ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް ދިން ބޮމުގެ ހަމަލާއާ ގުޅޭ މައްސަލަ ބައްލަވާ ގާޒީންގެ ބެންޗުގެ ރިޔާސަތު ބަލަހައްޓެވި ގާޒީ އާދަމް މުހައްމަދަކީ ނަޒާހަތްތެރި ޤާޒީއެއް ކަމުގައި ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު މޫސާ ސިރާޖު ވިދާޅުވެއްޖެއެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް ދިން ބޮމުގެ ހަމަލާއާ ގުޅޭ މައްސަލަ ބައްލަވާ ގާޒީންގެ ބެންޗުގެ ރިޔާސަތު ބަލަހައްޓަވާ ގާޒީ އާދަމް މުހައްމަދު މައްސަލައިން މިއަދު ވަނީ ތަނާޒުލުވެ ވަޑައިގެންފައެވެ.
ޤާޒީ އިސްތިއުފާ ދެއްވާފައިވަނީ މަރާލައިފައިވާ ބްލޮގަރު ޔާމީން ރަޝީދުގެ މައްސަލަ ބެއްލެވީ އޭނާ ކަމަށްވެފައި، އެ މައްސަލަ އާއި ގުޅިގެން ގާޒީއަށާއި ގާޒީގެ އާއިލާއަށް ބިރުދައްކައި އިންޒާރު ދިން މައްސަލައަކާއި ގުޅިގެންނެވެ. މިމައްސަލާގައި ޤާޒީއަށް ދައްކާފައިވާ ބިރާއި، ދެމުންދިޔަ އިންޒާރުތަކުގެ މައްސަލަ އަދާއި ހަމައަވެސް ބަލާފައި ނުވުމަކީ ކަންބޮޑުވާ ކަމެއްކަމަށް ސިރާޖު ވިދާޅުވިއެވެ.
ގާޒީ އާދަމް މުހައްމަދަކީ ނަޒާހަތްތެރި ގާޒީއެއް. ގާޒީއަށާއި ގާޒީގެ އާއިލާއަށް ދެވުނު އިންޒާރުތަކައި ގުޅިގެން އެއްވެސް ފަރާތަކަށް މިއަދާއި ހަމައަށްވެސް އެއްވެސް ފިޔަވަޅެއް އެޅާފައި ނުވުމަކީ ކަންބޮޑުވާ ކަމެއް.
– ސިރާޖު ވިދާޅުވިއެވެ.
އެ މައްސަލައިގައި ގާޒީ އަށް ބިރުދައްކައި އިންޒާރު ދިންކަމަށް ތުހުމަތުކުރެވޭ މީހުންގެ ތެރޭގައި އިސްހާގުގެ ދަރިޔަކު ހިމެނޭ ކަމަށާއި، އެ މައްސަލައިގައި ދައުލަތުން ދައުވާ އުފުލި މ. ކުދެހިގޭ، ހަސަން ޝިފާޒަކީ އިސްހާގުގެ ދަރިފުޅުގެ ބޮޑުބޭބެ ކަމަށް ގާޒީ ފާހަގަކުރެއްވިއެވެ. ގާޒީ އާދަމް މިއަދު ވިދާޅުވީ އެކަން ގާޒީއަށް އެނގިވަޑައިގެންނެވީ އިސްހާގުގެ ސިޓީ ލިބުމުން ކަމަށާއި ބެލި ބެލުމުން އެކަން ސާފުވެވަޑައިގަތް ކަމަށެވެ. ބެންޗުގައި ތިއްބެވި އެހެން ގާޒީންނަށް ވެސް ކުރިން އެކަން އެނގިވަޑައިނުގަންނަވާކަން ވެސް ފާހަގަކުރެއްވިއެވެ. އެހެންކަމުން މި މައްސަލައިގައި ގާޒީގެ މަސްލަހަތު ހިމެނޭތީ މައްސަލައިން ތަނާޒުލްވާ ކަމަށް ވިދާޅުވިއެވެ.
ޔާމީން މަރާލި މައްސަލައިގައި ޝިފާޒުގެ މައްޗަށް ކުށް ސާބިތު ނުވާ ކަމަށް ކޯޓުން ވަނީ ކަނޑައަޅާފައެވެ. އަދި އޭނާގެ މައްސަލަ އިސްތިއުނާފް ނުކުރަން ޕްރޮސެކިއުޓާ ޖެނެރަލްގެ އޮފީހުން ވެސް ވަނީ ނިންމާފައެވެ.
