ޔޫރަޕް ސަރަހައްދުގައި ގާއިމްވެ ތިބި ނޭޓޯގެ ފައުޖުތައް އެމެރިކާއިން އިތުރަށް ވަރުގަދަ ކުރާނޭކަން އެގައުމުގެ ރައީސް ޖޯ ބައިޑްން އިއުލާން ކުރައްވައިފިއެވެ.
މިކަން އިއުލާން ކުރައްވަމުން ބައިޑްން ވިދާޅުވެފައިވަނީ، ނޭޓޯގެ އިއްތިހާދުގެ ބޭނުންތެރިކަން މިއަށްވުރެ ބޮޑަށް ޖެހުނު ދުސްވަރެއް ތާރީޚުގައިވެސް އައިސްފައި ނުވާ ކަމުގައެވެ.
"ހުރިހާ ދިމާލަކުންވެސް، އެއްގަމާއި ވައި އަދި ކަނޑުގެ މަގުން ނޭޓޯ ވަރުގަދަ ކުރެވިގެން ދާނެ،" މެޑްރިޑްގައި މިހާރު ކުރިޔަށްދާ ޓްރާންސްއެޓްލާންޓިކް އިއްތިހާދުގެ ސަމިޓުގައި ވާހަކަ ދައްކަވަމުން ބައިޑްން ވިދާޅުވެފައި ވެއެވެ.
ނޭޓޯގް ސެކެޓްރީޖެނެރަލް ޖެންސް ސްޓޮލްޓެންބާގްއާއި ބައްދަލު ކުރައްވަމުން، ނޭޓޯގެ ފައުޖުތައް އިތުރަށް ވަރުގަދަ ކުރުމަށް ބައިޑްން އިއުލާން ކުރެއްވި ކަންކަމުގެ ތެރޭގައި ހިމެނެނީ:
- ސްޕެއިންގެ ރޮޓާގައި އޮންނަ އެމެރިކާގެ ނޭވަލް ޑެސްޓްރޯޔަރގެ އަދަދު 4 އިން 6 އަށް އިތުރު ކުރުން.
- އެމެރިކާގެ 5ވަނަ އާރމީ ކޯޕްސްގެ ދާއިމީ ހެޑްކުއާޓަރއެއް ޕޮލޭންޑުގައި ގާއިމްކުރުން.
- ރޫމޭނިއާގައި ދައުރުވާ ގޮތަށް ތިބޭ ބުރިގޭޑިއަރުންގެ އަދަދު އިތުރުކުރުން. މީގެ ތެރޭގައި ހިމެނެނީ 3،000 ފައިޓަރސްއާއި 2،000 މީހުންގެ މައްޗަށް އެކުލެވޭ ކޮމްބެޓް ޓީމް.
- ބޯލްޓިކް ގައުމުތަކުގައި، ދައުރުވާގޮތަށް ތިބޭ ސިފައިންގެ އަދަދު އިތުރުކުރުން.
- F-35 ސްޓީލްތު މަރުކާގެ ފައިޓަރ ޖެޓް އުފުލޭ ވަރުގެ އިތުރު ދެ އަސްކަރީ މަތިންދާ ބޯޓު އިނގިރޭސިވިލާތަށް ދިނުން.
- ޖާރމަނީއާއި އިޓަލީގައި އެއަރ ޑިފެންސްގެ ގާބިލްކަން އިތުރު ކުރުން.
"ނޭޓޯގައި ހިމެނޭ އަހަރެމެންގެ އެކުވެރިންނާއެކީ އަހަރެމެން ޔަގީން ކުރާނަން ކޮންމެ ދިމާލަކުންވެސް އަތުވެދާނެ ނުރައްކަލަކަށްވެސް ނޭޓޯ އޮތީ ފުރިހަމަޔަށް ތައްޔާރު ވެފައިކަން،" ބައިޑްން ވިދާޅުވެފައި ވެއެވެ.
ކޮމެންޓު ފޮނުވާ