ސަރުކާރުގެ ހައި ސްޕީޑް ފެރީ ނިޒާމާއެކު ދިވެހިރާއްޖެ މިހާރު މިސްރާބު ޖަހާފައި މިވަނީ ރަށު ބަންދުން ވީއްލި، އިޤްތިޞާދީ ތަރައްޤީއާއި ދިމާއަށްކަމަށް މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.
މިނިސްޓަރ އަސްލަމް މިހެން ވިދާޅުވީ، ހައި ސްޕީޑް ފެރީ ނިޒާމު "ރާއްޖެ ޓްރާންސްޕޯޓް ލިންކް" އާރް.ޓީ.އެލްގެ ޚިދުމަތް ރަސްމީކޮށް އިފްތިތާޙްކުރުމަށް ވަރޗުއަލްކޮށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
އާރް.ޓީ.އެލްގެ ޚިދުމަތަކީ ރައްޔިތުންނަށް ލުއިފަސޭހަ ދަތުރުފަތުރުގެ ނިޒާމެއް ކަށަވަރުކޮށްދިނުމަށްޓަކާ ސަރުކާރުގެ އެކި ވުޒާރާތައް ގުޅިގެން ހައި ސްޕީޑް ފެރީ ނިޒާމަކުން މުޅި ރާއްޖެ ގުޅާލުމަށް ހިންގާ ބިޔަ މަޝްރޫޢުގެ ތެރެއިން ދޭން ފެށި ޚިދުމަތަކެވެ. މުޅި ރާއްޖެ 6 ޒޯނަކަށް ބަހާލައިގެން ކުރިއަށްގެންދާ މި މަޝްރޫޢު ސަރުކާރުން ހިންގަނީ 3 ފިޔަވަށްސަކަށް ބަހާލައިގެންނެވެ. އެގޮތުން ޒޯން 1 ގައި ހިމެނޭ ހއ، ހދ އަދި ށ. އަތޮޅުގެ ތެރެއިން ހދ. އަތޮޅުގައި ފެރީ ޚިދުމަތް މިހާރު ވަނީ ދޭން ފަށާފައެވެ.
ޕްލޭނިންގ މިނިސްޓަރ މުޙައްމަދު އަސްލަމް ވިދާޅުވީ، ޤައުމެއް ތަރައްޤީވުމުގައި އެއްތަނުން އަނެއްތަނަށް ފަސޭހަކަމާއެކު ދަތުރުކުރެވޭނެ ނިޒާމެއް އޮންނަންޖެހޭނެކަމަށާއި، ދުނިޔޭގެ އެއްވެސް ޤައުމަކަށް ޒަމާނީ ތަރައްޤީއެއް މިފަދަ ނިޒާމަކާނުލައި އައިސްފައިނުވާކަމަށެވެ. ރާއްޖެ ޓްރާންސްޕޯޓް ލިންކާއެކު، އަޅުގަނޑުމެން މި ބޭނުންވާ އިޤްތިޞާދީ ތަރައްޤީ ޤައުމަށް ގެނެވޭނެކަމަށް މިނިސްޓަރ ވިދާޅުވިއެވެ. އަދި މިއީ ޤައުމުގެ އިޖްތިމާޢީ ދުޅަހެޔޮކަމަށާއި، ލާމަރުކަޒީ ނިޒާމު އޭގެ އެންމެ ފުރިހަމަގޮތުގައި ހިނގައިގަންނަންވެސް ކޮންމެހެން ބޭނުންތެރި ނިޒާމެއްކަމަށް މިނިސްޓަރ ވިދާޅުވިއެވެ.
ގުދުރަތީގޮތުން ރާއްޖެ އުފެދިފައިވާގޮތުން ވަކިވަކި ރަށްތަކަކަށް އާބާދީ ބެހިފައިވާތީ، އަބަދުވެސް އަޅުގަނޑުމެން ދިރިއުޅެމުން އައީ ވަރަށް އެކަހެރި ބައެއްގެގޮތުގައިކަމަށް މިނިސްޓަރ ވިދާޅުވިއެވެ. އެހެންނަމަވެސް އާރް.ޓީ.އެލްގެ ޚިދުމަތާއެކު، އެ މަންޒަރު ބަދަލުކޮށްލާނެކަން މިނިސްޓަރ ފާހަގަކުރެއްވިއެވެ.
އަޅުގަނޑުމެން ރަށު ބަންދުން ފިލުވުމަށްޓަކާ ދަތުރުފަތުރުގެ ނިޒާމު ކޮންމެހެން ލާޒިމްވޭ. އަޅުގަނޑުމެން މިއަދު މިފަށާ ދަތުރުފަތުރުގެ ނިޒާމަކީ ޒަމާނީ، އޭގައި ފެންވަރެއް ހުރި، ބާރު ސްޕީޑުގައި ދަތުރުކުރާ، ފަސޭހަކަމާއެކުގައި ދަތުރުކުރެވޭނެ ނިޒާމެއް. އަޅުގަނޑުމެން ދެކޭގޮތުގައި މި ދަތުރުފަތުރުގެ ނިޒާމާނުލާ، އަޅުގަނޑުމެން މިއަދު މިތިބަ ހިސާބުން އިތުރަށް ދިވެހިރާއްޖެ ތަރައްޤީކުރުމަށް އުނދަގޫވާނެ.
– މިނިސްޓަރ އަސްލަމް ވިދާޅުވިއެވެ.
ރާއްޖެ ޓްރާންސްޕޯޓް ލިންކުގެ ޚިދުމަތް ރަސްމީކޮށް އިފްތިތާޙްކުރުމަށް ބޭއްވި ރަސްމިއްޔާތުގައި މި ޚިދުމަތަށް ޚާއްސަކޮށްފައިވާ މޯބައިލް އެޕްވެސް ރަސްމީކޮށް ވަނީ އިފްތިތާޙްކޮށްފައެވެ. "އާރް.ޓީ.އެލް ޓްރެވަލް އެޕް" މިހާރު އެޕް ސްޓޯރުންނާއި ޕްލޭ ސްޓޯރުން ޑައުންލޯންޑް ކޮށްލެވޭނެކަމަށް މި ޚިދުމަތް ފޯރުކޮށްދޭ އެމް.ޓީ.ސީ.ސީން ވިދާޅުވެއެވެ.
