ގައުމީ އެއާލައިން، މޯލްޑިވިއަންގެ ފްލައިޓް އޮޕަރޭޝަންސް ޑިރެކްޓަރުގެ މަގާމުން ވަކިކުރި ކެޕްޓަން މުޙައްމަދު އަމީނަށް އަލުން އެ ފެންވަރުގެ ވަޒީފާއެއް ދިނުމަށް ސިވިލް ކޯޓުން ހުކުމްކޮށްފިއެވެ. މޯލްޑިވިއަންގެ ފްލައިޓް އޮޕަރޭޝަންސް ޑިރެކްޓަރުގެ މަގާމުން އަމީން ވަކިކުރީ 2019ވަނަ އަހަރުއެވެ.

ޢަމީންއަށް އަލުން ވަޒީފާ ދިނުމަށް ސިވިލް ކޯޓުން ކުރި ޙުކުމުގައި ވަނީ އަމީން ވަޒީފާ އިން ވަކިކުރީ ގޯސްކޮށް ކަމަށެވެ. އެހެންކަމުން   އެ ފެންވަރުގެ އެހެން މަގާމެއް 15 ދުވަހުގެ ތެރޭގައި ދިނުމަށް މޯލްޑިވިއަންގެ މައްޗަށް ކުރި ހުކުމުގައިވެއެވެ. އަދި މަގާމުން ވަކިކުރި ދުވަހުން ފެށިގެން ވަޒީފާ އަނބުރާ ދިނުމާ ހަމައަށް ލިބެންޖެހޭ މުސާރައާއި އިނާޔަތްތައްވެސް ދިނުމަށް ސިވިލް ކޯޓުގެ ޙުކުމުގައިވެއެވެ. ނަމަވެސް އެ މުއްދަތުގައި އަމީން، އެހެން ވަޒީފާއެއް އަދާކުރިނަމަ، އެ ފައިސާއެއް އުނިކުރަން ޖެހޭނެ ކަމަށް ކޯޓު ހުކުމުގައިވެއެވެ.

މި މައްސަލާގައި މޯލްޑިވިއަނުން ކޯޓުގައި ވަނީ އަމީން އެމަގާމުން ވަކިކުރުމަށް ފަހު، އެހެން ޒިންމާއެއް ހަވާލުކުރާނެކަމަށް އަންގާފައި ވަނިކޮށް އޭނާ ވަޒީފާ އަށް ހާޒިރުނުވުމުން އޮކްޓޫބަރު 2019ގައި ވަޒީފާ އިން ވަކިކުރީކަމަށެވެ. ނަމަވެސް ކޯޓުގެ ހުކުމުގައިވަނީ ފްލައިޓް އޮޕަރޭޝަންސް ޑިރެކްޓަރުގެ މަގާމުން ޖޫން 2019 ގައި އަމީން ވަކިކުރި ފަހުން އެހެން ޒިންމާއެއް އޭނާއާ ހަވާލު ކޮށްފައިނުވާކަމަށް ބުނެފައެވެ. އެހެންވެ، އޭނާ ވަޒީފާ އަށް ހާޒިރުނުވުމުން ވަކިކުރީ ކަމަށް މޯލްޑިވިއަން އިން ބުނާ ބުނުން ރަނގަޅު ނޫން ކަމަށް  ސިވިލް ކޯޓުގެ ޙުކުމުގައިވެއެވެ.

މޯލްޑިވިއަންގެ މައްޗަށް އަމީންއަށް ވަޒީފާ ދިނުމަށް ކުރި ހުކުމުގައިވާ ބުނެފައިވަނީ އަމީން އަދާކުރި މަގާމަކީ ވަކި މަގާމެއް ނޫންކަމަށާއި، އެއީ އޭނާ އަދާކުރި ވަޒީފާއާއެކު އޮތް ޒިންމާއެއް ކަމަށެވެ. މޯލްޑިވިއަންގެ ފަރާތުން ކޯޓުގައި ބުންޏަސް އެގޮތަށް ބެލެވެން ނެތް ކަމަށް ހުކުމުގައި ބުނެފައިވެއެވެ އަދި އަމީން ވަޒީފާ އިން ވަކިކުރަންޖެހޭ ކުރަންޖެހޭ މަގްބޫލު ސަބަބެއް މޯލްޑިވިއަން އަށް ދެއްކިފައި ނުވާކަމަށްވެސް ސިވިލް ކޯޓުގެ ޙުކުމުގައިވެއެވެ.