އޭއެފްސީ އޭޝިއަން ކަޕުގެ ކޮލިފައިން ފައިނަލް ބުރުގެ ގްރޫޕް ސްޓޭޖުގައި ރާއްޖެއިން ކުޅުނު ފަހު މެޗުގައި ސްރީ ލަންކާގެ މައްޗަށް ކުރި ހޯދައިފިއެވެ.
އުޒްބެކިސްތާނުގައި ސެންޓްރަލައިޒްކޮށްގެން ކުރިއަށްގެންދިޔަ ކޮލިފައިންގެ ފަހު މެޗު ރާއްޖޭން ކާމިޔާބުކުރީ 1-0 ގެ ނަތީޖާއަކުންނެވެ. މެޗު ފަށައިގެން ރާއްޖޭން ގިނަ ވަގުތު ބޯޅަ ކޮންޓްރޯލްކޮށްގެން ލަންކާގެ ހާފަށް ބާރުބޮޑުކުރި ނަމަވެސް ލަންކާގެ ކީޕަރު ކަވީޝް ލަކްޕްރިޔާ ޓެސްޓު ކޮށްލެވޭ ވަރުގެ ހަމަލާއެއް ރާއްޖެއަށް އުފެއްދިފައެއް ނުވެއެވެ.
ދެވަނަ ހާފު ފަށައިގެން ރާއްޖޭގެ ހަމަލާތައް ވަރުގަދަ ކުރިއިރު، މި މެޗުގެ 55 ވަނަ މިނެޓުގައި ހަމްޒާ މުޙައްމަދު (ހަމްޕު) ފޮނުވާލި ހިލޭ ޖެހުން ދިޔައީ ގޯލު ދަނޑިކައިރިން ބޭރަށެވެ. އޭގެ ފަހުން މެޗުގެ 60 ވަނަ މިނެޓުގައި ލަންކާއިން ރާއްޖޭގެ އޭރިއާ ރޮނގު މަތިން ކަހަލަ ގޮތަކަށް ހިލޭ ޖެހުމެއް ފޮނުވާލިއިރު، ކީޕަރު މުޙައްމަދު ފައިސަލް ވަނީ އެ ހަމަލާ ހުށިޔާރުކަމާއެކު ދިފާއު ކޮށްފައެވެ. އޭގެ ދެ މިނެޓު ފަހުން ރާއްޖޭން ވަނީ ލަނޑު ޖަހާ ލީޑު ނަގައިފައެވެ. މި ލަނޑު ރާއްޖެއަށް ކާމިޔާބު ކޮށްދިނީ ހަމްޒާ މުޙައްމަދު (ހަމްޕު)އެވެ.
ލަންކާ އަށް ނަތީޖާ ހަމަހަމަކުރަން މެޗުގެ 68 ވަނަ މިނިޓްގައި ރަނުގެ ފުރުސަތެއް ލިބުނެވެ. ރާއްޖޭގެ ޑިފެންޑަރު ސަމޫހު އަލީ (ސަމުއްޓެ) އޭރިއާތެރެއިން ލަންކާގެ ޑިލޯން ޑި ސިލްވާ އަށް ކުރި ފައުލަށް ދިން ޕެނަލްޓީން، ޑި ސިލްވާ ޖެހި ބޯޅަ ކީޕަރު ފައިސަލް ވަނީ މަތަކޮށްފައެވެ.
އޭޝިއަން ކަޕް ކޮލިފައިން ގްރޫޕް ސްޓޭޖުގެ ގްރޫޕް ސީގެ އެއްވަނައިގައި މި ވަގުތު އޮތް އުޒްބެކިސްތާނާއި ދެވަނައިގައި އޮތް ތައިލެންޑަށް ވަނީ ހަ ޕޮއިންޓް ލިބިފައެވެ. މި ދެ ޓީމުގެ މެޗު މިރޭ ކުޅޭއިރު، މޮޅުވާ ޓީމަކަށް އޭޝިއަން ކަޕްގެ ސީދާ ޖާގަ ލިބޭނެއެވެ. ބަލިވާ ޓީމަކަށް ދެވަނަ ލިބޭނެކަން ކަށަވަރުވެފައިވާއިރު، އެ ޓީމަށްވެސް އޭޝިއަން ކަޕުން ޖާގަ ލިބުމުގެ ފުރުސަތު އެބައޮތެވެ.
ގްރޫޕްގެ ތިން ވަަނަ ލިބުނު ރާއްޖެ އަށް ވަނީ ތިން ޕޮއިންޓް ލިބިފަ އެވެ. ލަންކާ އަށް ކޮލިފައިން ނިމުނީ ޕޮއިންޓެއް ނުލިބިއެވެ.
