ސްޓެލްކޯގެ 25 ވަނަ އަހަރީ ދުވަސް މިއަދު ކުލަގަދަކޮށް ފާހަގަ ކުރަމުންދާއިރު، އެކުންފުނީގެ އަމާޒު ހުރީ ރައްޔިތުންގެ ކުންފުންޏެއްގެ ގޮތުގައި ދެމި އޮތުމަށް ކަމަށް ސްޓެލްކޯގެ މެނޭޖިން ޑިރެކްޓަރ އަހުމަދު ޝަރީފް ވިދާޅުވެއްޖެއެވެ.

ސްޓެލްކޯގެ 25 ވަނަ އަހަރީ ދުވަސް ކުލަގަދަކޮށް، މާލެއާއި އަތޮޅު ތެރޭގެ އެކުންފުނީގެ ހުރިހާ އިންޖީނުގޭ ތަކެއްގައި ފާހަގަ ކުރަމުންދާއިރު، ރޭ ސްޓެލްކޯގައި ބޭއްވި ކުޑަ ހަފްލާއެއްގައި އެކުންފުނީގެ މިސްރާބާއި އަދި އާދެވިފައިވާ ހިސާބާއި ގުޅޭގޮތުން ކުންފުނީގެ ވެރިން ވަނީ ވާހަކަ ދައްކަވާފައެވެ.

ސްޓެލްކޯގެ އެމްޑީ ޝަރީފް ވިދާޅުވީ 25 އަހަރަކީ އެންމެ ޒުވާން ނޫކަށި ފުރައިގެ ދުވަސްތަކާއި ހަމައަށް އާދެވުންކަމަށެވެ. ސްޓެލްކޯގެ ފާއިތުވެދިޔަ 25 އަހަރުގެ ހަޔާތުގައި ކުންފުނި މިހިސާބަށް ގެނެސް ދީފައިވަނީ ބުރަ މަސައްކަތާއި، އެތައް މުވައްޒިފުންގެ ގުރުބާނީތަކުގެ ސަބަބުންކަމަށެވެ. މިފަދަ ދުވަހެއްގައި އެބޭފުޅުންގެ ޚިދުމަތުގެ އަގު ވަޒަން ކުރުމަކީ ކޮންމެހެން ކުރަންޖެހޭ ކަމެއްކަމަށް ޝަރީފް ވިދާޅުވިއެވެ.

އޭނާ ވިދާޅުވީ ސްޓެލްކޯ ހިންގުމުގައި އަބަދުވެސް އެންމެ ބޮޑު އަމާޒަކަށް ވާންވީ ރައްޔިތުންގެ ވިސްނުމާއި، ރައްޔިތުންގެ ޚިޔަލާއި އެއްގޮތަށް ކަންކަން ބައްޓަން ކުރުމަށްކަމަށެވެ. ކާމިޔާބު ކުފުންޏަކަށް ވުމަށްޓަކައި އެމަގަށް މަސައްކަތް ކޮށްފިނަމަ، ސްޓެލްކޯއަކީ ކާމިޔާބު ކުފުންޏަކަށް ވާނެކަމާއިމެދު ޝައްކު ނުކުރައްވާކަމަށް ޝަރީފް ވިދާޅުވިއެވެ.

މިއަދުން ފެށިގެން ކިޔަމާ ހިންގަވާ، ސްޓެލްކޯގެ ނަމުގައި އަޅުގަނޑުމެންގެ ކުންފުނި. މިއީ ވަރަށް ބޮޑު އިންޕެކްޓެއް އަންނާނެ. އަޅުގަނޑުމެންނަކީ ކަސްޓަމާ އޮރިޔަންޓެޑް ކުންފުންޏަކަށް ހަދަން އަޒުމް ކަނޑައަޅަންވީ. އަބަދުވެސް ނިންމާ ކޮންމެ ނިންމުމެއް އަމާޒުކުރަންވީ ރައްޔިތުންގެ ނިންމުމާއިއެއްގޮތަށް.

– ޝަރީފް ވިދާޅުވިއެވެ.

މިހަފްލާގައި ވާހަކަ ދައްކަވަމުން ސްޓެލްކޯގެ ޗެއާމަން ބްރިގޭޑިއާ ޖެނެރަލް (ރޓ) އިބްރާހިމް ދީދީ ވިދާޅުވީ މި ޒަމާނުގައި ކަރަންޓުގެ ހިދުމަތް ފޯރުކޮށްދެވޭނީ ރޭވުންތެރިކަމާއެކު ސިސްޓަމެޓިކް ގޮތެއްގައި ރޭވިގެން ކަމަށެވެ. އަދި ސަރުކާރުން ސްޓެލްކޯ އުފެއްދީ ވަރަށް މާތް މަގުސަދެއްގައި ކަމަށާއި އެއީ ކުންފުނިން ދޭ ހިދުމަތް އެއް ދުވަހުން އަނެއް ދުވަހަށް ފުޅާކޮށް މިއަދަށްވުރެ މާ ރަނގަޅު ހިދުމަތްތަކެއް މާދަމާއަށް ތައްޔާރުވުމަށް ކަމަށް ވިދާޅުވިއެވެ.

އަދި މިއަދު އެ ކުންފުންޏަކީ ވަރަށް ފުރިހަމަވެފައިވާ, ވަރުގަދަ އަދި ރާއްޖޭގެ އެންމެ ފުންނާބުއުސް ކުންފުންޏަކަށްވާ އިރު, ސްޓެލްކޯއަކީ ވިޔަފާރި ކުންފުންޏެއްގެ ބަދަލުގައި ރައްޔިތުންނަށް ހިދުމަތް ކުރަން އޮތް ކުންފުންޏަކަށް ވާންޖެހޭނެ ކަމަށް ވިދާޅުވިއެވެ.

ސްޓެލްކޯއިން އަންނަނީ އަތޮޅުތަކުގެ 35 ރަށަކަށް ކަރަންޓު ފޯރުކޮށްދެމުންނެވެ. އެއީ 38 މެގަވޮޓްގެ ކެޕޭސިޓީއެވެ. އެ ކުންފުނިންދަނީ އަތޮޅުތަކުގެ އިންޖީނުގެތަށްވެސް ޒަމާނީ ގޮތްތަކަށް ބަދަލުކުރަމުންނެވެ. މިގޮތުން ޒަމާނީ 6 އިންޖީނުގެއެއް ހެދުމުގެ މަސައްކަތް ކުރަމުންދާއިރު، މިތަންތަން ވެގެންދާނީ އެ ރަށްރަށުގެ ފާހަގަކޮށްލެވޭ ފަދަ ޒަމާނީ ލޭންޑްމާރކް ތަކަކަށެވެ.

ސްޓެލްކޯގެ އަމާޒުވެސް މިހާރު ހުރީ ތިމާވެއްޓާ ރަށްޓެހިގޮތްކަށް އިއާދަކުރަނިވި ހަކަތައަށް އިސްކަންދީގެ މަސައްކަތްތައް ކުރިއަށްގެންދިއުމަށެވެ. އެގޮތުން ސްޓެލްކޯގެ ޚިދުމަތްދޭ 35 ރަށުގެ ތެރެއިން 20 ރަށެއްގައި ސޯލާ ޕެނަލް ހަރުކޮށް، އެއިން އަންނަނީ ހަކަތަ އުފައްދަމުންނެވެ.

ރާއްޖޭގެ މާހައުލަށް ހާއްސަކޮށްގެން ސްޓެލްކޯއިން ފަރުމާކޮށްފައިވާ އަމިއްލަ އުފެއްދުމެއް ކަމަށްވާ ފޮލޯޓިންގ ސޯލާޕޮޑްގެ ޓެސްޓިން މަރުހަލާތައްވެސް މިހާރު ދަނީ ކުރިއަށެވެ.

ސްޓެލްކޯއިން ދަނީ ޔުޓިލިޓީގެ އިތުރު ޚިދުމަތްތަކަށްވެސް ވަންނަމުންނެވެ. އެގޮތުން 7 ރަށެއްގައި ފެނާއި ނަރުދަމާގެ ޚިދުމަތް ސްޓެލްކޯއިން އަންނަނީ ދެމުންނެވެ. އަދި ބައެއް ރަށްރަށުގެ ކުނި މެނޭޖުކުރުމާ ޙަވާލުވުމުގެ މަސައްކަތްތައްވެސް މިހާރު ކުރަމުންދާކަމަށް އެ ކުންފުނިން މަޢުލޫމާތުދެއްވައެވެ.