ދިވެހިރާއްޖޭގެ ބާ ކައުންސިލްގެ ރައީސްގެ މަގާމަށް އިސްމާއިލް ވިޝާމް އަދި ނައިބު ރައީސަކަށް މިޒްނާ އަހްމަދު އިންތިހާބުކޮށްފިއެވެ.
ބާ ކައުންސިލްގައި މިވަގުތު އޮތް އެގްޒެކެޓިވް ކޮމިޓީގެ ދައުރު އަންނަ ޖުލައި 13 އަށް ހަމަވާނެއެވެ. ބާ ކައުންސިލް އެގްޒެކެޓިވް ކޮމެޓީގެ ދައުރަކީ ތިން އަހަރެވެ. އެގްޒެކެޓިވް ކޮމިޓީގެ މެންބަރުން ހޮވުމަށް ބޭއްވި އިންތިހާބުގައި ވޯޓުލުމަށް ރަޖިސްޓަރީވެފައިވަނީ ޖުމްލަ 765 އާންމު މެންބަރުންނެވެ.
އެގޮތުން އެ ކައުންސިލްގެ ރައީސް ކަމަށް ވިޝާމް އިންތިހާބުވެފައި ވަނީ، 270 ވޯޓު ލިބިގެންނެވެ. އަދި ނައިބް ރައީސް ކަމުގެ މަގާމަށް މިޒްނާ އަޙްމަދު އިންތިހާބުވެފައި ވަނީ 281 ވޯޓު ލިބިގެންނެވެ. އެ މަގާމަށް ކުރިމަތިލާފައި ވަނީ ހަމައެކަނި މިޒްނާއެވެ.
ދިވެހިރާއްޖޭގެ ބާ ކައުންސިލުގެ އެގްޒެކެޓިވް ކޮމިޓީގެ މެންބަރުން ހޮވުމަށް ބޭއްވުނު އިންތިޚާބުގެ ރަސްމީ ނަތީޖާ އިޢުލާނުކޮށްފި.
އިތުރު މަޢުލޫމާތު : https://t.co/toZhsJcU7p pic.twitter.com/t09MX2i9ck— Bar Council of the Maldives (@MvBarCouncil) June 11, 2022
ބާ ކައުންސިލްގެ ގާނޫނުގައި އޮންނަ ގޮތުން ރައީސް އަދި ނައިބު ރައީސްގެ މަގާމަށް ވާދަކުރެވެނީ 10 އަހަރު ގާނޫނީ ވަކީލުކަން ކޮށްފައިވާ މީހުންނަށެވެ.
މިއަދު ވަނީ އެގްޒެކެޓިވް ކޮމިޓީގެ މެމްބަރު ކަމަށް ވެސް ތިން ވަކީލުން އިންތިހާބުކޮށްފަ އެވެ. އެގޮތުން، އެންމެ ގިނަ ވޯޓު ހޯދައިގެން އިންތިހާބުވީ ކުރީގެ ޕްރޮސެކިއުޓާ ޖެނެރަލް އަހްމަދު މުއިއްޒު އާއި އިބްރާހިމް ޝަމީލް އަދި ސާދިހު ނަސީރުއެވެ. ބާ ކައުންސިލް ވުޖޫދަށް އައީ 2019 ގައެވެ.
