ރާއްޖެއަށް ކުރަމުންދާ ވިއްސާރަ އާއި އިއްޔެއިން ފެށިގެން އަރަމުންދާ އުދައިގެ ސަބަބުން ގެއްލުން ލިބެމުންދާ ފަރާތްތަކަށް އަވަސްގޮތެއްގައި ކަމާއި ބެހޭ ފަރާތްތަކުން އެހީތެރިކަން ފޯރުކޮށްދެމުންދާނެ ކަމީ ޔަގީންކަމެއް ކަމަށް ޖުމްހޫރީ ޕާޓީ (ޖޭޕީ)ން ބުނެފިއެވެ.
މިދުވަސްވަރު ރާއްޖޭގެ ރަށްރަށަށް މޫސުން ގޯސްވެ، ބައެއް ރަށްރަށަށް އުދަ އަރައި، ބޮޑެތި ގެއްލުންތައް ދަނީ ލިބެމުންނެވެ. ބައެއް ގެތަކުގައި މީހުން ދިރިނޫޅެވޭ ވަރަށް އުދައިގެ އަސަރު ވަނީ ކޮށްފައެވެ.
އެކަމާ ގުޅިގެން ޖުމްހޫރީ ޕާޓީން މިރޭ ނެރުނު ބަޔާނެއްގައި ބުނީ އުދައިގެ ސަބަބުން ގެއްލުން ލިބުނު ފަރާތްތަކަށް ކުރިމަތިވެފައިވާ ހިތާމައިގައި އެ ޕާޓީން ބައިވެރިވާ ކަމަށެވެ. އަދި މިވަގުތަކީ އެންމެން އެއްބައިވަންތަކަމާ އެކު މަސައްކަތް ކުރަންވީ ވަގުތު ކަމަށާއި އަދި ގެއްލުން ލިބުނު ފަރާތްތަކަށް ކަމާބެހޭ ފަރާތްތަކުން އަވަހަށް އެހީ ފޯރުކޮށްދޭނެ ކަމަށް އެ ޕާޓީން ޔަގީންކުރާ ކަމަށް އެ ބަޔާނުގައިވެއެވެ.
ގެއްލުން ލިބުނު ފަރާތްތަކަށް އަވަސް ގޮތެއްގައި ކަމާބެހޭ ފަރާތްތަކުން އެހީތެރިކަން ފޯރުކޮށްދެއްވަމުން ގެންދަވާނެ ކަމަށް މި ޕާޓީން ޔަގީން ކުރަމެވެ.
– ޖޭޕީގެ ބަޔާނުގައިވެއެވެ.
ޖޭޕީން ބުނެފައިވަނީ މިވަގުތަކީ ހުރިހާ ފަރާތަކުންވެސް އެއްބައިވަންތަކަމާއެކު، ގެއްލުން ލިބުނު ފަރާތްތަކުގެ ހާލު އަހުވާލު ބަލައި ކަމާއިބެހޭފަރާތްތަކުން ކުރަމުންގެންދާ ކަންކަމަށް ހިތްވަރުދީ، އެންމެން ގުޅިގެން މަސައްކަތް ކުރަންވީ ވަގުތު ކަމުގައި ހެދުމަށް އެ ޕާޓީން ވަނީ ގޮވާލާފައެވެ.
އަދި މޫސުމީ އިދާރާތަކާއި ކަމާއި ބެހޭ އެންމެހާ މުވައްސަސާތަކުން އަންގާ އެންގުންތަކާއި އިލްތިމާސްތަކަށް ބޯލަނބައި ދަތުރުފަތުރުގެ ހުރިހާ އިންތިޒާމްތައް ހަމަޖެއްސުމަކީ ވަރަށް މުހިންމު ކަމެއްކަށް އެ ބަޔާނުގައި ވަނީ ބުނެފައެވެ.
