ހުށަހެޅޭ މައްސަލަތަކުގައި ބަހުސްކޮށްގެން ގޮތް ނިންމަން ފުރުސަތު ނުދީ ނެރޭ ވިޕްލައިނަކަށް ތަބާނުވެގެން "ހަދާނެ އެއްޗެއް ހަދަންވީ" ކަމަށް ރައްޔިތުންގެ މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ މެންބަރު އީވާ އަބްދުﷲ ވިދާޅުވެއްޖެއެވެ.
އެމްޑީޕީގެ ޕީޖީ ގުރޫޕަށް ފޮނުއްވި މެސެޖެއްގައި އީވާ ވިދާޅުވީ މައްސަލަތަކުގައި ގޮތް ނިންމަންވާނީ ބަހުސްކޮށްގެން ކަމަށެވެ. އެއީ ޕާޓީގެ ތެރޭގައި ވިޔަސް ނުވަތަ މަޖިލީހުގެ ތެރޭގައި ނަމަވެސް އަމަލުކުރަންޖެހޭނެ ގޮތް ކަމަށެވެ.
ވިޕްލައިނާ ގުޅޭގޮތުން އީވާ ވާހަކަދައްކަވާފައި މިވަނީ އެމްޑީޕީގެ ޕާލިމެންޓްރީ ގުރޫޕުން ވަކި ގޮތަކަށް އަމަލުކުރުމަށް ވިޕްލައިން ނެރެފިނަމަ އެ ނިންމުމާ އެއްގޮތަށް އެމްޑީޕީގެ 65 މަޖިލިސް މެންބަރުން ވެސް އަމަލުކުރަން ޖެހޭނެ ކަމަށް އެމްޑީޕީގެ ޕީޖީގައި ހިމެނޭ ބައެއް މެންބަރުން ވިދާޅުވަމުން ގެންދަވާތީއެވެ.
އީވާ ވިދާޅުވީ ޑިމޮކްރަސީއެއްގައި އެންމެ މުހިއްމީ މެޖޯރިޓީއަށް ތަބާވުން ކަމަށެވެ. އެކަމަކު މައިނޯރިޓީގެ ބަހަށް ޖާގަ ދިނުމަށްޓަކައި މައްސަލަތަކުގައި ގޮތް ނިންމަން ވާނީ މަޝްވަރާކޮށްގެން ކަމުގައި ވިދާޅުވިއެވެ.
"އަޅުގަނޑު ހަމަގައިމުވެސް ބަހުސަށް ޖާގަ ނުދޭ ވިޕްލައިނަކަށް ތަބާވާކަށް ބޭނުމެއް ނޫން. ހަދާނެ އެއްޗެއް ހަދާ. އަޅުގަނޑު އިންތިހާބު ކުރީ ބަހުސްކުރަން"
– އީވާ
ވިޕްލައިންގެ މައްސަލަ ހޫނުވެފައި މިވަނީ ފަހަކަށް އައިސް އެމްޑީޕީގެ ޕީޖީ ގުރޫޕަށް ހުށަހެޅޭ މައްސަލަތަކުގައި އެއްވެސް ބަހުސެއް ކުރުމެއްނެތި ވަކިގޮތަކަށް މައްސަލަ ނިންމުމަށް ވިޕްލައިން ނެރެ އެގޮތަށް ފާސްކުރަމުން ގެންދާތީ އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު އިސްވެހުންނަވައި، އެޕާޓީގެ 19 މެމްބަރަކު އެކަމާދެކޮޅަށް ތެދުވުމުންނެވެ.
އެގޮތުން ދަރަނި ރީސްޓްރަކްޗާ ކުރުމަށް ބޭނުންވާ ކަންކަން ތަރުތީބު ކުރުމަށް ގޮވާލައި ރައްޔިތުންގެ މަޖިލީހުގެ ހުޅުދޫ ދާއިރާގެ މެންބަރު އިލްޔާސް ލަބީބް ގަރާރެއް ހުށަހެޅުމަށް އެމްޑީޕީގެ ޕާލިމެންޓްރީ ގްރޫޕަށް ފޮނުވުމުން އެ ގަރާރު ހުށަހަޅަން ތާއީދު ނުކުރަން ގިނަ މެންބަރުން ވޯޓު ދެއްވުމާއި ޕިޖީ ހުސެއިން ޝަމީމުގެ އިތުބާރުނެއްކަމުގެ މައްސަލަ މަޖިލީހަށް ހުށަހެޅުމަށް ޕީޖީ ގުރޫޕުން ފާސްކުރި ފާސްކުރުން ހިމެނެއެވެ.
ޕާޓީގެ ޕާލިމެންޓްރީ ގްރޫޕުން ފަހަކަށް އައިސް ނެރޭ ވިޕްލައިންތަކާ ހިލާފަށް ވޯޓު ދޭން އިއްޔެ, ޕާޓީގެ ރައީސް މުހައްމަދު ނަޝީދު އިސްވެ ހުންނަވައި 19 މެންބަރަކު ވަނީ އެއްބަސްވެ, އެކަން އިއުލާން ކުރައްވާފައެވެ.
