ވިލިމާލޭ ހޮސްޕިޓަލްގައި ތުއްތުކުދިން ގަޔަށް މުއްދަތު ހަމަވެފައި ހުރި ވެކްސިންތަކެއް ޖެހި މައްސަލައާއި ގުޅިގެން ވެކްސިން ޖެހުން މެދުކަނޑާލުމަށްފަހު، އައިޖީއެމްއެޗްގެ ބެލުމުގެ ދަށުން މާދަމާ ވެކްސިން ދޭން ފަށަން ނިންމައިފިއެވެ.
ވިލިމާލޭ ހޮސްޕިޓަލްގައި ވެކްސިން ދިނުން މެދު ކަނޑާލީ މިދިޔަ މަހުގެ 27 ވަނަ ދުވަހުން ފެށިގެންނެވެ. ވިލިމާލޭ ހޮސްޕިޓަލް ހިންގާ އައިޖީއެމްއެޗުން މިރޭ ކުރި އިއުލާނުގައި ބުނީ މުއްދަތު ހަމަވެފައި ހުރި ވެކްސިން ޖެހި މައްސަލަ ތަހުގީގުކޮށް އެފަދަ ކަމެއް ތަކުރާރުނުވާނެ ގޮތަށް ފިޔަވަޅުތައް އަޅާފައިވާ ކަމަށެވެ. އަދި އެ ކަންތައް އިތުރަށް ހަރުދަނާކުރަން ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ އިރުޝާދާ އެއްގޮތަށް އައިޖީއެމްއެޗްގެ ބެލުމުގެ ދަށުން އަލުން ވެކްސިން ދޭން ފަށާނެ ކަމަށެވެ.
ވިލިމާލޭ ހޮސްޕިޓަލުން، މުއްދަތު ހަމަވެފައިވަނިކޮށް ޖެހީ އެމްއާރު ވެކްސިނާއި ބީއޯޕީވީ ވެކްސިނެވެ. އެމްއާރު އާއި ބީއޯޕީވީ އަކީ އާންމު ވެކްސިންތަކުގެ ތެރޭގައި ހިމެނޭ ވެކްސިނެކެވެ. އެއީ މި އަހަރުގެ ޖެނުއަރީ މަހަށް މުއްދަތު ހަމަވެފައި ހުރި ވެކްސިން ކަމަށް ވެއެވެ.
އައިޖީއެމްއެޗުން ބުނީ މި މައްސަލައިގައި އިހުމާލުވި ފަރާތްތަކާ މެދު އަޅަންޖެހޭ ފިޔަވަޅު އަޅައި، މިފަދަ ކަމެއް ކުރިމަގުގައި ތަކުރާރެ ނުވާނެކަން ކަށަވަރު ކުރުމަށްޓަކައި އަޅަންޖެހޭ އެންމެހައި ފިޔަވަޅެއް އަޅާނެކަމުގެ ޔަގީންކަން އަރުވާކަމަށެވެ.
