އިނގިރޭސި ޕްރިމިއާ ލީގުގެ ޗެމްޕިއަން މެންޗެސްޓާ ސިޓީގެ އެންމެ މުހިންމު އެއް ކުޅުންތެރިޔާ ކަމަށްވާ ރަހީމް ސްޓާލިން ވާދަވެރި ޗެލްސީއަށް ބަދަލުވާން ނިންމައި، އެ ކުލަބާއެކު އެއްބަސްވުމަކަށް އަތުވެއްޖެއެވެ.
ސްޓާލިން ހޯދުމަށް ޗެލްސީގެ އިތުރުން އެހެން ވަރަށް ގިނަ ކުލަބުތަކުންވެސް އަންނަނީ މަސައްކަތްކުރަމުންނެވެ.
ސްޓާލިން ސިޓީ އާއެކު ހަދާފައިވާ އެއްބަސްވުން ހަމަވާން ދެން އޮތީ އެންމެ އަހަރެކެވެ. ސިޓީން ސްޓާލިންގެ ސޮއި ހޯދީ 2015 ވަނަ އަހަރު ވާދަވެރި ލިވަޕޫލުން 49 މިލިޔަން ޕައުންޑުގެ ފީއަކަށެވެ. އަދި މިހާތަނަށް ސްޓާލިން ވަނީ ސިޓީއަށް 399 މެޗު ކުޅެދީ، 131 ލަނޑު ޖަހާދީފައެވެ.
ސްޓާލިން ޗެލްސީއަށް ބަދަލުވުމުގެ ކަންތައް ދެ ކުލަބުގެ މެދުގައި ހަމަޖެހިއްޖެނަމަ، އޭނާ ވެގެންދާނީ ޓޮޑް ބޮއެހްލީގެ ކޮންސޯޓިއަމުން ޗެލްސީއާ ހަވާލުވި ފަހުން އެ ކުލަބަށް ބަދަލުވާ މިފެންވަރުގެ ފުރަތަމަ ކުޅުންތެރިޔާއަށެވެ. މައުލޫމާތު ލިބޭގޮތުގައި ކުރިއަށް އޮތް ހަފުތާއެއްގެ ތެރޭގައި ސްޓާލިން ޗެލްސީއަށް ބަދަލުވުމުގެ ހުރިހާ ކަމެއް ހަމަޖެހިގެންދާނެއެވެ. އަދި އަންނަ ހަފުތާގައި އެމެރިކާގައި ބޭއްވުމަށް ހަމަޖެހިފައިވާ ޕްރީ-ސީޒަން ޓުއާގައި ސްޓާލިންނަށް ބައިވެރިވެވޭނެ ކަމަށް ޗެލްސީން އުއްމީދުކުރާ ކަމަށްވެސް ރިޕޯޓުތައް ބުނެއެވެ.
