ވިކިލީކްސްގެ ބާނީ، ޖޫލިއާން އަސާންޖު އެމެރިކާއާއި ހަވާލުކުރުމުގެ ރަސްމީ އަމުރުގައި އިނގިރޭސި ހޯމް ސެކެޓްރީ ޕިރިޓީ ޕެޓަލް ސޮއި ކުރައްވައިފިއެވެ.
އެމެރިކާއިން އަސާންޖުގެ މައްޗަށް ކުރަނީ ޖާސޫސް ކުރުމުގެ ތުހުމަތެވެ. އަސާންޖު އެމެރިކާއާއި ހަވާލުކުރުމަށް އިނގިރޭސިވިލާތުން ނިންމި ނިންމުން ވިކިލީކްސްއިން ސިފަކޮށްފައިވަނީ "ޚިޔާލުފާޅުކުރުމުގެ މިނިވަންކަމަށް އައި އަނދިރި ދުވަހެއް"ގެ ގޮތުގައެވެ.
ވިކިލީކްސްގެ ބާނީ، ޖޫލިއާން އަސާންޖު އެމެރިކާއާއި ހަވާލުކުރުމުގެ ރަސްމީ ނޯޓިސް، ލަންޑަންގެ ކޯޓަކުން ނެރެފައިވަނީ ފާއިތުވެދިޔަ އެޕްރިލްމަހުއެވެ. އަދި އެއަށްފަހު އަސާންޖު އެމެރިކާއާއި ހަވާލުކުމަށްޓަކާ ހަމައެކަނި ކުރާންޖެހިފައި އޮތް ކަމަކީ އިނގިރޭސި ހޯމް ސެކެޓްރީ ޕިރިޓީ ޕެޓަލް އެ ނޯޓިސްގައި ސޮއި ކުރެއްވުމެވެ.
އަސާންޖު އެމެރިކާއާއި ހަވާލުކުރުމުގެ އޯޑަރ އާންމު ކުރައްވަމުން އިނގިރޭސިވިލާތުގެ ހޯމް އޮފީހުން އާންމު ކޮށްފައިވާ ބަޔާނުގައި ވާގޮތުން މި ނިންމުން އިސްތިއުނާފް ކުރުމަށް އަސާންޖަށް 14 ދުވަސް ލިބިގެން ދާނެއެވެ. އެހެންނަކަމުން ބެލެވޭ ގޮތުގައި މި ނިންމުން ތަންފީޒުކުރުމުގެ ކުރިން، ގާނޫނީގޮތުން އިތުރު އެތައް މަހެއް އަދި ކަޑައްތު ކުރާންޖެހޭނެ ކަމަށް ބެލެވެއެވެ.
ހުކުރުދުވަހު ވިކިލީކްސްއިން ނެރުނު ބަޔާނެއްގައި ބުނެފައިވަނީ، އިނގިރޭސިވިލާތުގެ މިނިންމުން އެގައުމުގެ ހައި ކޯޓުގައި އިސްތިއުނާފް ކުރާނެކަމުގައެވެ.
އަދި އެ އޯގަނިޒޭޝަންއިން ބުނެފައިވާ ގޮތުގައި އަސާންޖަކީ "އެއްވެސް ކުށެއް ކޮށްފައިވާ ކުށްވެރިއެއް ނޫން" ކަމުގައެވެ. އަދި އިތުރަށް ބުނެފައިވަނީ އޭނާއަކީ "ނޫސްވެރިއެއް އަދި ޕަބްލިޝަރއެއް" ކަމަށާއި، އޭނާއަށް އަދަބު ދެމުންދަނީ "އޭނާގެ ވަޒީފާ އޭނާ ފުރިހަމަ ގޮތުގައި އަދާކުރުމުގެ ބަދަލެއްގެ ގޮތުގައި" ކަމުގައެވެ.
"މިއަދަކީ ޚިޔާލުފާޅުކުރުމުގެ މިނިވަންކަމަށް އަދި އިނގިރޭސިވިލާތުގެ ޑިމޮކްރަސީއަށް އައި އަނދިރި ދުވަހެއް. ޚިޔާޅުފާޅުކުރުމުގެ މިނިވަންކަމަށް ވަކާލާތުކުރާ މީހެއްނަމަ މިއަދު ލަދުވެތިވާނެ،" ވިކިލީކްސްގެ ބަޔާނުގައި ބުނެފައި ވެއެވެ.
އަސާންޖު އެގައުމާއި ހަވާލުކުރުމަށް އެކެރިކާއިން ޑިމާންޑް ކުރަމުންދަނީ، އިރާގާއި އަފްއާނިސްތާނުގައި އެމެރިކާއިން ކުރި ހަނގުރާމައިގެ، 500،000 ސިއްރު އަސްކަރީ ލިޔުންތަކެއް އޭނާ އުފައްދާފައިވާ ވިކިލީކްސްއިން އާންމުކުރުމާއި ދެކޮޅަށް އޭނާގެ މައްޗަށް އެގައުމުން ކޮށްފައިވާ ދައުވާތަކާއި ކުރިމަތި ލުމަށެވެ.
އަސާންޖު އެމެރިކާގެ ސިކިއުރިޓީ އެންމެ ވަރުގަދަ ޖަލެއްގައި ބަންދު ކޮށްފައި ބަހައްޓައިފިނަމަ، އޭނާ އަމިއްލައަށް ދަންޖެހި މަރުވުމުގެ ފުރުސަތު އޮތްކަމަށް ބަލާ، ފާއިތުވެދިޔަ އަހަރުގެ ޖެނުއަރީމަހު އޭނާވަނީ، އެމެރިކާއާއި އޭނާ ހަވާލުކުރުމާއި ދެކޮޅަށް ކޯޓުގައި މައްސަލަ ކާމިޔާބުވެސް ކޮށްފައެވެ. އެހެނަމަވެސް އޭގެ ފަހުން އެމެރިކާއިންވަނީ، ފާއިތުވެދިޔަ އަހަރުގެ އޮކްޓޯބަރުމަހު މައްސަލަ އިސްތިއުނާފް ކޮށްފައެވެ. އެމެރިކާގެ ގާނޫނީ ވަކީލުން މައްސަލަ އިސްތިއުނާފް ކޮށްފައިވަނީ، ފެޑެރަލް ސުޕަރމެސް ޕްރިޒްން (ސަލާމަތީ ފިޔަވަޅު އެންމެ ވަރުގަދަ ޖަލުތައް)ގައި އޭނާ ބަންދު ކޮށްފައި ނުބަހައްޓާނެ ކަމަށް ބުނެއެވެ. އަދި ބުނެފައިވަނީ އަސާންޖަށް އެކަށީގެންވާ އެހީތެރިކަން ލިބޭނެ ކަމުގައެވެ.
މިހާރު އުމުރުން 50 އަހަރުގެ އަސާންޖުގެ މައްޗަށް އެމެރިކާއިން ދައުވާ އުފުލާފައިވަނީ އެމެރިކާގެ ޖާސޫސް ކުރުމާބެހޭ ގާނޫނުގެ ދަށުން، އެގައުމުގެ ސިއްރު އަސްކަރީ އަދި ޑިޕްލޮމެޓިކް މައުލޫމާތު އާންމު ކުރުމުގެ ކުށުގައެވެ. މިގޮތުން އެމެރިކާއިން އަސާންޖުގެ މައްޗަށް 18 ތުހުމަތެއް ކުރެއެވެ. އޭގެ ތެރޭގައި، ޖާސޫސް ކުރުމުގެ 17 ތުހުމަތަކާއި، އަދި އޭގެ އިތުރުން ވިކިލީކްސްއިން މީގެ 10 އަހަރު ކުރިން އާންމުކުރި އެމެރިކާގެ އަސްކަރީ ރެކޯޑްތަކާއި އަދި ޑިޕްލޮމެޓިކް މުޢާމަލާތުތަކާއި ގުޅުން ހުރި މައުލުމާތާ ގުޅޭގޮތުން ކޮމްޕިއުޓަރުގެ ބޭނުން ނަހަމަ ގޮތުގައި ބޭނުން ކުރިކަމުގެ ތުހުމަތު ތަކެވެ.
އެމެރިކާއިން ބުނަމުންދަނީ މި މައުލޫމާތުތައް އާންމު ކުރުމާއި ގުޅިގެން އެތައް ބައެއްގެ ފުރާނަ ނުރައްކަލަށް ހުށަހެޅިގެން ދިޔަކަމަށެވެ. އޭނާގެ މައްޗަށް އުފުލާފައިވާ މި ހުރިހާ ދައުވާއެއް ސާބިތު ވެއްޖެނަމަ، 175 އަހަރުގެ ޖަލުހުކުމް އޭނާގެ މައްޗަށް އަންނާނެއެވެ.
