ކަނޑިންމަ މޯލްޑިވްސް ރިސޯޓުން ފަހިކޮށްދިން ފުރުސަތެއްގައި 19 އަހަރުން ދަށުގެ ގައުމީ ޓީމުގެ ކުުޅުންތެރިންނަށް އިޓަލީގެ ދެ ފުޓްބޯޅަ ތަރިން ކަމަށްވާ، ޑާވިޑޭ ކަލަބްރިއާ އާއި ޕެޓްރިކް ކުޓްރޯނޭއާ އެކު ތަޖުރިބާތަކެއް ހާސިލްކުރެވުމަކީ ހާއްސަ ކަމެކެވެ.
މިދިޔަ ހޮނިހިރު ދުވަހު ކަނޑިންމަ މޯލްޑިވްސްގެ ޓާފް ދަނޑުގައި އެ ބޭއްވި އިވެންޓަކީ ފުޓްބޯޅައިން ކުރިއަށްދިއުމުގެ އަޒުމުގައި ތިބި ޒުވާން ގައުމީ ޓީމުގައި ތިބި ކުޅުންތެރިންގެ އުންމީދުއާ ވާނެ ފަދަ ދަތުރެކެވެ. މަންޓާ އެއާ އާއި ޕްލެންކްޓަން މޯލްޑިވްސް ގުޅިގެން އިންތިޒާމުކުރި މި ކޭމްޕަކީ ރާއްޖޭގެ ހުނަރުވެރި 19 އަހަރުން ދަށުގެ ކުޅުންތެރިންނަށް، އިޓަލީގެ މަތީ ފެންވަރުގެ ޕްރޮފެޝަނަލް ފުޓްބޯޅަ ކުޅުންތެރިންނާއެކު ތަމްރީނު ކުރުމަށް ލިބުނު ވަރަށް ރަނގަޅު ފުރުސަތެއްކަން ސާބިތުވެގެން ދިޔައެވެ.
އަންނަ މަހު އިންޑިއާގައި ބާއްވާ 20 އަހަރުން ދަށުގެ ސާފް ޗެމްޕިއަންޝިޕަށް ގައުމީ ޒުވާން ޓީމު ތައްޔާރުވަމުން އަންނައިރު، ޓީމަށް އިރުޝާދުދެނީ ގައުމީ ޓީމުގެ ކުރީގެ އެސިސްޓަންޓް ކޯޗު އަޙްމަދު ޝާކިރު (ޝާކިއްޓެ) އެވެ. ކަނޑިންމައިގައި ކުރިއަށްދިޔަ މި ކޭމްޕުގައި ޝާކިއްޓެ ބައިވެރިވިއިރު، އިޓަލީގެ ކުޅުންތެރިންނާއި ޒުވާން ކުޅުންތެރިންނަށްވެސް އޭނާ ވަނީ އިރުޝާދުދީފައެވެ.
ކަނޑިންމައިގައި ކުރިއަށްދިޔަ މި ކޭމްޕުގައި ބައިވެރިވި ކަލާބްރިއާ އާއި ކުޓްރޯނޭ އަކީ އިޓަލީގެ ގައުމީ ޓީމަށްވެސް ކުޅެމުން އަންނަ ދެ ކުޅުންތެރިންނެވެ. މީޑިއާއަށް ދިން އިންޓަވިއުއެއްގައި ކުޓްރޯނޭ ބުނީ ޓްރެއިނިން ސެޝަނުގައި އެ ކުދިންނަށް އިރުޝާދުނީ ޖޯޝާއި ޝައުގުވެރިކަމާއެކު ތަމްރީނުތައް ހެދުމަށް ކަމަށެވެ. އަދި އެ ކުދިންނަކީ ފުޓްބޯޅައަށް ލޯބިކުރާ ކުދިންތަކެއް ކަމަށްވެސް ވަނީ ބުނެފައެވެ.
ދ. އަތޮޅުގައި 2015 ވަަނަ އަހަރު އޮޕަރޭޝަންސް ފެށި، ކަނޑިންމަ ރިސޯޓަކީ ފަހަކަށް އައިސް ކުޅިވަރުގެ ގިނަ އިވެންޓްތަކެއް ކުރިއަށްގެންދަމުން އަންނަ ރިސޯޓެކެވެ. ފަތުރުވެރިންގެ މެދުގައި މަގުބޫލު މި ރިސޯޓަކީ، 264 އެނދުގެ ބީޗް ރިސޯޓެކެވެ. ޓާފް ފުޓްބޯޅަ ދަނޑުތަކުގެ އިތުރުން، ޓެނިހާއި ވޮލީބޯޅަ ކޯޓުތައް ވެސް ކަނޑިންމަ ރިސޯޓްގައި ހުރެއެވެ.
