ޕީޕީއެމްގެ އެކި މަޤާމުތަކުގައި ތިއްބެވި މެންބަރުންނާއި، އާންމު މެންބަރުން ތިއްބެވީ ރައީސް ޔާމީންގެ ފަހަތްޕުޅުގައި ސާބިތުކަމާއި އެކުގައި ކަމަށް ޕީއެންސީގެ ނައިބް ރައީސް އާދާމް ޝަރީފް އުމަރު ވިދާޅުވެއްޖެއެވެ.
ކުރީގެ ރައީސް އަބްދުﷲ ޔާމީންގެ މައްޗަށް ކްރިމިނަލް ކޯޓުން ކޮށްފައިވާ ހުކުމަށް ހައި ކޯޓުން ތާއީދުކޮށްފިނަމަ ޕީޕީއެމްގެ ލީޑަރޝިޕަށް ބޮޑެތި ބަދަލުތަކެއް ގެންނެވުމުގެ މަސައްކަތް މިހާރުން ފެށިގެން އެ ޕާޓީގެ އެޑްވައިޒަރު ޑރ. މުހައްމަދު ވަހީދު ހަސަން މަނިކު ފައްޓަވައިފައިވާކަމަށްބުނެ މީޑިޔާއެއްގައި ދައްކާފައިވާ ވާހަތައް ދޮގުކުރައްވައި އާދަމް ޝަރީފް ވިދާޅުވީ ޕީޕީއެމް ކުރިއަށް ދާނީ ރައީސް ޔާމީންއާއި އެކީގައި ކަމަށެވެ.
އޭނާ ވިދާޅުވީ އިދިކޮޅު ޕީޕީއެމް ކޯލުޝަނަކީ މިވަގުތު ރާއްޖޭގައި އޮތް އެންމެ ވަރުގަދަ ސިޔާސީ ލީޑަރޝިޕް އޮތް ކޯލިޝަނަށްވާއިރު ކޯލިޝަންގެތެރޭގައި ބައިބައިވުން އުފެއްދުމަށް މަސައްކަތް ކުރާ މީހުންވެސް ގިނަ ވާނެކަމަށެވެ. ނަމަވެސް ޕީޕީއެމް ޕީއެންސީ ހިނގަމުންދަނީ ރައީސް ޔާމީންގެ ލީޑަރޝިޕްގެ ދަށުން ރޭވުންތެރިކަމާއި އެކުގައިކަމަށް އާދަމް ޝާރީފް ވިދާޅުވި އެވެ.
"ޕީޕީއެމް ޕީއެންސީ ގެ ކުރިމަގު ކުރައްސަވަނީ ރައީސް ޔާމީން. ޕީޕީއެމް ޕީއެންސީ ގެ ލީޑަރޝިޕް އަކީ މިހާރު ރާއްޖޭގައި އޮތް އެންމެ ހަރުދަނާ، އެންމެ ވަރުގަދަ ލީޑާޝިޕް. "ފުރިފާ ހުރި އެއްޗެއް ގުޑުގުޑެއް ނާޅާނެ." ލީޑާޝިޕް އަދި އެޑްވައިޒާސް އަދި ކައުންސިލް މެމްބަރުން އޮތީ ރައީސް ޔާމީން ފަހަތްޕުޅުގައި. ދާނީ ކުރިއަށް" އާދަމް ޝާރީފް ވިދާޅުވި އެވެ.
އާދަމް ޝަރީފް މިފަދަ ޓްވީޓެއް ކުރައްވާފައިވަނީ ޕީޕީއެމްގެ ތެރެއިން ކުރީގެ ރައީސް ޑރ. ވަހީދަށް ތާއީދު ހޯއްދެވުމަށް އެމަނިކުފާނުގެ ދަރިކަލުން ޖެފްރީ ސާލިމް ވަހީދު މަސައްކަތް ކުރައްވަމުންގެންދަވާ ކަމަށްބުނެ މީޑިޔާއެއްގައި ލިޔެފައިވާ ޚަބަރަކާއި ގުޅިގެންނެވެ. އެ ޚަބަރުގައިވަނީ ޕާޓީގެ އާންމު މެންބަރުންނާއި ކައުންސިލް މެންބަރުންނަށް ވެސް ޖެފްރީ އިސްވެ ގުޅުއްވަމުން ގެންދަވާކަމަށް ބުނެފައެވެ.
ރައީސް ވަހީދު ޕީޕީއެމްގެ ލީޑަރޝިޕަށް އައުމަށް މަސައްކަތް ކުރަވަމުންދާކަމަށް ބުނެ ޚަބަރުތަކެއް ފަތުރެމުންދާއިރު، ކުރީގެ ނައިބް ރައީސް ޑރ.މުހައްމަދު ޖަމީލް އަހުމަދުވެސް ޕީޕީއެމް ޕީއެންސީގެ ލީޑަރޝިޕަށް އައުމަށް މަސައްކަތް ކުރަމުންދާކަމަށްބުނެ ބައެއް ފަރާތްތަކުން ވަނީ ވާހަކަ ދައްކާފައެވެ.
ކޮމެންޓު ފޮނުވާ