އިނގިރޭސި ޕްރިމިއާ ލީގުގެ ކްލަބް ޗެލްސީގެ އާ ވެރިޔާ، ޓޮޑް ބޯލީގެ ލީޑަޝިޕުގެ ފުރަތަމަ ސައިނިން އަކަށް، މެންޗެސްޓާ ސިޓީ އަށް ކުޅޭ އިނގިރޭސި ވިލާތުގެ ވިންގާ ރަހީމް ސްޓާލިން ހޯދަން ޗެލްސީން ދެވަނަ ބިޑެއް ކުރަން ތައްޔާރު ވެއްޖެއެވެ.
ޗެލްސީގެ ފޯވާޑް ރޮމެލޫ ލުކާކޫ، ލޯނުގެ އުސޫލުން އިންޓަ މިލާނަށް ބަދަލުވާން ނިންމާފައި ވުމާއި ހަކީމް ޒިޔެޝް އާއި ކްރިސްޓިއަން ޕުލިސިޗްގެ ކުރިމަގާ މެދު ސުވާލު އުފެދިފައިވާ ދަނޑިވަޅެއްގައި ސްޓާލިން ވެފައި ވަނީ ޗެލްސީގެ އެންމެ މުހިއްމު އަމާޒަށެވެ.
ސްޓާލިން އަކީ އަންނަ ސީޒަނަށް ޓީމް ވަރުގަދަ ކުރުމުގެ ގޮތުން ޗެލްސީއިން އެކްލަބަށް ގެންދަން އެންމެ ބޮޑަށް ބޭނުންވާ ކުޅުންތެރިޔާއަަށެވެ. ޗެލްސީއިން ސިޓީއާއެކު މަޝްވަރާތައް ފެއްޓި ނަމަވެސް އަދި ރަސްމީކޮށް ބިޑެއް ހުށަހަޅާފައި ނުވާކަމަށް ރިޕޯޓުތައް ބުނެއެވެ. ނަމަވެސް މާގިނަ ދުވަހެއް ނުވެ އެކަންވެސް ޗެލްސީއިން ކުރާނެކަމަށް މައުލޫމާތުލިބެއެވެ. ސިޓީއާއި އެކު ސްޓަރލިންގ ހަދާފައިވާ އެއްބަސްވުން ކުރިއަށް އޮތް ސީޒަނާއެކު ހަމަވާނެއެވެ.
އަދި ބާކީ އެއް އަހަރަށް ވީއިރު ސްޓަރލިންގ އާއި ސިޓީ އާ ދެމެދު އާ އެއްބަސްވުމަކަށް އާދެވޭގޮތްވަނީ ނުވެފައެވެ. ސްޓަރލިންގ ބޭނުންވަނީ މިހާރަށް ވުރެ ގަވައިދުން ކުޅުމުގެ ފުރުސަތު ލިބުމަށެވެ. ނަމަވެސް ސިޓީގައި ފަހަކަށް އައިސް އޭނާ އެންމެ އެދޭވަރަށް ކުޅުމުގެ ފުރުސަތު ވަނީ ލިބޭގޮތް ނުވެފައެވެ.
ސްޓަރލިންގ ސިޓީ އާއި ގުޅިފައިވަނީ 2015 ވަނަ އަހަރު ލިވަޕޫލްއިން 49 މިލިއަން ޕައުންޑްގެ އަގަކަށެވެ. އަދި މިވީ ތާނގާ އޭނާވަނީ 339 މެޗް ކުޅެދީ 131 ލަނޑު ޖަހާދީފައެވެ.
