ތަކެއް ކުޅެފައެވެ. އޭގެތެރޭގައި 2008ގެ "ސިންގ އިޒް ކިންގް"، 2015ގެ "ސިންގ އިޒް ބްލިންގް" އަދި 2019ގެ ފިލްމު "ކެސާރީ" ފާހަގަކޮށްލެވެއެވެ.
މިހާތަނަށް ވަކި ނަމެއް ދީފައި ނުވާ އަކްޝޭގެ މި ފިލްމަށް، ޕްރޮޖެކްޓް ނަމަކަށް ދީފައިވަނީ "ކެޕްސޫލް ގިލް" އެވެ. ފިލްމުގެ ލީޑުން އަކްޝޭއާއެކު ފެނިގެންދާނީ ފިލްމު "ކެސާރީ"ގައި އަކްޝޭއާއެކު ފެނިގެންދިޔަ ޕަރީނިތީ ޗޯޕްރާއެވެ.
މިމަހު 4 ވަނަ ދުވަހު އިނގިރޭސި ވިލާތުގައި ޝޫޓިން ފަށާފައިވާ މި ފިލްމަކީ 2019 ގައި މަރުވި އިންޑިއާގެ ޗީފް މައިނިން އޮފިސަތު ޖަސްވަންތު ސިންގް ގިލްގެ ހަޔާތުގެ މައްޗަށް ބިނާކޮށް ހަދާ ފިލްމެކެވެ. ޖަސްވަންތު ސިންގް ގިލްއަކީ 1989 ވަނަ އަހަރު ވެސްޓް ބެންގާލްގެ ބޯޓުދެލި މައިނެއްގައި ފެންބޮޑުވުމުގެ ސަބަބުން ތާށިވި 64 މައިނަރުން ސަލާމަތްކުރި ރިއަލް ލައިފް ހީރޯއެކެވެ.
ޓިނޫ ސުރޭޝް ދެސާއީ ޑަރެކްޓް ކޮށް ޕޫޖާ އެންޓަޓެއިންމަންޓުން ގެނެސްދޭ މި ފިލްމުގެ ކާސްޓުގައި އަކްޝޭ އާއި ޕަރީނިތީގެ އިތުރުން ކުމުދު މިޝްރާ، ރަވީ ކިޝަން އަދި ދިބިޔެންދު ބަޓަޗާރިއާ ހިމެނެ އެވެ. ބޮލީވުޑްގެ ފިލްމެއްގައި އިނގިރޭސިވިލާތުގައި ހަރަކާތްތެރިވާނެ އެންމެ ބޮޑު ކުރޫ މި ފިލްމުގެ މަސައްކަތުގައި ހަރަކާތްތެރިވާނެ އެވެ. އެގޮތުން ފިލްމުގެ މަސައްކަތުގައި 300 އަށްވުރެ ގިނަ މީހުން ހަރަކާތްތެރިވާނެއެވެ.
