އިންޓަނޭޝަނަލް ޔޯގާގެ ދުވަސް ފާހަގަ ކުރުމަށް ޔޫތު މިނިސްޓްރީ އިން އިންޑިއާ ހައި ކޮމިޝަނާއި އިންޑިއަން ކަލްޗަރަލް ސެންޓަރު ގުޅިގެން ބާއްވަން ނިންމާފައިވާ ބޮޑު އިވެންޓަކީ ހިންދޫ ކަލާންގެއަކަށް ނިސްބަތްކޮށް ހިންގާ ހަރަކާތެއް ކަމުގައި ކެޕްޓަން އަލީ އިހުސާން ވިދާޅުވެއްޖެއެވެ.

ޔޫތު މިނިސްޓްރީ އިން އިންޑިއާ ހައި ކޮމިޝަނާއި އިންޑިއަން ކަލްޗަރަލް ސެންޓަރު ގުޅިގެން ޔޯގާ އެއްވުން ބާއްވަން ނިންމާފައިވަނީ މި މަހުގެ 21 ވަނަ ދުވަހުއެވެ. އެ ހަރަކާތް އޮތީ ރަސްފަންނުގައި އެ ދުވަހުގެ ހެނދުނު 6:00 ޖަހާއިރުއެވެ.

މިހަރަކާތާއި ގުޅިގެން ކެޕްޓަން އިހުސާން ވިދާޅުވީ މިއީ ބޮޑު އޮޅުވާލުމެއްގެ ތެރެއިން ހިންދޫ ދީން ފެތުރުމަށް ހިންގާ ކަމެއްކަމަށެވެ. މިހަރަކާތުގައި އޭގެ ފެށުން އެމީހުން ކިޔާ "ޝިވާ ކަލާންގެ" އަކަށް ނިސްބަތްކޮށް ހިންގާ ހިންދުގެ ހަރަކާތެއް ކަމަށް ކެޕްޓަން އިހުސާން ވިދާޅުވިއެވެ.

މި ނުރައްކަލުން ސަލާމަތްވެ ތިބުމަށް އެންމެހާ ދިވެހިންނަށް ދަންނަވަން. ޔޯގާގެ ނަމުގައި އިންޑިއާގެ މިހާރުގެ ޕްރައިމް މިނިސްޓާގެ އިސްނެންގެވުމަށް އިންޑިއާގެ ހުރިހާ އެމްބަސީތަކުން ހިންގާ މި ހަރަކާތަކީ އޭގެ ފެށުން އެމީހުން ކިޔާ "ޝިވާ ކަލާންގެ" އަކަށް ނިސްބަތްކޮށް ހިންގާ ހިންދުގެ ހަރަކާތެއް.

– ކެޕްޓަން އަލީ އިހުސާން ވިދާޅުވިއެވެ.

Mi nurakkalun salaamaiyyve thibumah emmehaa dhivehinnah dhannavan. Yoga ge namuga Indiage mihaaruge Prime Minister ge isnegumah Indiage hurihaa Embassy thakun hingaa mi harakaathaky eyge feshun emeehun kiyaa “shiva kalaange” akah nisbaiyy koh hingaa hindunge harakaatheh. https://t.co/9QVx9bTfPE

— Ali Ihusaan (@ali_ihusaan) June 20, 2022

އެ ހަރަކާތުގައި ބައިވެރިވާން ބޭނުންވާ ފަރާތްތަކަށް ބައިވެރިވުމުގެ ފުރުސަތު ޔޫތް މިނިސްޓްރީއިން މިހާރު ވަނީ ހުޅުވާލާފައެވެ. ޔޯގާއަކީ އިސްލާމީ ޝަރީއަތުގައި ހުއްދަނޫން ކަމެއްކަމަށް ދުނިޔޭގެ ބޮޑެތި ގިނަ އިލްމުވެރިން އިއްތިފާގް ވެއެވެ.

އަދި ޔޯގާއަކީ އެހެން ދީނެއްގެ ޝިޢާރެއްކަމުގައިވާތީ، އެއީ ޝަރުޢުގައި ޙަރާމް ކަމެއްކަން، މިޞްރުގެ "ދާރުލްއިފްތާއު"އާއި، ސަޢޫދީ ޢަރަބިއްޔާގެ ފަތުވާއާ ބެހޭ އެންމެ މަތީ މަޖްލިސް ހިމެނޭހެން، ދުނިޔޭގެ ބޮޑެތި ދީނީ މުއައްސަސާތަކުން ބަޔާންކޮށްފައިވާ ކަމަށް ވެސް އެފަރާތުން ވަނީ ބުނެފައެވެ.

ޔޯގާ އަކީ މުސްލިމުން ކުރުން ރަނގަޅު ނޫން ކަސްރަތެއް ކަމަށް އިލްމުވެރިން ބުނާ ސަބަބަކީ އެ ކަސްރަތަކީ ހިންދޫން އެމީހުންގެ ކަލާންގެ ރަމްޒުކޮށް އެއަށް އަޅުކަން ކުރުމުގެ ގޮތުން ކުރާ ބައެއް ކަންކަން ހިމަނައިގެން ހަދައިގެން އުޅޭ ކަސްރަތުތަކެއް ކަމަށްވާތީ ކަމަށެވެ.