މާލޭ ސަރަހައްދުން ދޭން ނިންމާފައިވާ ގޯތި ދޫކުރާ އުސޫލުގައި މާލޭގެ ރަށްވެހިންގެ ގޮތުގައި ބަޔާންކޮށްފައިވާ މާއްދާ އުވައިލުވުމަށް ހައި ކޯޓަށް މައްސަލަ ހުށަހެޅުމަށް ތައްޔާރުވެއްޖެއެވެ.

މާލޭގެ ރައްޔިތުންނަށް ހިލޭ ގޯތި ދޫކުރުމަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ މުހިއްމު ވަޢުދުފުޅެކެވެ. ސަރުކާރުން މާލޭ ރައްޔިތުންނަށް ޚާއްސަކޮށްފައިވާ 3000 ގޯއްޗަށް ކުރިމަތިލުމަށް މިވަނީ ހުޅުވާލާފައެވެ. މި ގޯތިތައް ދޫކުރުމަށް ސަރުކާރުން ނިންމާފައިވަނީ ހުޅުމާލެއާއި ގުޅީފަޅުންނެވެ. ގޯތި ދޫކުރާ އުސޫލުގައިވާ ގޮތުން، މާލޭގެ މީހުން ކަމަށް ބަލާނީ އެއްވެސް އިރެއްގައި މާލެ ނޫން ތަނެއްގައި ރަޖިސްޓަރީވެފައި ނެތް މީހުންނަށެވެ.

އެކަމަކު އެ އުސޫލުގެ ސަބަބުން މާލޭ ބައެއް މީހުންނަށް މާލެއިން ދޫކުރާ ގޯއްޗަށް ކުރިމަތިލުމުގެ ހައްގެއް ނުލިބެއެވެ. މިގޮތުން މާލޭ މީހުން ރަށްރަށު މީހުންނާ ކައިވެނިކޮށްގެން ލިބިފައި ތިބި ދަރިން ވެސް ރަށްރަށަށް ފުރަތަމަ ރަޖިސްޓްރީކޮށް، ފަހުން މާލެއަށް ރަޖިސްޓްރީ ބަދަލުކޮށްފައި އެބަހުއްޓެވެ. އުސޫލު އޮތް ގޮތުން އެމީހުންނަށް ގޯއްޗެއް ނުލިބޭނެއެވެ. ކުރީގައި އުސޫލު އޮންނަ ގޮތުން ދަރިން ރަޖިސްޓްރީ ކުރަން ޖެހޭނީ ބައްޕަގެ ރަށުގައެވެ.

އެ އުސޫލުގެ ސަބަބުން މާލޭގެ ބައެއް މީހުންނަށް ގޯއްޗަށް އެދުމުގެ ފުރުސަތު ނުލިބޭ ކަމަށް ވިދާޅުވެ، އެ މައްސަލަ ކޯޓަށް ހުށަހެޅުމަށް ތައްޔާރުވަމުން ދަނީ ގާނޫނީ ވަކީލު ޝިހާދު އިބްރާހިމެވެ. އޭނާ މިއަދު ވިދާޅުވީ، މާލޭގެ ރަށްވެއްސެއްގެ ގޮތުގައި ރަޖިސްޓަރީވެފައިވާ ކޮންމެ މީހަކީ މާލޭގެ މީހެއް ކަމަށާއި ވަކި ކަމެއްގައި މާލޭ ރައްޔިތުކަން ވަކި ގޮތަކަށް މާނަކޮށް، ހައްގުތައް ހަނި ނުކުރެވޭނެ ކަމަށެވެ. އެހެންވެ، އަންނަ އާދިއްތަ ދުވަހު މައްސަލަ ހައި ކޯޓަށް ހުށަހެޅުމަށް މަސައްކަތް ކުރަމުން އަންނަ ޝިހާދު ވިދާޅުވިއެވެ.

މާލޭ ރައްވެއްސެއްގެ ގޮތުގައި ރަޖިސްޓްރީ ވެފައިވާ ކޮންމެ މީހަކީ މާލޭ ރައްވެއްސެއް. އެހެން ކަމުން ވަކިކަމެއްގައި މާލޭ ރައްޔިތުކަން ވަކިގޮތަކަށް މާނަކޮށް ހައްގުތަށް ހަނި ނުކުރެވޭނެ.

– ޝިހާދު ވިދާޅުވިއެވެ.

ސަރުކާރުން މިހާރު ހުޅުވާލާފައިވާ 3،000 ގޯއްޗާއި 4،000 ފްލެޓަށް ކުރިމަތިލުމުގެ ފުރުސަތު ހުޅުވާލާފައި ވަނީ އަންނަ ސެޕްޓެމްބަރު 26 ގެ ނިޔަލަށެވެ.