ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހާއިމެދު ކުރާ އުއްމީދުތައް ފެނަށް ދިޔަނުދެއްވުމަށް އެމަނިކުފާނުގެ އަރިހުގައި ދީނީ ޢިލްމުވެރިޔާ ޑރ.މުޙައްމަދު އިޔާޟް ޢަބްދުއްލަތީފް އެދިވަޑައިގެންފިއެވެ.

ޑރ.އިޔާޟްއަކީ ރައީސް އިބްރާހީމް މުޙައްމަދު ޞާލިޙަށް ވަރަށް ބޮޑަށް ތަޢީދުކޮށް ޓްވީތްކުރައްވާ ބޭފުޅެކެވެ. އެގޮތުން ރައީސް ޞާލިޙަކީ މައުސޫމް ބޭފުޅެއްކަމަށްވެސް ވިދާލުވެ އެމަނިކުފާނުގެ ސިޔާސަތުތަކަށްތާއީދުކޮށް ވާހަކަފުޅު ދައްކަވައެވެ.

މިގޮތުން ސަރުކާރުގައި ހިމެނޭ އެމްޑީޕީގެ ބައެއް މަޖިލިސް މެންބަރުންނާއި، ސިޔާސީ ބައެއް ފަރާތްތަކާއި ގުޅުންހުރި ބޭފުޅުންގެ ބަރަހަނާ ފޮޓޯތަކާއި ވީޑިއޯތައް ލީކުވެ ސަރުކާރަށް އަމާޒުވެފައިވާ ފާޑުކިޔުން ވަނީ ވަރަށް ބޮޑަށް އަމާޒުވެފައެވެ. މި ދަނޑިވަޅުގައި ޑރ.އިޔާޟް ކުރެއްވި ޓްވީތްގައި ވިދާޅުވީ، “ބޮޑުންނަށް މޮޅުގޮތް, ނިކަމެތިންނަށް ދެރަގޮތް” މި އުޞޫލު ބަދަލުކޮށްގެން މެނުވީ މުޖްތަމަޢުގެ ހަމަޖެހުމެއް ދުވަހަކުވެސް ނާންނާނެކަމަށެވެ. ޑރ.އިޔާޟް ވަނީ ރައީސް ޞާލިހު ކިބައި، އެމަނިކްފާނާއި މެދު ކުރާ އުއްމީދުތައް ފެނަށް ދިޔަނުދެއްވުމަށް އެދިވަޑައިގެންފައެވެ.

“ބޮޑުންނަށް މޮޅުގޮތް, ނިކަމެތިންނަށް ދެރަގޮތް” މި އުޞޫލު ބަދަލުކޮށްގެން މެނުވީ މުޖްތަމަޢުގެ ހަމަޖެހުމެއް ދުވަހަކުވެސް ނާންނާނެ. @ibusolih. މަނިކްފާނާއި މެދު އަޅުގަޑުމެން ކުރާ އުއްމީދުތައް ފެނަށް ދިޔަނުދެއްވާ.

— Dr.Mohamed Iyaz (@dr_iyaz) June 25, 2022

ދާދިފަހުން ގަލޮޅު ދަނޑުގައި ކުރިއަށްދިޔަ ޔޯގާ ހަރަކާތަށް ހުރަސްއެޅިކަމުގެ ތުހުމަތުގައި ދީނީ ޢިލްމުވެރިން ހައްޔަރުކުރުމާއި، މިހާރު ލީކްވެފައިވާ ސަރުކާރުގެ ބައެއް އިސްވެރިންނާއި އެމީހުންގެ ގުޅުންހުރި ފަރާތްތަކުގެ ބަރަހަނާ ފޮޓޯއާއި ވީޑިއޯތަކުގެ ސަބަބުން ގިނަބައެއްގެ ފާޑުކިޔުން ވަނީ އަމާޒުވެފައެވެ. އިޔާޟް ވިދާޅުވީ، ފާޙީޝް ޢަމަލު ހިންގަނިކޮށް ވިޑީއޯ އަކުން ފެންނަފެނުމުގެ މައްޗަށް ޝަރްޢީގޮތުން އެމީހެއްގެ މައްޗަށް ޙައްދު ގާއިމް ނުކުރެވޭނެކަމަށާއި، ނަމަވެސް މުޖްތަމަޢުގެ ސަލާމަތާއި ރައްކާތެރިކަމަށްޓަކައި އެފަދަ މީހުންގެ މައްޗަށް ތަޢްޒީރީ އަދަބު ދިނުމުގެ ބާރު ޙާކިމާ އަށް ލިބިގެންވާކަމަށް ވިދާޅުވިއެވެ.