ބައިނަލްއަގުވާމީ ރަހުމަތްތެރިކަމުގެ މެޗެއްގައި ބްރެޒިލް އިން ދެކުނު ކޮރެއާގެ މައްޗަށް ފަސޭހަ މޮޅެއް ހޯދައިފިއެވެ.
ސޯލް ވޯލްޑް ކަޕް ސްޓޭޑިއަމްގައި މިއަދު ކުޅުނު މެޗު ފަށައިގެން މާގިނައިރެއްނުވެ، ބްރެޒިލްގެ ތިއާގޯ ސިލްވާ ބޮލުން ޖެހި ގޯލެއް ވަނީ އޮފްސައިޑް ކަމަށް ނިންމައިފަ އެވެ. އެކަމަކު، މެޗުގެ ހަތް ވަނަ މިނިޓްގައި ބްރެޒިލުން ލީޑުނެގީ ރިޗާލިސަން ޖެހި ގޯލުންނެވެ. މިއީ ބްރެޒިލްގެ މިޑްފީލްޑަރު ފްރެޑަށް އެންމެ ރަނގަޅަށް ފޮނުވާނުލެވި، ރިޗާލިސަން އަށް ލިބުނު ފުރުސަތަކުން ޖެހި ގޯލެކެވެ.
މެޗުގައި ބްރެޒިލުން ޖެހި ފުރަތަމަ ގޯލް ފުރަތަމަ ހާފު ފަށައިގެން ހަތް ވަނަ މިނެޓުގައި ޖެހީ އެވަޓަންގެ ފޯވަޑް ރިޗާލިސަންއެވެ. ކޮރެއާ އިން އެއްވަރު ކުރީ މެޗުގެ 31 ވަނަ މިނެޓުގައި އުއި ޖޯ ހްވަންގް ޖެހި ގޯލުންނެވެ.
ބްރެޒިލް އިން ދެވަނަ ފަހަރަށް ލީޑު ނެގީ ނޭމާ ކާމިޔާބުކުރި ޕެނަލްޓީ އިންނެވެ. މިއީ އެލެކްސް ސަންޑްރޯ އަށް ކޮރެއާ ކުޅުންތެރިއަކު ފައުލް ކުރުމުން ލިބުނު ޕެނަލްޓީއެކެވެ. ބްރެޒިލްގެ ތިންވަނަ ގޯލަކީ ވެސް ޕެނަލްޓީ އަކުން ނޭމާ ޖެހި ގޯލެކެވެ. މިފަހަރު ވެސް ޕެނަލްޓީ ލިބުނީ ކޮރެއާ ކުޅުންތެރިއަކު ސަންޑްރޯ އަށް ފައުލް ކުރުމުންނެވެ.
މެޗުގައި ނޭމާ ޖެހި ދެ ގޯލާއެކު އޭނާ ގައުމީ ޓީމަށް ޖަހައިދީފައިވާ ގޯލްގެ އަދަދު ވަނީ 73 އަށް އަރައިފައެވެ. ބްރެޒިލް އަށް އެންމެ ގިނަ ގޯލް ޖަހައިދިން ކުޅުންތެރިންގެ ލިސްޓުގެ އެއްވަނައިގައި 77 ގޯލާއެކު އޮތީ ޕެލޭއެވެ.
މިއަދުގެ މެޗުގައި ބްރެޒިލް އިން ޖެހި ހަތަރުވަނަ ގޯލް ދެވަނަ ޙާފުގައި ކުޅެން އެރި ފިލީޕެ ކުޓީނިއޯ ޖެހިއިރު ފަސްވަނަ ގޯލް ބްރޫނޯ ގުއިމަރެއަސް ދިން ބޯޅަ އަކުން ޖެހީ ގެބްރިއެލް ޖެސުސްއެވެ. ދުނިޔޭގެ ރޭންކިންގެ އެއް ވަނައިގައި އޮތް ބްރެޒިލް ދެން ކުޅޭ މެޗުގައި އަންނަ ހޯމަ ދުވަހު ބައްދަލުކުރާނީ ޖަޕާންއާއެވެ.
