ބައިނަލްއަގުވާމީ ރަހުމަތްތެރިކަމުގެ މެޗެއްގައި މިރޭ ލިއޮނެލް މެސީ ޖެހި ފަސް ގޯލާއެކު 5-0 އިން އާޖެންޓީނާ އިން އެސްޓޯނިއާ ބަލިކޮށްފިއެވެ.
ސްޕެއިންގައި ކުޅުނު މި މެޗުގައި އާޖެންޓީނާ އިން ޖެހި ފަސް ގޯލް ވެސް ކެޕްޓަން މެސީ ޖެހިއިރު އޭނާ އަންނަނީ ފަހަކަށް އައިސް ގައުމީ ޖާޒީގައި މޮޅު ކުޅުމެއް ދައްކަމުންނެވެ. މެސީ ވަނީ މިދިޔަ ހަފުތާގައި މޮޅަށް ކުޅެ، އިޓަލީ ބަލިކޮށް އާޖެންޓީނާ އަށް "ފައިނަލިސިމާ" ތަށި ހޯދައިދިނުމުގައި މުހިއްމު ރޯލެއް އަދާކޮށްފައެވެ. 3-0 އިން އާޖެންޓީނާ އިން ޔޫރަޕުގެ ޗެމްޕިއަނުން ބަލިކުރިއިރު އެ މެޗުގެ މޮޅު ކުޅުންތެރިއަކަށް ހޮވުނީ ވެސް މެސީއެވެ.
ރޭގެ މެޗުގައި އެސްޓޯނިއާ ކޮޅަށް މެސީ ފުރަތަމަ ގޯލު ޖެހީ މެޗުގެ އަށް ވަނަ މިނިޓްގައި ޕެނަލްޓީ އަކުންނެވެ. މެޗުގެ ފުރަތަމަ 47 މިނިޓް ތެރޭ ހެޓްރިކް ފުރިހަމަކުރިއިރު، އޭގެ ފަހުން އިތުރު ދެ ގޯލު ޖެހި އެވެ. މި މެޗުގެ ގޯލުތަކާ އެކު މެސީ ވަނީ ގައުމީ ޓީމަށް 162 މެޗުން 84 ގޯލު ޖަހައިފައެވެ.
އާޖެންޓީނާ އިން ވަނީ ބަލިނުވެ 36 މެޗު ހަމަކޮށް އެ ގައުމުގެ ފުޓްބޯޅައިގައި އާ ރެކޯޑެއް ހަދައިފައެވެ. އާޖެންޓީނާ އިން ވަނީ 1991 އިން 1993 އަށް ބަލިނުވެ، 31 މެޗު ފުރިހަމަކޮށްފައެވެ. މި ފަހަރު މި ވަނީ އެ ރެކޯޑް މުގުރާލައިފައެވެ.
މިއީ މެސީގެ ކެރިއަރުގައި އޭނާ އެއް މެޗެއްގައި ފަސް ގޯލު ޖެހި ދެ ވަނަ ފަހަރެވެ. މީގެ ކުރިން 2012 ވަނަ އަހަރު ބާސެލޯނާ އަށް ކުޅެމުން މެސީ ވަނީ ޗެމްޕިއަންސް ލީގުގައި ބަޔާ ލެވަކޫސަން ކޮޅަށް ފަސް ގޯލު ޖަހައިފަ އެވެ. އެ މެޗުން ބާސެލޯނާ މޮޅުވީ 7-1 އިންނެވެ.
ކޮމެންޓު ފޮނުވާ