އެމެރިކާ ދަރިކޮޅުގެ ޕަލަސްތީން ރައްޔިތެއް ކަމުގައިވާ، އިޒްރާއިލް ސިފައިންގެ ހަމަލާއެއްގައި މަރުވެފައިވާ އަލްޖަޒީރާގެ މަޝްހޫރު ނޫސްވެރިޔާ ޝީރީން އަބޫ އަކްލޭހު މަރުވިކަމަށް "ބެލެވެނީ" އިސްރާއީލު ސިފައިންގެ ބަޑިގެ ހަމަލާއަކުން ކަމުގައި އެމެރިކާއިން ބުނެފިއެވެ.
އެމެރިކާގެ ސްޓޭޓް ޑިޕާޓްމަންޓުން ބުނެފައިވަނީ، އެ ޑިޕާޓްމަންޓުން ހިންގި މިނިވަން ތަހުގީގުން، ޝީރީން އަބޫ އަކްލޭހުގެ މަރުވި ވަޒަނުގެ ހަގީގަތް ހޯދާ، ހަގީގަތާއި ހަމައަށް ވާސިލް ވެވިފައި ނުވާކަމަށާއި، އެހެންނަމަވެސް، އަބޫ އަކްލޭހު "މަރުވެފައިވާކަމަށް ބެލެވެނީ އިސްރާއީލުގެ އަސްކަރިޔާއިން ދިން ބަޑީގެ ހަމަލާއެއްގައި" ކަމުގައެވެ.
"ބެލިސްޓިކް އެކްސްޕާޓް ނިންމާފައިވަނީ، ވަޒަނަށް ގެއްލުން ވެފައިވާ މިންވަރު ބޮޑުކަމުން، ވަޒަނުގެ އަސްލު ހަގީގަތް ހޯދެން ނެތް ކަމަށް،" އެމެރިކާ ސަރުކާރުން ހޯމަދުވަހު ނެރެފައިވާ ބަޔާނުގައި ވިދާޅުވެފައި ވެއެވެ.
ޝީރީން އަބޫ އަކްލޭހުގެ މަރާއި ގުޅިގެން އިސްރާއީލުންނާއި ފަލަސްތީނުން މިހާތަނަށް ކޮށްފައިވާ ތަހުގީގު ޚުލާސާ ކުރަމުން ޔޫއެސް ސެކިއުރިޓީ ކޯޑިނޭޓަރ ހޯމަ ދުވަހު ވިދާޅުވެފައި ވަނީ، މިހާތަނަށް ހަދާފައިވާ ފޮރެންސިލް ތަހުލީލުތަކުން، މިއީ ގަސްތުގައި ދީފައިވާ ހަމަލާއެއްކަމުގައި ނިންމާންޖެހޭ އެއްވެސް ސަބަބެއް ނެތް ކަމުގައެވެ.
އަލްޖަޒީރާގެ މަޝްހޫރު ޖާނަލިސްޓް، އަދި އެމެރިކާ ދަރިކޮޅުގެ ފަލަސްތީނު ރައްޔިތެއް ކަމުގައިވާ ޝީރީން އަބޫ އަކްލޭހު އިޒްރާއީލު ސިފައިން ދިން ބަޑީގެ ހަމަލާއެއްގައި މަރުވެފައިވަނީ ފާއިތުވެދިޔަ މޭމަހުގެ 11 ވނަ ދުވަހުއެވެ.
އިޒްރާއީލު ސިފައިން އޭނާ މަރާލާފައިވަނީ، ހިފާފައިވާ ހުޅަނގު އައްސޭރީގެ ޖެނިން ރެފިއުޖީ ކޭމްޕުގައި އިޒްރާއީލު ސިފައިން ކުރިޔަށް ގެންދިޔަ އަޕަރޭޝަނެއް އޭނާ ކަވަރު ކުރަމުން ދަނިކޮށެވެ.
ޝީރީން އަބޫ އަކްލޭހުގެ މަރާއި ގުޅިގެން ލިބިފައިވާ މައުލޫމާތުތަކުން އިގޭގޮތުގައި އޭނާގެ ބޮލަށް އަރާފައިވާ ވަޒަނަކީ އިސްރާއީލުން ސިފައިން ފޮނުވާލި ވަޒަނެއް ކަމުގައި ޔުއެންއިންވެސް ވަނީ ބުނެފައެވެ.
"ލިބިފައިވާ ހުރިހާ މައުލޫމާތުތަކަށް ބަލާއިރު، އަބޫ އަކްލޭހުގެ ބޮލަށް އެރި ވަޒަނާއި، އަދި އޭނާގެ އެކުވެރި ނޫސްވެރިޔާ އަލީ ސަމުދީ ޒަޚަމްވި ވަޒަނަކީ އިސްރާއީލު ސިފައިން ފޮނުވާލި ވަޒަނެއް ކަމާއި، އެއީ ފަލަސްތީނުގެ ހަގުރާމަވެރިންގެ ހަމަލާތަކުން އައިސްފައިވާ ވަޒަނެއް ނޫންކަން އެގެން އެބަހުރި،" ޔޫއެން ހިއުމަން ރައިޓްސް އޮފީސް (OHCHR)ގެ ތަރުޖަމާން ރަވީނާ ޝަމްދަސަނީ ޖެނީވާގައި ރިޕޯޓަރުންނާއި ވާހަކަ ދައްވަމުން ވިދާޅުވެފައި ވެއެވެ.
އެމެރިކާއިން އަބޫ އަކްލޭހުގެ މަރާއި ގުޅިގެން ހިންގި ތަހުގީގަށްފަހު، ފަލަސްތީނުގެ ސީނިއަރ އޮފިޝަލަކު ވިދާޅުވެފައިވަނީ، އަބޫ އަކްލޭހުގެ ބޮލަށް އެރި ވަޒަރުގެ ފޮރެންސިލް ތަހުލީލްތަކުން ސާފު ނަތީޖާ ނުލިބުމާއެކު، އެމެރިކާއިން އިޒްރާއީލުގެ މަސްލަހަތު ހިމާޔަތް ކުރުމަށް އިސްކަން ދީފައި ވާކަމުގައެވެ.
އަބޫ އަޤްލީހުއަކީ، އަލް ޖަޒީރާގެ އަރަބި ނިއުސް ސާވިސްގެ އެންމެ މަޝްހޫރު އެއް ނޫސްވެރިޔާއެވެ. އަދި އޭނާ ވަނީ އިސްރާއިލް ފަލަސްތީނު މައްސަލައިގެ ޚަބަރުތައް ފާއިތުވި 15 އަހަރު ކަވަރު ކޮށްފައެވެ.